လါမးရှး(၂၇)သီ, ၂၀၂၄နံၣ်
ဖဲလါမးရှး (၂၆)သီ, ၂၀၂၄နံၣ်အနံၤ ဟါ(၂)နၣ်ရံၣ်အဆၢကတီၫ် ပယီၤသုးကီၣ်ကးအကဘီယူၤဒုးသုး ဟဲခးလီၤတၫ်ဖဲ ဖၣ်ပူၣ်(ဖာပွန်)ဟီၣ်က၀ီၤပူၤဒီး တ့ၫ်လီၤမ့ၣ်ပိၫ်(၄)ဖျၢၣ်ဒီး တၫ်ဘၣ်ဒိဘၣ်ထံးအိၣ်ဒ်လဲၣ်တခီ တၫ်မၤလီၤတံၫ်တန့ၫ်ဒံးဘၣ်. တနံၤဃီအတီၫ်ပူၤ ပယီၤသုးကဘီယူၤဒြိ(ဒရုံး)တ့ၫ်လီၤ၀ဲ မ့ၣ်ပိၫ်(၄၀)ဖျၢၣ်ဆူ လူၤသီကီၫ်ဆၣ်(လူသောမြို့နယ်), ဘီသ့ၣ်ထၣ်ကရူၫ်(ဘောသေထာကျေးရွာအုပ်စု), နံဒိးထၣ်သ၀ီ (နီးဒိုထာ), တၤဒိၣ်ထၣ်သ၀ီ(တာဒိုထာ)ဒီး ထူၣ်မီဒၢ(ထူမောဒဲ)သ၀ီပူၤန့ၣ်လီၤ.
ဖဲလါမးရှး(၂၅)သီအနံၤ (၁၂း၁၂)နၣ်ရံၣ်အဆၢကတီၫ်စ့ၫ်ကီး သုးကီၣ်ကးအကဘီယူၤဒြိ လၢဟဲခးလီၤတၫ်ဖဲ မဲၤညူးကရူၫ်(မယ်ညုကျေးရွာအုပ်စု), ကျီထၣ်သ၀ီ(ကလောထာကျေးရွာ)ပူၤန့ၣ် ဘၣ်ဟးဂီၤသ၀ီဖိဟံၣ်(၄)ဖျၢၣ်, ဘၣ်သံဃုာ်၀ဲဆၣ်ဖိကီၫ်ဖိဒီး တၫ်ဖိတၫ်လံၤ ဘၣ်ဟးဂီၤ၀ဲန့ၣ်လီၤ. ကမျၢၫ်လၢအဟံၣ် ဘၣ်ဟးဂီၤတဖၣ်မ့ၫ်၀ဲ စီၤလၣ်အ့(စောလှအေး), ဘၣ်ဟးဂီၤ၀ဲအဒၢးဒူၣ်ခဲလၢာ်, ဘၣ်သံ၀ဲအထိးတဒုဒီး ထွံၣ်တဒု, စီၤနီၫ်တူး(စောနော်တု), ဘၣ်ဟးဂီၤ၀ဲအဟံၣ်ဒီတဖျၢၣ်, စီၤကၠီထူ(စောကျောထူး), ဘၣ်ဟးဂီၤ၀ဲအဒၢးကပၤ, စီၤလ့ၤအိ(စောလေအိုး), ဘၣ်ဟးဂီၤ၀ဲအဒၢခိၣ်ထး၀ါ, စီၤဖိသီ(စောဖိုးသော), ဘၣ်ဟးဂီၤ၀ဲအစဲးဂံၫ်ဘု(ဆန်စက်)တဖျၢၣ်, စီၤကၠီဘျုး(စောကျောဘလု), ဘၣ်သံအထိး(၂)ဒု, မဲၣ်တလဲး(၁)ဒုဒီး နီၫ်အဲးကလါ(နော်အဲကလား), ဘၣ်သံ မဲၣ်တလဲး တဒုန့ၣ်လီၤ.
တကတီၫ်ဃီ ဖဲမုၫ်ထူၣ်(၁၂း၁၅)တုၤ (၁၂း၄၆)နၣ်ရံၣ် အဆၢကတီၫ် သုးကီၫ်ကး အကဘီယူၤဒြိ တ့ၫ်လီၤမ့ၣ်ပိၫ်ဖဲ မဲၤကျီကရူၫ်(မယ်ကလောကျေးရွာအုပ်စု), ဘီးထၣ်သ၀ီ(ဘော့ထာကျေးရွာ)ဒီး ဘီသ့ၣ်ထၣ်ကရူၫ် (ဘောသေထာကျေးရွာအုပ်စု), နံဒိးထၣ်သ၀ီ(နီးဒိုထာကျေးရွာ)ခဲလၢာ်အိၣ်၀ဲ(၅) ဘျီဒီးတ့ၫ်လီၤမ့ၣ်ပိၫ် ခဲလၢာ်အိၣ်၀ဲ (၄၁)ဖျၢၣ်န့ၣ်လီၤ.
ဒ်န့ၣ်အသိးဖဲလါမးရှး(၂၄)သီ, ၂၀၂၄နံၣ်အနံၤ ဟါ(၅)နၣ်ရံၣ်အဆၢကတီၫ် သုးကီၣ်ကး အကဘီယူၤဒြိ တ့ၫ်လီၤမ့ၣ်ပိၫ်ဖဲ ဖၣ်ပူၣ်၀့ၫ်(ဖာပွန်မြို့)ပူၤဒီး ဘၣ်သံ၀ဲသ၀ီဖိ(၂)ဂၤဒီး ဘၣ်ဒိ၀ဲ(၁)ဂၤန့ၣ်လီၤ. သ၀ီဖိဘၣ်သံ(၂)ဂၤန့ၣ်မ့ၫ်၀ဲ စီၤမၠၣ်ခၠဲး(စောမြခြယ်), သးနံၣ်(၅၀)နံၣ်, ခၠိၤအ့(ချိုအေး), သးနံၣ်(၂)နံၣ်ဒီး ဘၣ်ဒိ၀ဲ(၁)ဂၤန့ၣ်မ့ၫ်၀ဲ အ့အ့ဖၠူၤ(အေးအေးဖြူ), သးနံၣ်(၃၈)နံၣ်, အစုမုၫ်ထီၣ်တဲာ်(၂)ဘိ ဘၣ်ဃုာ်၀ဲဒီး အစုဒုၣ်န့ၣ်လီၤ.
စးထီၣ်ဖဲ လါမးရှး(၂၄)သီတုၤ(၂၆)သီအနံၤ ခီဖျိလၢပယီၤသုးကီၣ်ကး အကဘီယူၤဒြိခးလီၤတၫ် ကိးမုၫ်နံၤဒဲးအဃိ လီၫ်က၀ီၤဖိလၢအိၣ်ဘူးဖဲန့ၣ်တဖၣ် ဟဲဃ့ၫ်ထီၣ်ကဒီးဆူ ဘီးသ့ၣ်ထၣ်ကရူၫ် (ဘောသေထာကျေးရွာအုပ်စု)ပူၤ ပှၤနီၫ်ဂံၫ်ခဲလၢာ်အိၣ်၀ဲ(၄၀၀)ဂၤဒီး ဟံၣ်ဃီအူအီၣ်ခဲလၢာ်အိၣ်၀ဲ (၃၅)ဖျၢၣ်လံန့ၣ်လီၤ.
Ref:KNU-MutrawNews
Photo:KNU-MutrawNews
