လါမးရှး(၂၇)သီ, ၂၀၂၄နံၣ်
ဖဲလါမးရှး(၂၆)သီ, ၂၀၂၄နံၣ်အနံၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တၫ်ဒီသဒၢ၀ဲၤကျိၤခိၣ် ပဒိၣ်စီၤဆၢဂ့ၤ ကတိၤဟ့ၣ်ဂံၫ်ဟ့ၣ်ဘါ၀ဲလၢ ကတီၫ်အံၤ အဲၣ်ကလုာ်ပၢၫ်ဆၢတၫ်ခိၣ်နၫ်သိၣ်ဒူသ့ၣ်တဖၣ် ဒ်သိးကအိၣ်ဃူအိၣ်ဖိးဒီး ဒ်သိးကတုၤဆူ တၫ်မၤနၢၤဖီတၢၣ်အိၣ်န့ၣ် တၫ်ဆၢကတီၫ်တုၤဃီၤလံလၢကဘၣ်ဒုးသကိးတၫ်ဃူဃူန့ၣ်လီၤ.
စးထီၣ်လၢကညီတၫ်ပၢၫ်ဆၢဘၣ်အိၣ်ထီၣ် ကညီကလုာ်သုးမုၫ်ဒိၣ်မ့ၫ်ဂ့ၤ, တၫ်ကရၢကရိမ့ၫ်ဂ့ၤ ဘၣ်လီၤမုၫ်လီၤဖး လၢကျဲအဘိဘိဒီး တၫ်အိၣ်သးကလုာ်ကလုာ်လၢဘၣ်ကွၫ်ဆၢၣ်မဲာ်တဖၣ် လဲၤခီဖျိ၀ဲလၢတၫ်မၤနၢၤအဃိ ကဟံးန့ၫ်တၫ်မၤလိဒီး အိၣ်ဆၢထၢၣ်ဂၢၫ်ကျၢၤလၢပှၤကလုာ်အဂီၫ်တဲသဆၣ်ထီၣ်၀ဲလီၤ.
ကညီကလုာ်တၫ်ပၢၫ်ဆၢသုးမုၫ်ဒိၣ် အတၫ်မုၫ်လၫ်ကွၫ်စိဖီတၢၣ်မ့ၫ်၀ဲ ကညီကလုာ်, ကီၫ်သူလ့ၤဒီး ကီၫ်စၢဖှိၣ်ပူၤ ကလုာ်ကိးကလုာ်ဒဲး ကဒိးန့ၫ်ဘၣ် ကလုာ်တၫ်တုၤသိးထဲသိးဒီး တၫ်စံၣ်ညီၣ်ပၢလီၤသးခွဲးယာ်တဖၣ်အဂီၫ် ကဂုာ်ကျဲးစၢးဒုးတၫ်အဂီၫ်တဲ၀ဲန့ၣ်လီၤ.
ဒ်ကညီကလုာ်ဃုာ်ဒီးကလုာ်ဒူၣ်ခဲလၢာ် အဖီတၢၣ်လၢမ့ၫ်၀ဲ တၫ်မုာ်တၫ်ခုၣ်ဒီးတၫ်သဘျ့အဂီၫ်, တၫ်ကသူၣ်ထီၣ် ခါဆူညါ ဖဲၣ်ဒရၢၣ်ဒံၣ်မိၣ်ကရ့ၣ်စံၣ် ကီၫ်စၢဖှိၣ်သီ(ဖယ်ဒရယ်ဒီမိုကရေစီပြည်ထောင်စုသစ်) လၢပှဲၤဒီးတၫ်မုာ်တၫ်ခုၣ်အဂီၫ်, ခိၣ်နၫ်သိၣ်ဒူလၢဟ့ၣ်လီၤတ့ၫ်သးသမူ, ကပၢၤက၀ါ, သွံၣ်ထံ, နီၫ်ခိက့ၫ်ဂီၤတဖၣ် ပာ်ပနီၣ်ပာ်လၤပာ်ကပီၤဒီး ဟ့ၣ်တၫ်ယူးယီၣ်န့ၣ်လီၤ.
