လါမ့ၤ(၉)သီ, ၂၀၂၄နံၣ်
လၢ ၂၀၂၁နံၣ် သုးဟံးန့ၫ်ဆူၣ် ထံကီၫ်တၫ်စိတၫ်ကမီၤလံၤလံၤ ဒံၣ်မိၣ်ကရ့ၣ်စံၣ်ခိၣ်နၫ် (ဒီမိုကရေစီခေါင်းဆောင်) ဒီၣ်အီၣ်ဆါဆူးကၠံၣ် (ဒေါ်အောင်ဆန်းစုကြည်) လၢဘၣ်တၫ်ဖီၣ်ဃာ်အီၤအံၤ ခဲၣ်ဘီဒံယါကိတိာ်ခိၣ်ကျၢၫ်လီၫ်လံၤ (ကမ္ဘောဒီးယားဝန်ကြီးချုပ်ဟောင်း) ဟိၣ်ဆၣ် (ဟွန်ဆန်) ဃ့ထီၣ်လၢကထံၣ်လိာ်သးဒီးအီၤအဂီၫ်န့ၣ် ဖဲလါမ့ၤ(၈)သီနံၤန့ၣ် သုးကီၣ်ကး ဂ့ၫ်လိာ်ဃာ်၀ဲလီၤ.
ဖဲတၫ်မၤထွဲအီၤဒ် ဆူမဲာ်ညါတၫ်ဖံးတၫ်မၤအကတီၫ် လၢပ၀ဲတကပၤ ပမ့ၫ်ထံၣ်လၢတလိာ်ဘၣ်န့ၣ် ပမၤထွဲအီၤအလီၫ် တအိၣ်ဒံးဘၣ်အဂ့ၫ် သုးကီၣ်ကးပှၤတဲတၣ်ပၢ(စစ်ကောင်စီပြောခွင့်ရ) သုးခိၣ်ကျၢၫ်ဂီၫ်ဂ့ၫ် စီၣ်မ့ထိတဲ၀ဲလီၤ.
သုးကီၣ်ကးတကပၤ ကီၫ်စၢဖှိၣ်သနူ(ပြည်ထောင်စုစနစ်)လၢ အုၣ်ကီၤဃာ် ပာ်တံၣ်ခဲလၢာ်ဒံၣ်မိၣ်ကရ့ၣ်စံၣ်(ပါတီစုံဒီမိုကရေစီ)ဒီး ဖဲၣ်ဒရၢၣ်သနူ(ဖက်ဒရယ်စနစ်) ၀ံၤလံအဃိ ဒ်ဟ့ၣ်ဃာ်တၫ်အၢၣ်လီၤအသိး ကမၤတၫ်ဃုထၢ တုၤလၢကဲထီၣ်အဂ့ၫ် တဲ၀ဲဘၣ်ဆၣ် တတဲဖျါ၀ဲတၫ်ဂ့ၫ်လီၤတံၫ်လီၤဆဲးဘၣ်. ဆူညါတၫ်မၤမူဒါ(၅)တီၤအိၣ်၀ဲဒီး ကမၤထွဲ၀ဲဒ်န့ၣ်သိး၀ံၤ တၫ်ဂ့ၫ်တၫ်ကျိၤလၢ ကမၤကဃၢထီၣ်တၫ်တဖၣ်န့ၣ် ကဟးဆှဲး၀ဲအဂ့ၫ်တဲ၀ဲလီၤ.
ဖဲလါမ့ၤ(၇)သီနံၤ ဟိၣ်ဆၣ်န့ၣ် ဖဲထံၣ်လိာ်သးဒီး သုကီၣ်ကးအခိၣ်(စစ်ကောင်စီခေါင်းဆောင်) မ့အီၣ်လဲၣ် လၢအိၣ်လဲ (Online)ပူၤအကတီၫ် ဃ့ခွဲးလၢကထံၣ်လိာ်သးဒီး ဒီၣ်အီၣ်ဆါစူးကၠံၣ်န့ၣ်လီၤ. ဟိၣ်ဆၣ်လၢ ဟံးန့ၫ်ဃာ် ကီၫ်ခဲၣ်ဘီဒံယါ (ကမ္ဘောဒီးယား) တၫ်စိတၫ်ကမီၤလၢယံာ် အနံၣ် (၄၀)ဃၣ်ဃၣ်အံၤ ဖဲအပူၤကွံာ်နံၣ်န့ၣ် ဟ့ၣ်လီၤက့ၤ ကိတိာ်ခိၣ်ကျၢၫ်လီၫ်လၤ(ဝန်ကြီးချုပ်ရာထူး)ဆူ အဖိခွါ ဟိၣ်မၣ်နဲး (ဟွန်မာနက်)၀ံၤ လၢကတီၫ်အံၤအိၣ်ဒံးဒၣ်ဒ် ဘျီၣ်ဒိၣ်ထးပှၤပၢၤလီၫ်ဆ့ၣ်နီၤ (အထက်လွှတ်တော်ဥက္ကဋ္ဌ)တဂၤ အသိးန့ၣ်လီၤ.
သုးကီၣ်ကးပှၤတဲတၫ်ပၢ တၫ်ဘိးဘၣ်ရၤလီၤအပူၤတခီ ဟိၣ်ဆၣ်ဒီး သုးကီၣ်ကးအခိၣ်တဖၣ်န့ၣ် မ့ၫ်တၫ်တၢၣ်ပီၣ်တဲသကိး၀ဲ ထံကီၫ်ခံဘ့ၣ်တၫ်ရ့လိာ်ဘၣ်ထွဲဂ့ၫ်၀ီ (နှစ်နိုင်ငံချစ်ကြည်ရေး), အၣ်စံၣ်ယၣ်ဟီၣ်ဂ့ၫ်၀ီ(အာဆီယံဒေသအရေး) ဒီး တၫ်ဃုထၢတၫ်ဂ့ၫ် (ရွေးကောက်ပွဲကိစ္စ)တဖၣ်အဂ့ၫ် တဲ၀ဲလီၤ.
ref:voa
photo:thaipbsworld
