လါမ့ၤ(၂၁)သီ, ၂၀၂၄နံၣ်
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး သုးပာ်ဖှိၣ်တဖၣ် ကးတံာ်ဒုးအီၤ သုးကီၣ်ကးအသုးကလၢၤလၢ အိၣ်ဆီလီၤအသး ဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၆)ဟီၣ်က၀ီၤ ဖူးခၠံမုၫ်သုးကလၢၤအဃိ သုးကီၣ်ကးအပှၤသုးဖိတဖၣ် ပာ်တ့ၫ်သုးကလၢၤဃ့ၫ်ပူၤဖျဲးအသးအဂ့ၫ် တၫ်သ့ၣ်ညါဘၣ်လၢ သုးပာ်ဖှိၣ်တဖၣ်အအိၣ်န့ၣ်လီၤ.
ဖူးခၠံးမုၫ်သုးကလၢၤအံၤ သုးကီၣ်ကးခီၣ်ချ့သုးရ့ၣ် (ခမရ ၅၅၈), (ခမရ ၅၆၁)ဒီး (ခလရ ၉၉၃)သုးရ့ၣ်တဖၣ် အိၣ်ဆီလီၤပာ်သးတၫ်လီၫ်န့ၣ်လီၤ. သုးအဂံၫ်အဘါ(၁၀၀)ဃၣ်ဃၣ်အိၣ် ဖူးခၠံးမုၫ်သုးကလၢၤအံၤ သုးပာ်ဖှိၣ်တဖၣ် ဒီၣ်တဲာ်ကွံာ်တၫ်အီၣ်တၫ်အီအကျဲ၀ံၤ တၫ်လဲၤထီၣ်ဒုးအီၤန့ၣ်လီၤ.
“ဖဲအပူၤကွံာ် လါမ့ၤ(၁၇)သီဒီး (၁၈)သီအနံၤန့ၣ် တၫ်လဲၤထီၣ်ဒုးအဃိ ပာ်တ့ၫ်သုးကလၢၤဃ့ၫ်ဟးထီၣ်၀ဲလီၤ. ကျိဖးဒိၣ်ဒီးကျိဖိလၢအ၀ဲသ့ၣ်စိာ်၀ဲတန့ၫ်တဖၣ် မၤပိာ်ဖးဟးဂီၤကွံာ်၀ဲအဂ့ၫ်” KNLA သုးဖိတဂၤ စံး၀ဲန့ၣ်လီၤ.
KNLA ဒီးသုးပာ်ဖှိၣ်တဖၣ် ဒီၣ်တဲာ်ကွံာ်တၫ်အီၣ်တၫ်အီအကျဲ၀ံၤ တၫ်က၀ီၤတံာ်ဃၣ်အီၤသုးကလၢၤအံၤလၢအလါတဖၣ်အဃိ ပှၤလၢဟဲဟ့ၣ်လီၤအသးဃုာ်ဒီးစုက၀ဲၤတဖၣ်အိၣ်၀ဲ တကးဒံးဘၣ် ပှၤလၢတၫ်ဖီၣ်န့ၫ်အီၤစ့ၫ်ကီးအိၣ်၀ဲအဂ့ၫ် ကမျၢၫ်တၫ်ဒီသဒၢသုး(PDF)သုးပာ်ဖှိၣ်သုးကျိၤ ပှၤဘၣ်မူဘၣ်ဒါတဂၤ စံး၀ဲ့နၣ်လီၤ.
သုးကီၣ်ကးအပှၤသုးဖိလၢ ပာ်တ့ၫ်သုးကလၢၤဃ့ၫ်ပူၤဖျဲးအသးတဖၣ်အကျါ သုးအဂံၫ်အဘါအိၣ်(၂၀) လၢလဲၤဃ့ၫ်ဆူကၠီၣ်တဲၣ်တပၤအံၤ ဖဲမဟါအနံၤန့ၣ် မၤသံကွံာ်၀ဲစ့ၫ်ကီး မိၫ်ဒၢ(၁)ဂၤဒီး ပိာ်ခွါ(၃)ဂၤအဂ့ၫ် လီၫ်က၀ီၤပိာ်မုၣ်တဂၤတဲ၀ဲန့ၣ်လီၤ.
ဖဲအပူၤကွံာ်လါမးရှးအတီၫ်ပူၤ သုးကီၣ်ကးအသုးကလၢၤလၢ မဲၫ်သရီထၣ်ဒီး ယ့ၣ်တယီး သုးကလၢၤတဖၣ်အပူၤ သုးကီၣ်ကးအပှၤသုးဖိတဖၣ် လၢပာ်တ့ၫ်သုးကလၢၤ လဲၤဃ့ၫ်ခီဆူကီၫ်ကၠီၣ်တဲၣ်ကီၫ်ဆၢတဖၣ် ကီၫ်ကၠီၣ်တဲၣ်က့ၤဆီတလဲဆှၢက့ၤဆူ သုးကီၣ်ကးအအိၣ်န့ၣ်လီၤ.
ref:theirrawaddy
