ယပၣ်ဘျီၣ်ဒိၣ်ထံဂုၤကီၫ်ဂၤဂ့ၫ်၀ီကမံတံာ်(နိုင်ငံခြားရေးရာကော်မတီ) ပှၤဘၣ်မူဘၣ်ဒါ ခံဂၤတဂၤ ထံၣ်လိာ်သးဒီး ကီၫ်ပယီၤတၫ်ပၢၫ်ဆၢကရၢ

လါမ့ၤ(၁၆)သီ, ၂၀၂၄နံၣ်

ကလုာ်ဒူၣ်တၫ်ပၢၫ်ဆၢကရၢတနီၤ(တိုင်းရင်းသားအဖွဲ့တချို့)ပာ်ဃုာ် ကီၫ်ပယီၤ ကရၢလၢပၢၫ်ဆၢတၫ်တနီၤအခၢၣ်စး တဖၣ်(မြန်မာအတိုက်အခံအဖွဲ့ကိုယ်စားလှယ်တချို့)ဒီး ယပၣ်ဘျီၣ်ဒိၣ်ထံဂုၤကီၫ်ဂၤဂ့ၫ်၀ီကမံတံာ် (နိုင်ငံခြားရေးရာကော်မတီ) ပှၤဘၣ်မူဘၣ်ဒါ ခံဂၤတဂၤ မံးစထၢၣ် Komura Masahiro တဖၣ် ဖဲလါမ့ၤ(၁၄)သီနံၤ ဂီၤခီန့ၣ်ထံၣ်လိာ်သးအဂ့ၫ် ယပၣ်ထံဂုၤကီၫ်ဂၤ၀ဲၤကျိၤ(ဂျပန်နိုင်ငံခြားရေးဌာန) တဲ၀ဲလီၤ.

လၢကတီၫ်အံၤ ကီၫ်ပယီၤပူၤ ဘၣ်ထွဲတၫ်အိၣ်သးတဖၣ်န့ၣ် ဟ့ၣ်ခီဟ့ၣ်နီၤလိာ်သးတၫ်ထံၣ်တၫ်ဆိမိၣ်၀ံၤ တၢၣ်ပီၣ်တဲသကိး၀ဲ ကဒဲကဒဲအသိး, ကီၫ်ပယီၤတၫ်သဘံၣ်သဘုၣ်ပူၤ ပှၤလၢဘၣ်ထွဲခဲလၢာ် ကမၤဘၣ်ထွဲလိာ်သး၀ံၤ ကဘှါဆှဲန့ၫ်၀ဲ တၫ်ဂ့ၫ်ကီတဖၣ်အဂီၫ် ယပၣ်ပဒိၣ်(ဂျပန်အစိုးရ) ကဆီၣ်ထွဲမၤစၢၤကဒီး၀ဲအဂ့ၫ် ယပၣ်ထံဂုၤကီၫ်ဂၤ၀ဲၤကျိၤ(ဂျပန် နိုင်ငံခြားရေးဌာန) တၫ်ဘိးဘၣ်ရၤလီၤပူၤ ပာ်ဖျါ၀ဲလီၤ.

ယပၣ်ပဒိၣ်ဒီးထံဖိကီၫ်ဖိတဖၣ် အတၫ်ဆီၣ်ထွဲမၤစၢၤ တပယူာ်ဃီလၢ ကီၫ်ပယီၤအဖီခိၣ် စံးဘျုးဘၣ်၀ဲအဂ့ၫ် ကလုာ်ဒူၣ် တၫ်ကရၢကရိတဖၣ် တဲဆၢက့ၤ၀ဲ၀ံၤ ကီၫ်ပယီၤဂ့ၫ်၀ီအပူၤ ဘၣ်ထွဲ ယပၣ်အတၫ်မုၫ်လၫ်တဖၣ်စ့ၫ်ကီး တဲ၀ဲလီၤ. လၢတၫ်ဘှါ ဆှဲကီၫ်ပယီၤဂ့ၫ်၀ီ လၢတၫ်မုာ်တၫ်ခုၣ်ပူၤန့ၣ် ကဒဲကဒဲတၫ်ရ့လိာ်ဘၣ်ထွဲလၢဘူးဘူးတံၫ်တံၫ်တဖၣ် အဂံၫ်ကဆူၣ်ထီၣ်ကဒီးအဂီၫ် ဖဲတၫ်ထံၣ်လိာ်သးအပူၤ တဲပာ်ဂၢၫ်ပာ်ကျၢၤ၀ဲစ့ၫ်ကီးအဂ့ၫ် ယပၣ်ထံဂုၤကီၫ်ဂၤ၀ဲၤကျိၤ တၫ်ဘိးဘၣ်ရၤလီၤပူၤ ပာ်ဖျါ၀ဲလီၤ.

