လါအ့ဖြ့ၣ်(၂၄)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ရၤမတံဟီၣ်က၀ီၤဒီး ၀့ၫ်ရွှ့ၣ်ကိကိၣ်(ရွှေကုက္ကို)ဟီၣ်က၀ီၤအပူၤ (အိၣ်လဲတၫ်လံၣ်တၫ်လီ)တရူးကဲကၠါဖၠး(တရုတ်ဂိုဏ်းကျားဖြန့်) (ကိး) အိၣ်လဲတၫ်လံၣ်တၫ်လီတၫ်ဖံးတၫ်မၤလၢ အိၣ်အဒၢစ့ၣ်တဖၣ်အပူၤ ပှၤလၢပာ်ဃုာ်အရ့ဒိၣ်ကတၢၫ်မ့ၫ် ကညီကီၫ်စဲၣ်သုးခိးကီၫ်ဆၢ BGFခိၣ်နၫ်(၃)ဂၤအဂ့ၫ် United States Institute of Peace (USIP) စံး၀ဲန့ၣ်လီၤ.
ဖဲလၢခိၣ်နၫ်(၃)ဂၤအကျါ BGF/KNAအခိၣ် သုးခိၣ်ဒိၣ်စိစီၤခၠံးသူၣ်(စောချစ်သူ), သုးခိၣ်ဒိၣ်ဂီၫ်ဂ့ၫ်စီၤမိးသိၣ်(မုတ်သုံ)ဒီး သုးခိၣ်ဒိၣ်ဖိတ့၀့ၣ်(တင်ဝင်း)တဖၣ် ပာ်ဃုာ်၀ဲအဂ့ၫ် အမဲရကၤအိၣ်သူၣ်လီၤ USIP ကွဲးဖျါဃာ်၀ဲန့ၣ်လီၤ. အ၀ဲသ့ၣ်တဖၣ်အံၤ တရူးကွီၫ်မ့ၣ်ကဲကၠါဖၠးတၫ်ဖံးတၫ်မၤအဂီၫ် လီမ့ၣ်အူကဒိးန့ၫ်ဘၣ်အဂီၫ်ဒီး အ့ထၢၣ်နဲးကန့ၫ်ဘၣ်လၢကီၫ်ကၠီၣ်တဲၣ်အဂီၫ် ပှၤလၢကတဲာ်ကတီၤမၤန့ၫ်အီၤတၫ်တဖၣ်အဂ့ၫ် ဖဲလါအ့ဖြ့ၣ် ၂၂သီအနံၤ, USIP ကွဲးဖျါဃာ်၀ဲဖဲ တၫ်ကစီၣ်ထီရီၤအပူၤန့ၣ်လီၤ.
သုးခိၣ်ဒိၣ်စိစီၤခၠံးသူၣ်(စောချစ်သူ)ဒီး သုးခိၣ်ဒိဖိတ့ၣ်၀့အံၤ (အိၣ်လဲတၫ်လံတၫ်လီ)ကၠါဖၠးတၫ်ဖံးတၫ်မၤအဂီၫ် မ့ၫ်ပှၤတဖၣ်လၢ တူၫ်လိာ်ပာ်လီၤတၫ်လီၫ်တၫ်ကျဲ(လက်ခံနေရာချ), ဟံးန့ၫ်တၫ်ဘံၣ်တၫ်ဘၢတၫ်ဒီသဒၢ(လုံခြုံရေးကာကွယ်ပေး)ဒီး ဟ့ၣ်တၫ်မၤစၢၤအဂုၤအဂၤတဖၣ်၀ံၤ ဒိးဘၣ်၀ဲတၫ်ဘျုးတၫ်ဖှိၣ်လၢ ၀့ၫ်ရၤမတံဒီး ၀့ၫ်ရွ့ၣ်ကိကိၣ်ဟီၣ်က၀ီၤအပူၤ ကၠါဖၠးတၫ်မၤလီၫ်လၢအမ့ၫ် Jinxin, Hengsheng, ဒီး Dongfanghuiတဖၣ်အပူၤအဂ့ၫ်စံး၀ဲန့ၣ်လီၤ. အိၣ်လဲတၫ်လံတၫ်လီကၠါဖၠးတၫ်ဖံးတၫ်မၤတဖၣ်အံၤ အပူၤကွံာ်ကိကးသုးခိးကီၫ်ဆၢ Kokang BGF Fully Light Groupကရၢ မၤ၀ဲအဂ့ၫ် USIPစံး၀ဲန့ၣ်လီၤ.
