လါမ့ၤ(၁၄)သီ, ၂၀၂၄နံၣ်
ဖဲ ၂၀၂၄နံၣ်, စးထီၣ်ဖဲ လါမ့ၤ(၇)သီအနံၤဒီးတုၤလၢ(၁၁)သီအနံၤန့ၣ် ဘၣ်ထွဲဒီးခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အတၫ်ပၢတၫ်ပြးဟီၣ်က၀ီၤအပူၤ တၫ်ပၢတၫ်ပြးဒီး တၫ်ပၢဆှၢရဲၣ်ကျဲၤကမျၢၫ်တၫ်ကူၣ်လိာ်တဲသကိးအဆိကတၢၫ်တဘျီ တၫ်မၤအီၤဖဲ ခ့ၣ်အဲၣ်ယူၣ်, လီၫ်ခၢၣ်သးတၫ်လီၫ်အဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲန့ၣ်လီၤ.
တၢ်ကူၣ်လိာ်တဲသကိးတၢ်အိၣ်ဖှိၣ် အတၢ်ပညိၣ်ကွၢ်စိမ့ၢ်၀ဲ တၢ်ကဟံးန့ၢ်ဂ့ၢ်၀ီဒီး ဘှါရှဲတၢ်တၤတဖၣ်လၢအကါဒိၣ်လၢ တၢ်ပၢတၢ်ပြးအဂီၢ် ကီၢ်ဆၣ်ခိၣ်တဖၣ်လၢ ကီၢ်ဆၣ်(၂၇)ဘ့ၣ် ဘၣ်ကွၢ်ဆၢၣ်မဲာ်လၢ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ တၢ်ပၢတၢ်ပြးဟီၣ်က၀ီၤအပူၤအဂီၢ်န့ၣ်လီၤ. တၢ်ကူၣ်လိာ်တဲသကိးတၢ်လၢ တၢ်တုၤလီၤတီၤလီၤအပူၤဒီး တၢ်ကွဲးလီၤပာ်လီၤတၢ်တိာ်ကူၣ်ကျဲၤသ့ၣ်တဖၣ်အသနၢၣ်အပူၤ ပှၤထီၣ်တၢ်အိၣ်ဖှိၣ်တဖၣ်ဃုသ့ၣ်ညါအါထီၣ် ကမျၢၢ်တၢ်ပၢတၢ်ပြးဒီး တၢ်ရ့လိာ်ဘၣ်ထွဲဒီးကမျၢၢ်တၢ်ဂ့ၢ်သ့ၣ်တဖၣ် ကဂ့ၤဒိၣ်ထီၣ်အဂီၢ် တၢ်တိာ်ကျဲၤကူၣ်တရံးလၢအသီတဖၣ်န့ၣ်လီၤအဂ့ၢ် လံာ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤ.
တၫ်ကူၣ်လိာ်တဲသကိးတၫ်အိၣ်ဖှိၣ်အံၤ ဘၣ်တၫ်ကတဲာ်ကတီၤအီၤ လီၤတံၫ်လီၤဆဲးလၢ ကကျၢၫ်ဘၢတၫ်ဂ့ၫ်သ့ၣ်တဖၣ်လၢအမ့ၫ် တၫ်ဆဲးကျိးဆဲးကျၢ တၫ်တိာ်ကူၣ်ကျဲၤသ့ၣ်တဖၣ်(ဆက်သွယ်ရေးဗျူဟာများ), တၫ်ရဲၣ်သဲကတီၤလၢတုၤလီၤတီၤလီၤ ဒီးကမျၢၫ်ပှၤတ၀ီအတၫ်ပာ်ဖှိၣ်မၤသကိးတၫ်အဂီၫ်(ရပ်ရွာပူးပေါင်းပါဝင်မှု) တၫ်မၤဒုးအိၣ်ထီၣ်တၢ်သ့ၣ်တဖၣ်ဃုာ်ဒီး တၫ်ဂ့ၫ်တၫ်ကျိၤအလီၤဆီလိာ်သးတဖၣ်န့ၣ်လီၤ.