တၫ်ထံၣ်လိာ်သးအပူၤ ပှၤလၢပာ်ဃုာ်ဒီးပှၤလၢအိၣ်ဘူးတဖၣ်တဲ၀ဲလၢ တၫ်ထံၣ်လိာ်သးအပူၤ K3C လၢတၫ်ကိးအီၤ လၢအဖုၣ်, ပှၤပၢၫ်ဆၢထီဒါ ပယီၤသုးကီၣ်ကးတဖၣ်လၢအမ့ၫ် ကခၠ့ၣ်တၫ်ကဘျ့ကရၢ-KIA (ကချင် လွတ်လပ်ရေးအဖွဲ့), ကညီဒီ ကလုာ်စၢဖှိၣ်ကရၢ-KNU (ကရင်အမျိုးသား အစည်းအရုံး -KNU), ကရ့ၣ်နံၣ်ဒီကလုာ် တၫ်လဲၤထီၣ်လဲၤထီပၣ်တံၣ် -KNPP (ကရင်နီအမျိုးသားတိုးတက်ရေးပါတီ (KNPP), ဒီး ခၠီဒီကလုာ်သုး -CNF (ချင်း အမျိုးသားတပ်ဦး-CNF), တကးဘၣ် ဒီကလုာ်ဃူဖိးပဒိၣ်-NUG (အမျိုးသား ညီညွတ်ရေး အစိုးရ NUG)ခၢၣ်စး တဖၣ်စ့ၫ်ကီးတဲ၀ဲလၢ လဲၤထံၣ်လိာ် အသး လၢကီၫ်ယပၣ်အဂ့ၫ် ဒံးန့ၣ်လီၤ.

K3C ကရၢအံၤ အပူၤကွံာ်လါမးရှး(၂၈)သီအနံၤစ့ၫ်ကီး ထံၣ်လိာ်တ့ၫ်အသးဒီး အမဲရကၤထံဂုၤကီၫ်ဂၤ ပှၤကူၣ်လိာ်တၢၣ်ပီၣ်တၫ်(အမေရိကန်နိုင်ငံခြားရေးအတိုင်ပင်ခံ) Derek Chollet ဒံးန့ၣ်လီၤ. ဖဲန့ၣ်အကတီၫ် Derek Chollet ကွဲးဖျါ၀ဲလၢအ “X” ပှၤတ၀ၢပှာ်ဘျးစဲပူၤလၢ ထံၣ်လိာ်သးဒီး ကီၫ်ပယီၤပူၤ ဖဲၣ်ဒရၢၣ်ဒံၣ်မိၣ်ကရ့ၣ်စံၣ်သနူ ကအိၣ်ထီၣ်အဂီၫ် K3C ကရၢလၢဂဲၤလိာ်တၫ်တဖၣ်န့ၣ်လီၤ. သုးကီၣ်ကးတခီ ကီၫ်ပယီၤတၫ်အိၣ်ဂၢၫ်ဆိးကျၢၤ ကလီၤစှၤအဂီၫ် အမဲရကၤမၤ၀ဲလၢကျဲအကလုာ်ကလုာ်အဂ့ၫ် စံးအၢဃာ်၀ဲန့ၣ်လီၤ.

ref:voa