လါအ့ဖြ့ၣ်(၃၀)သီ, ၂၀၂၄နံၣ်
ဖဲ ၂၀၂၄နံၣ်,လါအ့ဖြ့ၣ်(၂၈)သီအနံၤ, ဟါ(၁၁)နၣ်ရံၣ်ဘျဲၣ်အဆၢကတီၫ် သုးကီၣ်ကး ကဘီယူၤလဲၤခးလီၤတၫ်ဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူသထူၣ်(သထုံခရိုင်), ကီၫ်ဆၣ်တီၣ်ပူၤ(ဘီးလင်း), တဂ့ၤလီသ၀ီပူၤအဃိ တီၤခၢၣ်သးကၠိ တၫ်သူၣ်ထီၣ်(၃)ဖျၢၣ်ဒီး ဟံၣ်ဃီ(၁)ဖျၢၣ်ပာ်ဃုာ် တၫ်သူၣ်ထီၣ်(၃)ဖျၢၣ်ဟးဂီၤကွံာ်၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲ ဖဲလါအ့ဖြ့ၣ်(၂၉)သီအနံၤန့ၣ်လီၤ.
လါအ့ဖြ့ၣ်(၂၈)သီအနံၤ, ဟါ(၁၁)နၣ်ရံၣ်ဘျဲၣ်အဆၢကတီၫ် သုးကီၣ်ကး ဟဲခးလီၤကျိဖးဒိၣ်(၂)ဖျၢၣ် လၢကလံၤကျါအဃိ ကျိဖးဒိၣ်(၁)ဖျၢၣ် လဲၤလီၤတဲာ်ပိာ်ဖးထီၣ်၀ဲဒၣ်ဖဲ တီၤခၢၣ်သးကၠိကရၢၫ်ပူၤ၀ံၤ ကၠိတၫ်သူၣ်ထီၣ်(၃)ဖျၢၣ် ဟးဂီၤကွံာ်၀ဲန့ၣ်လီၤ.
တကးဘၣ် တဂ့ၤလီသ၀ီဖိ ရ့ၣ်နီၣ်သိကျး, တၫ်ဘှီမီၣ်တီၣ်တုာ်ကျး ဒီးကမျၢၫ်အိၣ်ဟံၣ်(၁)ဖျၢၣ်စ့ၫ်ကီး ကျိဖးဒိၣ်အက့အခီဘၣ်ဒီး ဟးဂီၤကွံာ်၀ဲအဂ့ၫ် ပာ်ဖျါဃာ်၀ဲန့ၣ်လီၤ.
ဖဲအပူၤကွံာ်လါမးၡး(၂၃)သီအနံၤစ့ၫ်ကီး သုးကီၣ်ကးလဲၤခးလီၤတၫ်လၢကလံၤကျါ ဖဲဃီဖိပျဲၫ်သ၀ီ(မင်းစောရွာ)ပူၤအဃိ ဃီဖိပျဲၫ်သ၀ီ, ကၠိတၫ်သူၣ်ထီၣ်တဖၣ်ဒီးဟံၣ်ဃီတဖၣ် ဟးဂီၤကွံာ်၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ သုးကီၣ်ကးအံၤ တၫ်ဒုးတၫ်ယၤတအိၣ်၀ဲဘၣ်ဆၣ် ပညိၣ်ဒုးလီၫ်က၀ီၤကမျၢၫ်တဖၣ်တကးဒံးဘၣ် ပညိၣ်ဒုး၀ဲစ့ၫ်ကီးကၠိတဖၣ်အဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲန့ၣ်လီၤ.