ကီၫ်သူလ့ၤတၫ်ပၢဟီၣ်က၀ီၤ, ကီၫ်ဆၣ်(၂၇)ဘ့ၣ် ကီၫ်ဆၣ်ခိၣ်နၫ်တဖၣ်ဒီး ကီၫ်ဆၣ်နဲၣ်ရွဲၣ်တဖၣ် မၤလိ၀ဲစ့ၫ်ကီး ကီၫ်သူလ့ၤတၫ်ပၢတၫ်ပြးလံာ်ဟံးဃာ် (ကော်သူးလေအုပ်ချုပ်ရေးလက်စွဲစာအုပ်)လၢ ကဖိးမံလိာ်သးဒီး တၫ်မၤတၫ်ရဲၣ်တၫ်ကျဲၤတဖၣ်လၢ တၫ်မၤအီၤသ့လၢ ကီၫ်ဆၣ်တဘ့ၣ်စုာ်စုာ် အတၫ်ဂုၤထီၣ်ပသီထီၣ်အဂီၫ်န့ၣ်လီၤ.
လၢန့ၣ်အမဲာ်ညါ ကီၫ်သူလ့ၤတၫ်ပၢဟီၣ်က၀ီၤ, ကီၫ်ဆၣ်တဘ့ၣ်စုာ်စုာ် ကီၫ်ဆၣ်ခိၣ်တဖၣ်ဒီး ကီၫ်ဆၣ်နဲၣ်ရွဲၣ်တဖၣ်အဘၢၣ်စၢၤ တၫ်ပာ်ဖှိၣ်မၤသကိးတၫ်လၢ အတၫ်သ့တၫ်ဘၣ်တဖၣ်အံၤအဃိ ကကဲထီၣ်တၫ်ဘျုးတၫ်ဖှိၣ်ဒိၣ်ဒိၣ်မုၫ်မုၫ်လၢ တၫ်ပၢဆှၢရဲၣ်ကျဲၤ ကမျၢၫ်တၫ်ဖံးတၫ်မၤ(ပြည်သူ့စီမံခန့်ခွဲရေး)အပူၤ ဘၣ်တၫ်မုၫ်လၫ်ကွၫ်စိ၀ဲအဂ့ၫ် စ့ၫ်ကီးပာ်ဖျါဃာ်၀ဲန့ၣ်လီၤ.
တကတီၫ်ဃီ ၂၀၂၄နံၣ် လါမ့ၤ (၁၂)သီအနံၤ ခ့ၣ်အဲၣ်ယူၣ်တၫ်ပၢဟီၣ်က၀ီၤ, ကီၫ်ဆၣ်ခိၣ်နၫ်တဖၣ် တၫ်ကူၣ်လိာ်တဲသကိးတၫ်အိၣ်ဖှိၣ်အတၫ်ကဲထီၣ်လိၣ်ထီၣ်၀ံၤအလီၫ်ခံ ကညီဒီကလုာ်စၢဖှိၫ်ကရၢ လီၫ်ခၢၣ်သးဘိးဘၣ်ရၤလီၤ၀ဲ မဲး၀ါကျိတၫ်အၢၣ်လီၤအီလီၤအလံာ်(မဲ့ဝါးကလိုးကြေညာစာတမ်း) တဘ့ၣ်စ့ၫ်ကီးန့ၣ်လီၤ.
လၢမဲး၀ါကျိတၫ်အၢၣ်လီၤအီၤလီၤအလံာ်ဘိးဘၣ်ရၤလီၤအပူၤ ပာ်ဃုာ်၀ဲ တၫ်အၢၣ်လီၤအီၤလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဂံၫ်ခီၣ်ထံးတၫ်ဘျၢသဲးစးခိၣ်သ့ၣ်အဖီခိၣ်, တၫ်လူၤပိာ်မၤထွဲတၫ်ပၢတၫ်ပြးလၢအဂ့ၤ(ကောင်းမွန်သောအုပ်ချုပ်ရေးကို လိုက်နာခြင်း), တၫ်တြီဆၢဒီသဒၢန့ၫ် ထံဖိကီၫ်ဖိကမျၢၫ်ခွဲးယာ်(ပြည်သူ့အခွင့်အရေးများကိုကာကွယ်ခြင်း), တၫ်ဂုာ်ကျဲးစၢးပာ်ဖှိၣ်မၤသကိးသ့ၣ်တဖၣ်, တၫ်ဂုၤထီၣ်ပသီထီၣ်လၢအယူာ်ကၢ (တူၫ်ယံာ်ခိးကျၢၤတၫ်ဂုၤထီၣ်ပသီထီၣ်), ဒီးတၫ်လဲၤထီၣ်လဲၤထီလၢ အယူာ်ကၢ(တၫ်လဲၤထီၣ်လဲၤထီလၢ တအိၣ်ကတီၢ်သး)(စဉ်ဆက်မပြတ်တိုးတက်မှု)တဖၣ် ပာ်ဃုာ်၀ဲန့ၣ်လီၤ.
photo:KNU
