လါမ့ၤ(၂)သီ, ၂၀၂၄နံၣ်
စးထီၣ်ဖဲလါမ့ၤ(၁)သီနံၤ လၢရၤမတံ-မဲဆီးကီၫ်ဆၢတြဲၤန့ၣ် ပှၤဟးထီၣ်က့ၤလီၤလၢနုာ်လီၤဟးထီၣ်တဖၣ် ကဘၣ်ဖီၣ်ဃာ် Uinque Identity (UID) Card အဂ့ၫ် သုးကီၣ်ကးအကီၫ်ဆၣ်ပတီၫ် တၫ်ပၢဆှၢရဲၣ်ကျဲၤ ပှၤကညီတၫ်နုာ်လီၤဟးထီၣ်၀ဲၤကျိၤ(စစ်ကောင်စီ မြို့နယ်အဆင့် လူဝင်မှုကြီးကြပ်ရေးဌာန) နဲၣ်လီၤဃာ်၀ဲလီၤ.
တၫ်ရဲၣ်တၫ်ကျဲၤအံၤ မ့ၫ်ဒ်သိးပှၤခီကီၫ်ဆၢအနီၫ်ဂံၫ်နီၫ်ဒွးဒီး တၫ်မၤလီၤတံၫ်တၫ်ခီကီၫ်ဆၢတဖၣ် တၫ်ကအိၣ်ခိးကွၫ်၀ံၤ ပှၤလၢဖီၣ်ဃာ် ခိၣ်ဂီၤလၢအသးသမူလၢာ်(သက်တမ်းကုန်ဆုံးသည့်မှတ်ပုံတင်ကိုင်ဆောင်သူ)ဒီး ပှၤလၢဖီၣ်ဃာ်ခိၣ်ဂီၤအဃီၤအဘျၣ်(မှတ်ပုံတင်အတုကိုင်ဆောင်သူ) အတၫ်ဟူးတၫ်ဂဲၤတဖၣ် မ့ၫ်ဒ်သိးတၫ်ဟံးန့ၫ်အီၤဂ့ၫ်၀ီကန့ၫ်အဂီၫ်အဂ့ၫ် ဖဲလါမ့ၤ(၁)သီနံၤန့ၣ် မၠ့ၣ်မၣ်အလ့တၫ်ကစီၣ် (မြန်မာ့အလင်းသတင်းစာ) ပာ်ဖျါ၀ဲလီၤ.
တၫ်ရဲၣ်တၫ်ကျဲၤအံၤ တၫ်ခီကၠီၣ်တဲၣ်ကီၫ်ဆၢ(ထိုင်းနိုင်ငံနယ်စပ်ဖြတ်ကျော်မှု)တကးဘၣ် ပှၤလၢခီထီၣ်ခီလီၤ တရူး(တရုတ်)ဒီး အ့ဒံယါ(အန္ဒိယ)ကီၫ်ဆၢတဖၣ် စ့ၫ်ကီး ပာ်ဃုာ်၀ဲန့ၣ်လီၤ. လၢရၤမတံဟီၣ်က၀ီၤပူၤ ကၠါဖၠး (ကျားဖြန့်) ပှၤလံၣ်အီၣ်လီအီၣ်ကျိာ်စ့ တၫ်ကဒုးဖျိးကွံာ်အဂီၫ် ဖဲထံဂုၤကီၫ်ဂၤတၫ်ကရၢကရိတဖၣ် ဟ့ၣ်သုးကီၣ်ကးတၫ်ဆီၣ်သနံးအကတီၫ် သုးကီၣ်ကးအံၤ ဒုးအိၣ်ထီၣ်တၫ်ရဲၣ်တၫ်ကျဲၤ အမိၫ်လံၤမိၫ်ပှၫ်ဒ်သိးအံၤန့ၣ်လီၤ.
ဖဲတယံာ်ဒံးဘၣ် လၢတရူးကီၫ်, ၀့ၫ်ဘ့ၣ်ကၠ့ (ဘေဂျင်းမြို့) တရူးကမျၢၫ်တၫ်ဘံၣ်တၫ်ဘၢကိတိာ် (တရုတ်ပြည်သူ့လုံခြုံရေးဝန်ကြီး)ဒီး သုးကီၣ်ကး တၫ်ပၢဆှၢရဲၣ်ကျဲၤ ပှၤကညီတၫ်နုာ်လီၤဟးထီၣ်ကိတိာ်(ပြည်ထဲရေးဝန်ကြီး) သုးခိၣ်ကျၢၫ်ဒိၣ်စိယၣ်ပၠံး ထံၣ်လိာ်သးအကတီၫ် ကီၫ်ပယီၤကီၫ်ဆၢ ကၠါဖၠး(ကျားဖြန့်) တၫ်ဖံးတၫ်မၤတဖၣ်ပာ်ဃုာ် တၫ်မၤကမၣ်ကွီၫ်မ့ၣ်တၫ်ဖံးတၫ်မၤတဖၣ် တၫ်ကဒုးဖျိးကွံာ်အဂီၫ် တရူး ဟ့ၣ်ကီၫ်ပယီၤ တၫ်ဆီၣ်သနံးအိၣ်၀ဲလီၤ.
Uinque Identity (UID) Card န့ၣ် ကီၫ်ပယီၤ မ့ၫ်တၫ်ပၢဆှၢရဲၣ်ကျဲၤ ပှၤကညီတၫ်နုာ်လီၤဟးထီၣ်(လူဝင်မှုကြီးကြပ်ရေး) ဒီးကမျၢၫ်ဂံၫ်ဘါကိတိာ်၀ဲၤကျိၤ(ပြည်သူ့အင်အားဝန်ကြီးဌာန) ရဲၣ်ကျဲၤ၀ဲ တၫ်အုၣ်ကီၤကးဒ် လၢအနီၫ်ဂံၫ်ပာ်ဃုာ် (၁၀) ဖျၢၣ်၀ံၤ မ့ၫ်သနူ(စနစ်)တခါလၢ မၤနီၣ်ဃာ် ပှၤလၢစိာ်၀ဲ အနီၫ်ကစၫ်တၫ်ဂ့ၫ်တၫ်ကျိၤဒီး တၫ်မၤနီၣ်မၤဃါတဖၣ်န့ၣ်လီၤ.
UID Card အံၤန့ၣ် ပှၤကီၫ်ပယီၤဖိလၢသးနံၣ်အိၣ်(၁၀)နံၣ်တဖၣ်တကးဘၣ် ပှၤထံဂုၤကီၫ်ဂၤဖိလၢအိၣ်ဖဲကီၫ်ပယီၤပူၤထီဘိဒီး ဟ့ၣ်ခိသွဲတဖၣ်, ပှၤလၢအိၣ်ထီဘိတဖၣ်(အမြဲတမ်းနေထိုင်သူ)ဒီး ပှၤလၢ ဒိးကဲထီၣ်အသးလၢပှၤကီၫ်ပယီၤဖိတဖၣ်(မြန်မာနိုင်ငံသားခံယူသူများ) တၫ်ထုးထီၣ်န့ၫ်၀ဲလီၤ.
ref:salweenpress
