လါအ့ဖြ့ၣ်(၂၄)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၁), ကီၫ်ရ့ၣ်ဒူသထူၣ်, ကီၫ်ဆၣ်ကၠဲးထိၣ်(ကျိုက်ထိုမြို့နယ်) စှၤသီအတီၫ်ပူၤတၫ်မၤသံအီၤတဖၣ်အိၣ်အါထီၣ်၀ံၤ ပှၤလၢတၫ်မၤသံအီၤအါတက့ၫ်န့ၣ်မ့ၫ် ဒူသ၀ီပၢပြး(ရပ်ရွာအုပ်ချုပ်ရေး)ခိၣ်နၫ်တဖၣ်အဂ့ၫ် တၫ်သ့ၣ်ညါဘၣ်လၢ လီၫ်က၀ီၤပှၤတ၀ၢတၫ်မၤစၢၤကရၢ(လူမှုကူညီရေးအသင်း)တဖၣ်အအိၣ်န့ၣ်လီၤ.
“လါအ့ဖြ့ၣ် ၂၃သီအနံၤ, ဟါ(၇)နၣ်ရံၣ်ဃၣ်ဃၣ်ကတီၫ် ကီၫ်ဆၣ်ကၠဲးထိၣ်, ကီးထ့ၣ်သ၀ီပၢပြးခိၣ်နၫ်တၫ်မၤသံအီၤလီၤ. အူ၀့အီၣ်(ဦးဝင်းအောင်)သးနံၣ် (၆၂)နံၣ်အံၤ အိၣ်လၢအဟံၣ်ပူၤကတီၫ် ပှၤခံဂၤလၢတၫ်တသ့ၣ်ညါအီၤတဖၣ် ခးသံအီၤန့ၣ်လီၤ” အဂ့ၫ် ပှၤမၤစၢၤတၫ်ဖိတဂၤ စံး၀ဲန့ၣ်လီၤ. ဘၣ်ထွဲဒီးတၫ်ကဲထီၣ်သးအဖီခိၣ် ကီၫ်ဆၣ်ကၠဲးထိၣ်ပၢၤကီၫ်၀ဲၤဒၢး(ကျိူက်ထိုမြို့နယ်ရဲတပ်ဖွဲ့ရုံး) လိာ်ကွီၫ်ဃာ်၀ဲ(အမူဖွင့်ပြီး)ဒီး မၤ၀ဲတၫ်သမံသမိးအဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ် လါအ့ဖြ့ၣ်(၁၉)သီအနံၤ, ဂီၤ(၁၀)နၣ်ရံၣ်ဃၣ်ဃၣ်ဆၢကတီၫ်စ့ၫ်ကီး ကီၫ်ဆၣ်ကၠဲးထိၣ်, ၀ါဒဲးကွ့သ၀ီ(ဝါးဒတ်ကွင်း) အူအီၣ်စီၣ်အူ(ခ)ဖိလိ (ဦးအောင်ဇော်ဦး(ခ)ဖိုးလုံး) သးနံၣ်(၅၇)နံၣ်အံၤ ဖဲလၢအဆ့ၣ်နီၤအီလၣ်ဖးထံဖဲ သ၀ီလၣ်ဖးထံကျးကတီၫ် ပှၤခံဂၤလၢတၫ်တသ့ၣ်ညါဘၣ်အမံၤ ဟဲခးသံ၀ဲလၢ မီၫ်တီၣ်တုၤန့ၣ်လီၤ.
