လါအ့ဖြ့ၣ်(၅)သီ, ၂၀၂၄နံၣ်
ကညီကီၫ်စဲၣ်, ၀့ၫ်ရၤမတံ(မြဝတီမြို့) ဖဲကၠီၣ်တဲၣ်-ပယီၤတၫ်ရ့လိာ်တိၤတြဲၤ (ချစ်ကြည်ရေးတံတားဂိတ်)န့ၣ် သုးကီၣ်ကးအစုတီၤဖီလာ် ပ့ၫ်ဆှါ၀ဲၤကျိၤ ခိၣ်နၫ်ဒိၣ်ထီတဂၤ ဖဲလါအ့ဖြ့ၣ် (၄)သီနံၤန့ၣ် ဟဲဆ့ၣ်နီၤလၢ၀ဲၤဒၢးအဂ့ၫ် တၫ်သ့ၣ်ညါဘၣ်လီၤ.
ပှၤလၢကလဲၤဆူ ကီၫ်ကၠီၣ်တဲၣ်တကပၤ ဘၣ်တၫ်သမံသမိးအီၤ၀ံၤ ပှၤလၢဘျးစဲဒီး ထံရူၫ်ကီၫ်သဲး တၫ်ဘျၢအဆၢဖိ(နိုင်ငံရေးပုဒ်မ) ၅၀၅(က) တၫ်မၤနီၣ်အိၣ်(၂)ဂၤ ဘၣ်တၫ်ဖီၣ်အီၤအဂ့ၫ် တၫ်သ့ၣ်ညါဘၣ်လၢ ပှၤလၢလဲၤမၤအါထီၣ် တၫ်ခီတိၤလံာ်တၫ်ပျဲအသးသမူတဖၣ်(တံတားကူးလက်မှတ်သွားရောက်သက်တမ်းတိုးသူ) အိၣ်န့ၣ်လီၤ.
လၢကတီၫ်အံၤ ကီၫ်ပယီၤပူၤ ထံရူၫ်ကီၫ်သဲးတဂၢၫ်တကျၢၤ, ၀့ၫ်ရၤမတံကပၤ သုးကီၣ်ကးဒီး တၫ်ပၢၫ်ဆၢသုးပာ်ဖှိၣ်တဖၣ် အဘၢၣ်စၢၤ တၫ်ဒုးဆူၣ်ထီၣ်အဖီခိၣ် လီၫ်က၀ီၤဖိအါတက့ၫ် အဲၣ်ဒိးလဲၤအိၣ်ကဒုလၢ ကီၫ်ကၠီၣ်တဲၣ် ၀့ၫ်မဲဆီး(မဲဆောက်မြို့)အဃိ တၫ်မၤတၫ်ခီတိၤလံာ်တၫ်ပျဲ (တံတားကူးလက်မှတ်) အါထီၣ်အဃိ သုးကီၣ်ကးတကပၤ မၤတၫ်သမံသမိးဒ်သိးအံၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“အပူၤကွံာ် တသံကွၫ်ပံးပူး(ရစ်)တၫ်ဒ်သိးအံၤဘၣ်. အခဲအံၤမၤ၀ဲလီၤ. ဘၣ်မနုၤအဃိလဲၣ်န့ၣ် သုးကီၣ်ကး ပ့ၣ်ဆှါခိၣ်နၫ်ဒိၣ်ထီ(စအဖအရာရှိ)တဂၤ ဟဲဆ့ၣ်နီၤလၢ၀ဲၤဒၢးလီၤ. ပှၤလၢဟဲမၤအါထီၣ် တၫ်ခီတိၤလံာ်တၫ်ပျဲ(တံတားကူးလက်မှတ်) ပိာ်ခွါ(၂)ဂၤ တဲ၀ဲလၢ ၅၀၅(က) တၫ်မၤနီၣ်အိၣ်အဃိ ဖီၣ်၀ဲဒီးတီၣ်ထီၣ်၀ဲဆူ သိလ့ၣ်ပူၤအဂ့ၫ်” ပှၤလၢထံၣ်၀ဲလၢအမဲာ်တဂၤ တဲ၀ဲလီၤ.
ပှၤ(၂)ဂၤလၢဘၣ်တၫ်ဖီၣ်အီၤတဖၣ် မ့ၫ်မတၤတဖၣ်လဲၣ်ဒီး လၢကတီၫ်အံၤ တၫ်ပာ်အီၤလၢတၫ်လီၫ်ဖဲလဲၣ်တခီ တၫ်တသ့ၣ်ညါဘၣ်လီၤတံၫ်ဒံးဘၣ်. ပှၤလၢအဲၣ်ဒိးလဲၤခီဆူ ၀့ၫ်မဲဆီးလၢဖိးသဲစးအပူၤတကပၤ (၇)သီ တၫ်ခီကီၫ်ဆၢ တိၤလံာ်တၫ်ပျဲ (တံတားကူးလက်မှတ်)န့ၣ် တၫ်ဘၣ်လဲၤထုး ထီၣ်အီၤဖဲ တၫ်ရ့လိာ်တိၤကပၤ ပယီၤပှၤကညီတၫ်နုာ်လီၤဟးထီၣ်၀ဲၤဒၢး(မြန်မာလူဝင်မှုကြီးကြပ်ရေးဌာန(လဝက)ရုံး)၀ံၤ လၢခံတဆီ တၫ်ဘၣ်လဲၤဟံးန့ၫ်ကဒီးဖဲ မဲဆီးတကပၤ ကၠီၣ်တဲၣ်ပှၤကညီတၫ်နုာ်လီၤဟးထီၣ်၀ဲၤဒၢး (မြန်မာလူဝင်မှုကြီးကြပ် ရေးဌာန(လဝက)ရုံး)အဂ့ၫ်န့ၣ်လီၤ.
သုးကီၣ်ကးတကပၤ ပှၤလၢလဲၤမၤတိၤလံာ်ပျဲတဖၣ်အကျါ ပိာ်ခွါလၢဘၣ်ဒုၣ်ဘၣ်ဒ့တဖၣ် ဖီၣ်၀ဲအိၣ်အဂ့ၫ် ပှၤတ၀ၢလံာ်ကဘျံးပၤ(လူမှုကွန်ရက်)ပူၤ တၫ်ကွဲးဖျါထီၣ်၀ဲအိၣ်ဘၣ်ဆၣ် တၫ်ပာ်ဂၢၫ်ပာ်ကျၢၤတန့ၫ်ဒံးဘၣ်.
Ref: CJ Platform
