လါမးရှး(၂၈)သီ, ၂၀၂၄နံၣ်
ဖဲလါမးရှး(၂၇)သီ, ၂၀၂၄နံၣ်အနံၤ ဟါအကတီၫ် လၢန့ၣ်ပၠံၣ်တီၣ် သုးကီၣ်ကးမၤ၀ဲ (၇၉)၀ီတ၀ီ သုးမုၫ်ဒိၣ်မုၫ်နံၤပာ်ဖျါထီၣ်သုးဂံၫ်ဘါတၫ်ရဲၣ်တၫ်ကျဲၤပူၤ သုးရိၣ်မဲခိၣ်ကျၢၫ် မ့အီၣ်လဲၣ် တဲပာ်ဒ့ၣ်ပာ်ကမၣ်၀ဲလၢ ၂၀၂၀နံၣ် တၫ်ဃုထၢန့ၣ် တၫ်မၤကဘျံးကဘျၣ်တၫ်ဖး(မဲမသာမှု)အိၣ်အသိး လၢကတီၫ်အံၤ ထံကီၫ်တၫ်အိၣ်သးလၢကဲထီၣ်တဖၣ်အဖီခိၣ် ပာ်ဒ့ၣ်ပာ်ကမၣ်၀ဲ NUG, CRPH, PDFဒီး ကလုာ်ဒူၣ်ပၢၫ်ဆၢတၫ်ကရၢ(ERO)တနီၤန့ၣ်လီၤ.
တကးဘၣ်ဒ်ညီနုၫ်အသိး တဲ၀ဲလၢ တၫ်ကဘၣ်ဟံးဃာ်ပၢၤဃာ် တၫ်မၤမူဒါ(၃)ထံၣ်လၢအမ့ၫ် ကီၫ်စၢဖှိၣ်(ပြည်ထောင်စု)သုတလီၤပှီၫ်ကွံာ်အဂီၫ်, ကလုာ်ဒူၣ်တၫ်ဃူတၫ်ဖိး သုတလီၤပှီၫ်ကွံာ်အဂီၫ်ဒီး ထံကီၫ်တၫ်စိကမီၤကအိၣ်ဂၢၫ်ဆိးကျၢၫၤအဂီၫ်တဖၣ်န့ၣ်လီၤ.
တဲ၀ဲလၢကမျၢၫ်တၫ်ဘံၣ်တၫ်ဘၢ(ပြည်သူ့လုံခြုံရေး)ဒီး တၫ်ဒီသဒၢအဂီၫ်၀ံၤ ထဲတၫ်ကရၢကရိဒုးအိၣ်ထီၣ်ဂၢၤကီၫ်သုးန့ၣ် တမ့ၫ်တၫ်လၢတၫ်ပှဲၤဘၣ်ဒီး ဘၣ်ထွဲဒီး တၫ်မၤမူထီၣ်က့ၤ ကမျၢၫ်တၫ်ဘၣ်ကဲသုးတၫ်ဘျၢသဲစး(စစ်မှုထမ်းဥပဒေ) စ့ၫ်ကီး အတၫ်ကတိၤလီၤအပူၤ ဖၢနုာ်တဲဖျါ၀ဲလီၤ.
ဘၣ်ထွဲဒီးတၫ်ဃုထၢတၫ်ဂ့ၫ်န့ၣ် ကမၤ၀ဲလၢ PR သနူအဂ့ၫ် တဲပာ်ဂၢၫ်ပာ်ကျၢၤ၀ဲလီၤ. ၁၉၄၉နံၣ် တၫ်သဘျ့န့ၫ်၀ံၤအလီၫ်ခံ ထံလီၫ်ကီၫ်ပူၤတၫ်ဒုးတၫ်ယၤလၢ ဘၣ်အိၣ်ထီၣ်ဒီး တုၤလၢခဲကနံၤအံၤ တစိၤဘၣ်တစိၤသုးမုၫ်ဒိၣ်န့ၣ် ဒ်ကလုာ်ဂ့ၫ်၀ီမူဒါတခါအသိး ဘၣ်ဟံးထီၣ်ဖီၣ်ထီၣ်မူဒါအဂ့ၫ် ဒီသဒၢတဲန့ၫ်တၫ်လၢ တစိၤဘၣ်တစိၤ သုးဟံးန့ၫ်တၫ်စိတၫ်ကမီၤအဖီခိၣ်န့ၣ်လီၤ.