မ့မ့ၫ်လၢ သုးခိၣ်ဒိၣ်ဂီၫ်ဂ့ၫ်စီၤမိးသိၣ် အတၫ်ပၢဆှၢရဲၣ်ကျဲၤအဖီလာ်တခီ Wan Kuok-Koi’s (aka Broken Tooth) Dongmei Zone ကၠါဖၠးတၫ်ဖံးတၫ်မၤတၫ်မၤလီၫ်တဖၣ်အိၣ်၀ဲအဂ့ၫ်စံး၀ဲန့ၣ်လီၤ. တကးဘၣ်သုးခိၣ်ဂီၫ်ဂ့ၫ်စီၤမိးသိၣ်အံၤ ပာ်ဃုာ်ဘၣ်ထွဲ၀ဲလၢ KK Part Project အပူၤအဂ့ၫ်စ့ၫ်ကီးစံး၀ဲန့ၣ်လီၤ.
ကညီကီၫ်စဲၣ်ဟီၣ်က၀ီၤ, ကၠါဖၠးအိၣ်လဲတၫ်လံၣ်တၫ်လီတၫ်ဖံးတၫ်မၤတၫ်မၤအါတက့ၫ်အံၤ အိၣ်၀ဲဒၣ်ဖဲသုးခိၣ်ဒိၣ်စိစီၤခၠံးသူၣ်တၫ်ပၢဆှၢရဲၣ်ကျဲၤဟီၣ်က၀ီၤပူၤန့ၣ်လီၤ. စီၤခၠံးသူၣ်အံၤ KNU လၢအဒုး၀ဲ ကညီကလုာ်နီၫ်ကစၫ်ပၢဆှၢရဲၣ်ကျဲၤခွဲးယာ်ကအိၣ်ထီၣ်အဂီၫ်ဒီး ဒံၣ်မိၣ်ကရ့ၣ်စံၣ်ကန့ၫ်အဂီၫ်အဖီခိၣ် တပာ်လုၫ်ပာ်ပှ့ၤ၀ဲဘၣ်ဒီး အသးအိၣ်ဒၣ်ထဲလၢတၫ်ဘၣ်ဘျုးဘၣ်ဖှိၣ်ကအိၣ်လၢ တၫ်မၤကမၣ်ကွီၫ်မ့ၣ်တၫ်ဖံးတၫ်မၤတဖၣ်အပူၤအဂ့ၫ် USIP စံး၀ဲန့ၣ်လီၤ.
ကျိာ်စ့အဂံၫ်အဘါအိၣ်ဒီးအပှၤသုးဖိအဂံၫ်အဘါ(၈၀၀၀)ဘျဲၣ်အိၣ် KNA အခိၣ်စီၤခၠံးသူၣ်ပာ်ဃုာ်သုးကီၣ်ကးစ့ၫ်ကီးန့ၣ် တအဲၣ်ဒိးလၢ တၫ်ဒုးတၫ်ယၤတၫ်သဘံၣ်သဘုၣ်ကဲထီၣ်ဘၣ်အဂ့ၫ် USIP ပဲာ်ထံနီၤဖး၀ဲန့ၣ်လီၤ. BGF/KNA ရွ့ၣ်ကိကိၣ်တၫ်တိာ်ကျၢၤ(ရွှေကုက္ကိုစီမံကိန်း)အပူၤ ဒိးန့ၫ်ဘၣ်၀ဲအမဲရကၤစ့ ဒီလၣ်၁၉၂ကကွဲၫ် ကိးနံၣ်စ့တၫ်ဟဲနုာ်လီၤ(၅၀)မျးကယၤအံၤ သုးကီၣ်ကးစ့ၫ်ကီးဒိးန့ၫ်ဘၣ်၀ဲအအဂ့ၫ် စံး၀ဲန့ၣ်လီၤ.
