လါအ့ဖြ့ၣ်(၂၅)သီ, ၂၀၂၄နံၣ်
ကီၫ်စဲၣ်ခၠီ(ချင်းပြည်နယ်) လၢပှၤခရံာ်ဖိအိၣ်အါတၫ်လီၫ်, ၀့ၫ်ဟါခါ(ဟါးခါးမြို့), မၠိးသံးက၀ီၤဒ့(မြို့သစ်ရပ်ကွက်)အပူၤ စးထီၣ်ဖဲလါအ့ဖြ့ၣ်(၂၂)သီနံၤန့ၣ် တၫ်ကကးတံာ်ကွံာ် တၫ်ဆါတၫ်ပှ့ၤကျးအဂီၫ်ဒီး သရိာ်ပူၤပှၤသုတအိၣ်ဖှိၣ်ရိဖှိၣ်အါန့ၫ် (၅)ဂၤတဂ့ၤအဂီၫ် သုးကီၣ်ကး ထုးထီၣ်တၫ်ကလုၫ်၀ံၤ မၤဃံးထီၣ်၀ဲအဂ့ၫ် ပှၤ၀့ၫ်ဖိဖဲန့ၣ်တဖၣ်တဲ၀ဲလီၤ.
ဖဲလါအ့ဖြ့ၣ်(၁၂)သီနံၤ ဂီၤ(၉)နၣ်ရံၣ်ဘျဲၣ်အကတီၫ် CDF အသုးတဖၣ် ဟံးန့ၫ်တၫ်ဒီသဒၢလၢ မၠိးသံးက၀ီၤဒ့ (မြို့သစ်ရပ် ကွက်)အံၤ ဟံၣ်,ကျးဒီး သရိာ်တဖၣ်၀ံၤ ခး၀ဲသုးကီၣ်ကး အသိလ့ၣ်ကျိၤဒီး ခိၣ်နၫ် ဒိၣ်ထီတနီၤ ဘၣ်ဒိဘၣ်ထံးအဃိ ထုးထီၣ်တၫ်ကလုၫ်ဒ်သိးအံၤန့ၣ်လီၤ. တၫ်ကလုၫ်အံၤတုၤလၢ လါယူၤအသီ(၂၀) အနံၤ၀ံၤ တၫ်မ့ၫ်တလူၤပိာ်ထွဲဘၣ်န့ၣ် တၫ်ကဟံးန့ၫ် ဂ့ၫ်၀ီတုၤလီၤတီၤလီၤလီၤ.
မၠိးသံးက၀ီၤဒ့အံၤ အိၣ်၀ဲဒၣ်ဖဲ သုးကီၣ်ကးကီၫ်စဲၣ်၀ဲၤဒၢး(ပြည်နယ်စစ်ကောင်စီရုံး)ဒီး ကိတိာ် ဟံၣ်ဃီအိၣ်တၫ်လီၫ်(ဝန်ကြီးအိမ်ရာ) အဘၢၣ်စၢၤ၀ံၤ သုးကီၣ်ကးတဖၣ် မ့ၫ်လဲၤထီၣ်က့ၤလီၤ၀ဲၤဒၢးန့ၣ် ဘၣ်ခီဂာ်၀ဲက၀ီၤဒ့အံၤလီၤ. ၀့ၫ်ဟါခါ(ဟါးခါးမြို့)ပူၤ ခရံာ်ဖိတၫ်ဘါယွၤသရိာ် အိၣ်၀ဲ (၆၄)ဖျၢၣ်၀ံၤ မၠိးသံးက၀ီၤဒ့ပူၤ သရိာ်(၁၄)ဖျၢၣ်တခီ တၫ်တဟ့ၣ်တၫ်ပျဲလၢ အိၣ်ဖှိၣ်ရိၣ်ဖှိၣ်အါန့ၫ်ပှၤ(၅)ဂၤဘၣ်. ကျးလၢဘၣ်တၫ်ကးတံာ်ကွံာ်အိၣ်၀ဲ အဖျၢၣ်(၃၀)ဘျဲၣ်ဃၣ်ဃၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
သုးကီၣ်ကး အတၫ်ကလုၫ်အံၤအဃိ လီၫ်က၀ီၤကမျၢၫ် အမုာ်ကျိၤ၀ဲၤကွာ်(စီးပွါးရေး) ဘၣ်ဒိဘၣ်ထံးအသိး မုၫ်အိၣ်ဘှံးနံၤ ပှၤခရံာ်ဖိလၢကလဲၤထီၣ်သရိာ်တဖၣ်အဂီၫ်စ့ၫ်ကီး ကဲထီၣ်တၫ်ကီတၫ်ခဲအဂ့ၫ် လီၫ်က၀ီၤဖိတဖၣ် တဲ၀ဲလီၤ.
တၫ်တြီဃာ်လၢ သရိာ်ပူၤ ပှၤတဘၣ်အိၣ်ဖှိၣ်ရိဖှိၣ်ဘၣ်န့ၣ် မ့ၫ်တၫ်မၤကမၣ် တၫ်ဘူၣ်တၫ်ဘါတၫ်သဘျ့ခွဲးယာ် (လွတ်လပ်စွာ ကိုးကွယ်ပိုင်ခွင့်)အဂ့ၫ် ခၠီပှၤဂ့ၫ်၀ီခွဲးယာ်ကရၢ(ချင်းလူ့အခွင့်အရေးအဖွဲ့)ပှၤဘၣ်မူဘၣ်ဒါ ဆလဲမၣ် ဟရဲလယၣ် (ဆလိုင်းမန်ဟရဲလျန်) တဲ၀ဲလီၤ. ဟါခါတၫ်ဒုးကဲထီၣ်အဃိ တၫ်ဘူၣ်တၫ်ဘါတၫ်သူၣ်ထီၣ်တဖၣ် မၢတၫ်ကးတံာ်ကွံာ်, သရိာ်ပူၤတဟ့ၣ်ခွဲး လၢပှၤကအိၣ်ဖှိၣ်ရိဖှိၣ် အါန့ၫ်(၅)ဂၤဘၣ်တဖၣ်န့ၣ် မ့ၫ်တၫ်မၤကမၣ်၀ဲ တၫ်ဘူၣ်တၫ်ဘါခွဲးယာ်သဘျ့တဖၣ်အဂ့ၫ် တဲ၀ဲလီၤ.
CDF ဟါခါတဖၣ်တခီ ဖဲလါအ့ဖြ့ၣ်(၁၂)သီနံၤ မၠိးသံးက၀ီၤဒ့ပူၤ သုးကီၣ်ကး အကိတိာ်ပာ်ဃုာ်သိလ့ၣ်ကျိၤန့ၣ် ခး၀ဲ၀ံၤ ကိတိာ်(၃)ဂၤပာ်ဃုာ် ပှၤ(၆)ဂၤလၢသိလ့ၣ်ပူၤ ဘၣ်ဒိ၀ဲအဂ့ၫ် ပာ်ဖျါဃာ်၀ဲလီၤ.
ref:rfa
