လါအ့ဖြ့ၣ်(၆)သီ, ၂၀၂၄နံၣ်
သ့ၣ်ခါညံၣ်နီၣ် သုးကီၣ်ကးခီၣ်ချ့သုးရ့ၣ်(စစ်ကောင်စီခြေမြန်တပ်ရင်း)(၃၇၅) ဒုးယၤသုးကလၢၤ လၢအိၣ်ဆီလီၤဃာ်အသးယံာ်(၆၅)နံၣ် ပာ်လီၤတၫ်စုက၀ဲၤ၀ံၤ သုးကီၣ်ကး လီၫ်လၤအိၣ်(၆၇)ဂၤပာ်ဃုာ်၀ဲအဂ့ၫ် KNU-ကညီဒီကလုာ်စၢဖှိၣ်ကရၢ ဘိးဘၣ်ပာ်ဖျါ၀ဲဖဲတနံၤအံၤ လါအ့ဖြ့ၣ်(၆)သီ ဟါခီအဆၢကတီၫ်န့ၣ်လီၤ.
သုးကီၣ်ကး မုၫ်ထီၣ်ကလံၤထံးသုး၀ဲၤလီၫ်ခိၣ်သ့ၣ်အစုတီၤဖီလာ် သ့ၣ်ခါညံၣ်နီၣ်(သင်္ဃန်းညီနောင်) ဒုးယၤသုးကလၢၤန့ၣ်ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး သိၣ်မှံၤသုးပာ်ဖှိၣ်တဖၣ် ဖဲမဟါလါအ့ဖြ့ၣ်(၅)သီနံၤမုၫ်ဃ့ၫ်လီၤ အကတီၫ် ထီၣ်ဒုးမၤန့ၫ်၀ဲ၀ံၤ သုးကီၣ်ကးအသုးဖိ ဒီးသုးဟံၣ်ဖိဃီဖိတဖၣ် ပာ်လီၤတၫ်စုက၀ဲၤန့ၣ်လီၤ.
သ့ၣ်ခါညံၣ်နီၣ်(သင်္ဃန်းညီနောင်)သုးကလၢၤ သုးကီၣ်ကးသုး ပာ်လီၤတၫ်စုက၀ဲၤအပူၤ သုးကီၣ်ကး လီၫ်လၤအိၣ်(၆၇)ဂၤ, ဒီးသုးဖိ(၄၁၀)ဂၤ, ပၢၤကီၫ်ပိာ်မုၣ်(ရဲမေ)(၅၉)ဂၤ, သုးဟံၣ်ဖိဃီဖိ (၈၁)ဂၤ ခဲလၢာ်ပာ်ဖှိၣ်(၆၁၇)ဂၤ ပာ်လီၤတၫ်စုက၀ဲၤန့ၣ်လီၤ.
ဖဲကညီဒီကလုာ်တၫ်ထူၣ်ဖျဲးသုးမုၫ်ဒိၣ်ဒီး သိၣ်မှံၤသုးပာ်ဖှိၣ်တဖၣ် ထီၣ်ဒုးမၤန့ၫ်သ့ၣ်ခါညံၣ်နီၣ်တၫ်တိာ်ကူၣ်ကျဲၤ သုးကလၢၤအကတီၫ် ဒိးန့ၫ်တၫ်စုက၀ဲၤဒီး ကျိချံပှာ်သၣ်အါအါဂီၫ်ဂီၫ်န့ၣ်လီၤ.
လၢ(၁၉၆၈)နံၣ်လံၤလံၤ သ့ၣ်ခါညံၣ်နီၣ်(သင်္ဃန်းညီနောင်) ဒုးယၤသုးကလၢၤ ဟဲအိၣ်ဆီလီၤဃာ်သးအဃိ ဘၣ်ဒိဘၣ်ထံး၀ဲလီၫ်က၀ီၤကညီဖိ အမုာ်ကျိၤ၀ဲၤကွာ်(စီးပွားရေး), တၫ်ကူၣ်ဘၣ်ကူၣ်သ့, ပှၤဂ့ၫ်၀ီ(လူမှုရေး)တဖၣ်၀ံၤ ကမျၢၫ်ထံဖိ ကီၫ်ဖိတဖၣ် တၫ်ဘံၣ်တၫ်ဘၢအဂီၫ်ဘၣ်အိၣ်လၢတၫ်ပျံၤတၫ်ဖုးအဂ့ၫ် KNU အတၫ်ဘိးဘၣ်ရၤလီၤအပူၤပာ်ဖျါ၀ဲလီၤ.