တၫ်လၢကဲထီၣ်သးသ့တခါန့ၣ် ထံဂုၤကီၫ်ဂၤတခီ တၫ်ဒုးလီၤပှီၫ်ကၠါဖၠးတၫ်ဖံးတၫ်မၤ(ကျားဖြန့်နှိမ်နှင်းရေး)အပူၤ ထဲဒၣ်ကရၢလၢတၫ်ပာ်သးအိၣ် ကမၤစၢၤတၫ်အံၤ ကြၢးလၢတၫ်လဲၤတရံးက့ၤ ရၤမတံတၫ်ကူၣ်လဲၤမၤကၤတၫ်ဖံးတၫ်မၤအဂ့ၫ် USIP ဒုးနဲၣ်ဃာ်၀ဲန့ၣ်လီၤ. ထဲဒၣ် KNU ကရၢအံၤ မ့ၫ်ကရၢတဖုလၢ ကြၢးသိၣ်မှံကရၢတဖု (သင့်တော်တဲ့မဟာမိတ်အဖွဲ့)အဂ့ၫ် USIP စံး၀ဲန့ၣ်လီၤ.
တကးဘၣ် ယိၤဒိၣ်-တရူးကီၫ်ဆၢအပူၤ တၫ်မၤၡဲပျီကွံာ်ကၠါဖၠးတၫ်ဖံးတၫ်မၤတဖၣ်အသိး ကညီကီၫ်စဲၣ်ပူၤပှၤလၢမံၤဟူသၣ်ဖျါလၢ တၫ်မၤကမၣ်ကွီၫ်မ့ၣ်တဖၣ်စ့ၫ်ကီး တၫ်ကထုးထီၣ်တၫ်ဖီၣ်တၫ်ပျဲအဂီၫ် ကြၢးဆီၣ်တခူထီၣ်တရူးအဂ့ၫ် USIP စံး၀ဲန့ၣ်လီၤ.
USIPအံၤ မ့ၫ်ကရၢတဖုလၢအိၣ်သူၣ်လီၤအသးဖဲ ကီၫ်အမဲရကၤဒီး ဃုထံၣ်သ့ၣ်ညါဘၣ်ထွဲထံဂုၤကီၫ်ဂၤကျဲသနူ, တၫ်ဃိထံၣ်သ့ၣ်ညါတၫ်ဖံးတၫ်မၤ(သုတေသနလုပ်ငန်း), တၫ်သိၣ်လိဒီး ကွဲးဖျါထီၣ်တၫ်ပဲာ်ထံနီၤဖးတၫ်ကစီၣ်ထီရီၤတဖၣ်န့ၣ်လီၤ. ကညီကီၫ်စဲၣ်, ၀့ၫ်ရၤမတံဒီး ၀့ၫ်ရွ့ၣ်ကိကိၣ်ဟီၣ်က၀ီၤပူၤ ကၠါဖၠးအိၣ်လဲတၫ်လံၣ်တၫ်လီတၫ်ဖံးတၫ်မၤတဖၣ်, တၫ်ကူၣ်လဲၤမၤကၤပှၤကညီ, တၫ်မူၤတၫ်ဘှီးကသံၣ်ကသီဒီး ကၣ်စံၣ်နိၣ်တၫ်လိာ်ခိၣ်လိာ်ကွဲတၫ်ဖံးတၫ်မၤအဂ့ၫ်အကျိၤတဖၣ် ဃုထံၣ်မၤဖျါကွဲးဖျါထီၣ်၀ဲန့ၣ်လီၤ.
ref:salweenpress
