လါမ့ၤ(၆)သီ, ၂၀၂၄နံၣ်
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ (၃)နံၣ်ဘျဲၣ်အတီၫ်ပူၤ သုးကီၣ်ကးဒီး အစုတီၤဖီလာ်တၫ်ကရၢကရိတဖၣ် ဒွဲၣ်အူမၤဟးဂီၤကွံာ်အဃိ ကီၫ်ပယီၤဒီတဘ့ၣ် ကမျၢၫ်ဟံၣ်ဃီတၫ်သူၣ်ထီၣ်(၈၈,၃၇၃)ဖျၢၣ်ဟးဂီၤကွံာ်၀ဲအဂ့ၫ် Data for Myanmar ထုးထီၣ်ပာ်ဖျါဃာ်၀ဲဖဲ လါမ့ၤ(၃)သီအနံၤန့ၣ်လီၤ.
ဖဲအပူၤကွံာ် လါအ့ဖြ့ၣ်အတီၫ်ပူၤ သုးကီၣ်ကးဒွဲၣ်အူကွံာ်အဃိ ကီၫ်ပယီၤဒီတဘ့ၣ် ကမျၢၫ်ဟံၣ်ဃီတၫ်သူၣ်ထီၣ်(၃,၉၆၀)ဖျၢၣ် ဘၣ်ဟးဂီၤကွံာ်၀ဲဒီး ဖဲန့ၣ်အကျါ ရခၢၣ်ကီၫ်, ၀့ၫ်ဘူသံတီၣ်အပူၤ ဟံၣ်(၁၅၀၀)ဖျၢၣ်န့ၣ်လီၤ.
တကးဒံးဘၣ် ကီၫ်ခီတဖၣ်လၢအမ့ၫ် မါတလ့ကီၫ်ခီ(မန္တလေးတိုင်း)အပူၤ (၁၂၂၀)ဖျၢၣ်, စကဲကီၫ်ခီ(စစ်ကိုင်းတိုင်း)အပူၤ (၉၉၇)ဖျၢၣ် ဒီး မကွ့ကီၫ်ခီ(မကွေးတိုင်း)အပူၤ (၂၂၉)ဖျၢၣ်ပာ်ဃုာ်၀ဲန့ၣ်လီၤ.
မ့မ့ၫ်လၢရခၢၣ်ကီၫ်, ၀့ၫ်ဘူသံတီၣ်(ဘူးသီးတောင်မြို့)အပူၤ ကမျၢၫ်ဟံၣ်(၂)ကထိဖျၢၣ် တုၤ(၃)ကထိဖျၢၣ် တၫ်ဒွဲၣ်အူမၤဟးဂီၤကွံာ်၀ဲအဂ့ၫ် တၫ်ဒိးန့ၫ်ဘၣ်၀ဲစရီဘၣ်ဆၣ် အဘူးကတၢၫ်တၫ်တယၫ်ပာ်ဂၢၫ်ပာ်ကျၢၫ်ဃာ်လီၤအဂ့ၫ် Data for Myanmar စံး၀ဲန့ၣ်လီၤ. တၫ်မၤသမံသမိးလီၤတံၫ်လီၤဆဲးမ့ၫ်၀ံၤ တၫ်ကပာ်ဂၢၫ်ပာ်ကျၢၫ်၀ံၤ ကပာ်ဖျါထီၣ်၀ဲအဂ့ၫ်စ့ၫ်ကီးစံးပာ်၀ဲန့ၣ်လီၤ.
ဖဲအပူၤကွံာ် ၂၀၂၃နံၣ် လါအီကၢးအတီၫ်ပူၤ ကမျၢၫ်ဟံၣ်ဃီတၫ်သူၣ်ထီၣ် လၢတၫ်ဒွဲၣ်အူမၤဟးဂီၤကွံာ်အီၤ လီၤစှၤလီၤ(၁)ကထိဆူအဖီလာ်ဘၣ်ဆၣ် စးထီၣ်ဖဲလါဒံၣ်စ့ဘၢၣ်န့ၣ် ဟဲအါထီၣ်ကဒါက့ၤအဂ့ၫ် ပာ်ဖျါဃာ်၀ဲန့ၣ်လီၤ.
လၢန့ၣ်အမဲာ်ညါ ဖဲအပူၤကွံာ် လါမးၡးအတီၫ်ပူၤစ့ၫ်ကီး ကမျၢၫ်ဟံၣ်ဃီ (၂,၈၃၁)ဖျၢၣ် ဘၣ်တၫ်ဒွဲၣ်အူမၤဟးဂီၤကွံာ်အီၤဒီး ဖဲအကျါစကဲကီၫ်ခီအပူၤ (၁,၈၅၁)ဖျၢၣ်ဒီး မါတလ့ကီၫ်ခီအပူၤ (၆၂၈)ဖျၢၣ် ပာ်ဃုာ်၀ဲန့ၣ်လီၤ.
#socialmedia