လါအ့ဖြ့ၣ်(၁၈)သီအနံၤ, ဂီၤ(၆)နၣ်ရံၣ်ဃၣ်ဃၣ်အဆၢကတီၫ် ကီၫ်ဆၣ်ကၠဲးထိၣ်, ကလံၤစိးက၀ီၤဒ့အိၣ် ဟံၣ်(၁၀၀)ဖျၢၣ်အိၣ် အူအီၣ်ကၠီၣ်(ဦးအောင်ကျော်) သးနံၣ်(၄၂)နံၣ်စ့ၫ်ကီး အိၣ်၀ဲဖဲအဟံၣ်ကတီၫ် ပှၤတဂၤလၢတၫ်တသ့ၣ်ညါအီၤအမံၤ ဟဲခးသံ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
တနံၤဃီဖဲ ဟါကတီၫ်, မူးဒိၣ် ဖယနဲၣ်လိၣ်သ၀ီအိၣ် သ၀ီပၢပြးခိၣ်နၫ်လၢအမ့ၫ် အူနၢၤမိၣ်စီနွဲၣ်(ဦးနိုင်မွန်စောနွယ်)အဖိခွါ သးနံၣ်အိၣ်(၁၂)နံၣ်, မီၣ်မ့သဲးနဲၣ်(မောင်မင်းသက်နိုင်)စ့ၫ်ကီး ပှၤဖီၣ်စုက၀ဲၤကရၢလၢ တၫ်တသ့ၣ်ညါအီၤအမံၤ ဟဲခးသံ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ဒ်န့ၣ်အသိး လါအ့ဖြ့ၣ်(၁၈)သီအနံၤ, ဂီၤ(၇)နၣ်ရံၣ် (၃၀)မံးနံးဃၣ်ဃၣ်အဆၢကတီၫ်စ့ၫ်ကီး ကီၫ်ဆၣ်တီၣ်ပူၤ(ဘံလ့)(ဘီးလင်းမြို့နယ်), နးကၠံသ၀ီပၢပြးခိၣ် အူတ့ၣ်ည့(ဦးတင်ငြိမ်း) သးနံၣ်အိၣ်(၅၈)နံၣ် စ့ၫ်ကီးတၫ်ခးသံအီၤန့ၣ်လီၤ.
တကးဘၣ် ဖဲအပူၤကွံာ် လါမးၡး(၂၁)သီအနံၤ တုၤ(၂၄)သီအနံၤ(၃)သီအတီၫ်ပူၤ ကီၫ်ရ့ၣ်ဒူသထူၣ်, ကီၫ်ဆၣ်သထူၣ်(သထုံမြို့နယ်)အပူၤ ပိာ်ခွါအစိာ်(၄)စိာ်လၢ တၫ်တသ့ၣ်ညါအီၤအမံၤတဖၣ် တၫ်ခးသံအီၤအဂ့ၫ် တၫ်သ့ၣ်ညါဘၣ်လၢ လီၫ်က၀ီၤတၫ်မၤစၢၤပှၤတ၀ၢကရၢ(လူမှုကူညီရေးအသင်း)တဖၣ် အအိၣ်န့ၣ်လီၤ.
လၢန့ၣ်အမဲာ်ညါ ဖဲအပူၤကွံာ် လါမးၡး(၁၇)သီအနံၤ, ကီၫ်ဆၣ်ယ့, ကၠိတတါသ၀ီဒီး စၣ်ပၠၣ်သ၀ီအဘၢၣ်စၢၤ ယ့-သၣ်ဖၠူၣ်စယးကျဲမုၫ်(ရေး-သံဖြူဇရပ်လမ်းမကြီး)အဖီခိၣ် တသီအတီၫ်ပူၤ တၫ်မၤသံပှၤကညီအိၣ်ထီၣ်(၂)ဘျီဒီး အစိာ်(၂)စိာ်လၢတၫ်တသ့ၣ်ညါအီၤတဖၣ် တၫ်ထံၣ်ဘၣ်၀ဲအဂ့ၫ် တၫ်သ့ၣ်ညါဘၣ်လၢလီၫ်က၀ီၤပှၤတ၀ၢတၫ်မၤစၢၤကရၢဖိတဂၤအအိၣ်န့ၣ်လီၤ.
လၢတၫ်န့ၣ်အဃိ ကီၫ်ရ့ၣ်ဒူသထူၣ်ဟီၣ်က၀ီၤ, စှၤသီအတီၫ်ပူၤ တၫ်မၤသံပှၤကညီတဖၣ်အိၣ်အါထီၣ်၀ဲ၀ံၤ ပှၤသံအိၣ်ထီၣ် အဂၤ(၁၀)ဆူအဖီခိၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
ref:vom
