လါမးရှး(၂၉)သီ, ၂၀၂၄နံၣ်
ကညီကီၫ်စဲၣ်, ၀့ၫ်ဖၣ်ပူၣ်န့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA)ဒီး သုးပာ်ဖှိၣ်တဖၣ် ပၢဆှၢဃာ်လံအဂ့ၫ် ဒီကလုာ်ဃူဖိးပဒိၣ် NUG အကလံၤထံးကီၫ်ခီ(တောင်ပိုင်းတိုင်း) နီၫ်ဂံၫ်(၂) ဘၣ်မူဘၣ်ဒါ ယဲဘီၣ်တ့ၣ်အူ တဲ၀ဲလီၤ.
“ပၢဆှၢဃာ် ၀့ၫ်ဖၣ်ပူၣ် ဒီတ၀့ၫ်န့ၫ်လံ. တမ့ၫ်လၢတၫ်ပၢဆှၢဃာ်တစိၤတလီၫ်ဘၣ်. ၀့ၫ်ပူၤ သုးကီၣ်ကးအသုး တအိၣ်လၢၤဘၣ်. သုးကီၣ်ကးတကပၤ ခးလီၤတၫ်လၢကလံၤကျါအဃိ ကမျၢၫ်တၫ်သံတၫ်ပှၫ် အိၣ်၀ဲအဂ့ၫ်” အူတ့ၣ်အူတဲ၀ဲလီၤ.
KNLA သုးဖိတဖၣ် ဟံးန့ၫ်ဃာ်တၫ်လီၫ်လၢ ၀့ၫ်ဖၣ်ပူၣ်ပူၤအဂ့ၫ် KNU-ကညီဒီကလုာ်စၢဖှိၣ်ကရၢ ပှၤတဲတၫ်ပၢ ပဒိၣ်စီၤကျၢၤစ့တဲ၀ဲလီၤ.
“မ့ၫ်ဒၣ်ဒ် ပသုးဂ့ၫ်၀ီ တၫ်ပညိၣ်အသိးလီၤ. သုးကီၣ်ကးအသုးကလၢၤခဲလၢာ် လၢအိၣ်ဖဲပဟီၣ်က၀ီၤတဖၣ် ကဒုးဖျိးကွံာ်အီၤအဂီၫ် မ့ၫ်တၫ်ဂ့ၫ်ခိၣ်သ့ၣ်န့ၣ်လီၤ. ဒ်တၫ်ပညိၣ်အသိး သုးကလၢၤလၢအိၣ်တဖၣ် လၢသုးဂ့ၫ်၀ီတကပၤ တၫ်လၢပကြၢးမၤတဖၣ်န့ၣ် ပမၤထွဲ၀ဲလီၤ. တကတီၫ်ဃီ လၢ၀့ၫ်ဖၣ်ပူၣ်ပူၤဒု ပသုးဖိတဖၣ် ဟံးန့ၫ်ဃာ်တၫ်လီၫ်အဂ့ၫ် တဲ၀ဲလီၤ.”
၀့ၫ်ဖၣ်ပူၣ်န့ၣ် မ့ၫ် KNU-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅)ဟူးဂဲၤဟီၣ်က၀ီၤအသိး သုးကီၣ်ကးအသုး တၫ်တိာ်ကူၣ်ကျဲၤ(စဗခ) အိၣ်တခါ၀ံၤ ခလရ(၁၉), ခမရ(၃၄၀), ခမရ(၃၄၁)ဒီး ခမရ (၄၃၄)သုးရ့ၣ်တဖၣ် အိၣ်စ့ၫ်ကီးန့ၣ်လီၤ.
စးထီၣ်ဖဲလါမးရှး(၁၉)သီနံၤ ၀့ၫ်ဖၣ်ပူၣ် ကလံၤထံး(တောင်ပိုင်း)တကပၤ မဲၫ်တရိ(မယ်တရိုး), ၀့ၣ်မိၣ် (ဝေမှုံ), တခိၣ်တဲၣ် (တံခွန်တိုင်)ကျဲလၢ သုးကီၣ်ကး အသုးကလၢၤတကပၤ လဲၤထီၣ်က့ၤလီၤသ့ခဲလၢာ် KNLA ဒီး သုးပာ်ဖှိၣ်တဖၣ် ကးတံာ်ဃာ်၀ဲအဂ့ၫ် KNU-သုးက့နီၫ်ဂံၫ်(၅) ဘိးဘၣ်ပာ်ဖျါဃာ်၀ဲလီၤ.
ဖဲလါမးရှး(၂၄)သီနံၤ သုးကီၣ်ကး ဟဲတ့ၫ်လီၤမ့ၣ်ပိၫ်လၢဒရိ(ဒရုန်း)တဖၣ်အဃိ ကမျၢၫ်(၃)ဂၤ ဘၣ်သံအသိး ကမျၢၫ်(၄၀၀)ဂၤဃၣ်ဃၣ် ဘၣ်ဃ့ၫ်ပူၤဖျဲးသးအဂ့ၫ် KNU-သုးက့နီၫ်ဂံၫ်(၅) ဘိးဘၣ်ပာ်ဖျါဃာ်၀ဲလီၤ.
Photo: KNU
