လါမ့ၤ(၇)သီ, ၂၀၂၄နံၣ်
စးထီၣ်ဖဲ ၂ဝ၂၄နံၣ် လါအ့ဖြ့ၣ်(၁)သီတုၤ (၃ဝ)သီအနံၤ, (၁)လါအတီၢ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်မုၫ်တြီၫ်ဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA ဒီး သုးကီၣ်ကးအဘၢၣ်စၢၤ တၫ်ဒုးကဲထီၣ်သးခဲလၢာ်အိၣ်ဝဲ(၁၇၅)ဘျီ၀ံၤ သုးကီၣ်ကးတကပၤသံဝဲ(၆၄)ဂၤဒီး ဘၣ်ဒိဝဲ (၃၅)ဂၤအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲဖဲ လါမ့ၤ(၆)သီအနံၤန့ၣ်လီၤ.
ဖဲလါအ့ဖြ့ၣ်အတီၢ်ပူၤ သုးကီၣ်ကးအသုးကလၢၤ(၅)ဖျၢၣ် လၢအဟဲအိၣ်ဆီလီၤအသးဖဲ ကီၢ်ရ့ၣ်မုၢ်တြီၢ်, သုးက့နီၣ်ဂံၢ်(၅)အပူၤတဖၣ်လၢအမ့ၢ် သူမှဲထၣ်သုးကလၢၤ(သူးမွဲထာစခန်း), ကီကီၣ်ထၣ်သုးကလၢၤ(ကောကော်ထာစခန်း), ညၣ်တဃိၤကၠိသုးကလၢၤ (ညာတဃို့ကျိူးစခန်း), ဟီၣ်မးဒီသုးကလၢၤဒီး မဲၤဝ့ၤဘျၢၣ်ကၠိသုးကလၢၤ(မယ်ဝေဘလယ်ကျိုးစခန်း)တဖၣ်အပူၤ သုးကီၣ်ကး အပှၤသုးဖိတဖၣ် ပာ်တ့ၫ်သုးကလၢၤ ဟးထီၣ်ကွံာ်၀ဲအဂ့ၫ် ပာ်ဖျါဃာ်၀ဲန့ၣ်လီၤ.
တၢ်ဒုးကဲထီၣ်သးလၢ ခံကပၤလၢာ်ဒ်သိးအံၤအဖီခိၣ် သုးကီၣ်ကးတပၤ ခးလီၤဝဲကျိဖးဒိၣ်ဆူ ကမျၢၢ်ဒူသဝီဒီး တၢ်ဖံးအီၣ်မၤအီၣ်အလီၢ်အကျဲအိၣ်ဝဲ(၅)ဖျၢၣ်ဒီး ဘၣ်ဒိဝဲကမျၢၢ်တဂၤန့ၣ်လီၤ.
သုးကီၣ်ကး အကဘီယူၤစ့ၢ်ကီး ဟဲတ့ၢ်လီၤမ့ၣ်ပိၢ်ဖးဒိၣ် ဆူလီၢ်ကဝီၤဒူသဝီတၢ်ဖံးအီၣ်မၤအီၣ်အလီၢ်အကျဲခဲလၢာ် အိၣ်ဝဲ(၄၂)ဖျၢၣ်အဃိ ဘၣ်ဟးဂီၤဝဲဟံၣ်ဃီတၢ်သူၣ်ထီၣ်တနီၤ, တၢ်ထူၣ်တၢ်ဘိတနီၤဒီး ဘၣ်သံဃုာ်စ့ၢ်ကီးဝဲ ဆၣ်ဖိကီၢ်ဖိတနီၤအိၣ်၀ဲအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်မုၫ်တြီၫ်ဟီၣ်က၀ီၤအပူၤ KNLAဒီး တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃၣ်၀ဲသုးကီၣ်ကး အသုးကလၢၤတဖၣ် လၢအိၣ်ဆီလီၤအသး ဖဲ၀့ၫ်ဖၣ်ပူၣ်အိၣ်သူၣ်လီၤ (ခမရ-၄၃၄) ဒီး (ခလရ-၁၉)သုးရ့ၣ်တဖၣ်၀ံၤ စးထီၣ်ဖဲအပူၤကွံာ်လါမးၡးအတီၫ်ပူၤန့ၣ် ပၢဆှၢဃာ်၀ဲ၀့ၫ်ဖၣ်ပူၣ်န့ၣ်လီၤ.
တၫ်ဂီၤ-လါအ့ဖြ့ၣ်(၂၄)သီအနံၤ, KNLAဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်သုးကီၣ်ကး (ခမရ-၄၃၄)သုးရ့ၣ်အပူၤ တၫ်မၤန့ၫ်ကျိချံပှာ်သၣ်တဖၣ်.