အဲၣ်ကလုာ်ပၢၫ်ဆၢတၫ်ခိၣ်နၫ်သိၣ်ဒူတဖၣ် မ့ၫ်ပှၤဒီသဒၢန့ၫ်တၫ်လၢကညီဖိဒီး ထံဖိကီၫ်ဖိကမျၢၫ်တဖၣ်လၢ သုးမီၤစိရိၤ သုးအၢသုးသီသ့ၣ်တဖၣ် အတၫ်မၤအၢမၤသီ မၤတရီတပါ မၤဟးဂူာ်ဟးဂီၤ ပှၤဟီၣ်ခိၣ်ဖိခွဲးယာ်, တၫ်ထဲသိးတုၤသိး, တၫ်သဘျ့ဒီး တၫ်မ့ၫ်တၫ်အဃိ စံးဘျူးစံးဖှိၣ်ပာ်လုၫ်ပာ်ပှ့ၤဘၣ် အဲၣ်ကလုာ်ပၢၫ်ဆၢတၫ်ခိၣ်နၫ်သိၣ်ဒူတဖၣ်ဒီး လၢထံကီၫ်တၫ်စံၣ်စိၤတဲစိၤ အမ့ၫ်အတီအသီပူၤ ကအိၣ်ဒီးတၫ်အုၣ်ကီၤ ပာ်ပနီၣ်ကွဲးနီၣ်အဂ့ၫ် အတၫ်ကတိၤဟ့ၣ်ဂံၫ်ဟ့ၣ်ဘါအပူၤတဲ၀ဲလီၤ.
ခိၣ်နၫ်သိၣ်ဒူတဖၣ် အတၫ်ဂုာ်ကျဲးစၢး, ကွၫ်ဆၢၣ်မဲာ်တၫ်ကီတၫ်ခဲကျၢၤမုဆှုဒီး တၫ်သူၣ်ဒူသးဒူတဖၣ်န့ၣ် မ့ၫ်တၫ်သ့ၣ်တဖၣ်လၢမၤဖျါထီၣ် ထံဖိကီၫ်ဖိကမျၢၫ်ကိးဂၤအဘူၣ်အတီၫ် ဒ်သုမ့ၫ်ပှၤလၢအၢၣ်လီၤတ့ၫ်လံလၢ ထံကီၫ်ဒီးကလုာ်ဂီၫ်သ့ၣ်တဖၣ်အံၤ ကမ့ၫ်၀ဲတၫ်ကပီၤလၢလ့န့ၫ်ကျဲလၢ တၫ်ကသူၣ်ထီၣ် ထံကီၫ်သီလၢ တၫ်သဘျ့ဒီး တၫ်ထဲသိးတုၤသိးအဂီၫ်န့ၣ်လီၤ.
တၫ်ပၢၫ်ဆၢတၫ်ဖံးတၫ်မၤပူၤ ကဘၣ်အိၣ်ဒီး တၫ်သူၣ်ဆူၣ်သးဆူၣ်, တၫ်လူၤပိာ်မၤထွဲ တၫ်သိၣ်တၫ်ဘျၢတဖၣ်ဒီး ကယဲၫ်ခိၣ်နၫ်သိၣ်ဒူကိးဂၤ ကဘၣ်လူၤပိာ်မၤထွဲ၀ဲတၫ်သိၣ်တၫ်သီတဖၣ် တုၤလီၤတီၤလီၤအဂီၫ် ဟ့ၣ်ပလီၫ်၀ဲန့ၣ်လီၤ. လၢကျဲမ့ၫ်ကျဲတီအပူၤ ခါဆူညါ ကဒုးသကိး တၫ်လီၤအဂ့ၫ်န့ၣ် ဟ့ၣ်ဒုးသ့ၣ်ညါ၀ဲလီၤ. ဒ်န့ၣ်အသိး တၫ်သဘံၣ်သဘုၣ်အဃိ တၫ်ကဘၣ်ဒီသဒၢန့ၫ်တၫ်လၢ ထံဖိကီၫ်ဖိကမျၢၫ်တဖၣ်အဂီၫ်စ့ၫ်ကီးတဲ၀ဲလီၤ.
တၫ်ထီဒါကမျၢၫ်, တၫ်မၤဘၣ်ဒိသုးဂ့ၫ်၀ီတၫ်ဖံးတၫ်မၤတဖၣ် ကဘၣ်ဟးဆှဲး၀ဲဒီး ကလူၤပိာ်မၤထွဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ အထံရူၫ်ကီၫ်သဲး, ကျဲသနူတဖၣ်ဒီး ကညီကလုာ်တၫ်ထူၣ်ဖျဲးသုးမုၫ်ဒိၣ် တၫ်သိၣ်တၫ်ဘျၢ လၢတၫ်ကဘၣ်လူၤပိာ်မၤထွဲအီၤတဖၣ်န့ၣ် တၫ်ကလူၤပိာ်မၤထွဲဘၣ် တုၤလီၤတီၤလီၤအဂီၫ်တဲဟ့ၣ်ပလီၫ်၀ဲဒီး တၫ်ကဖီၣ်လိာ်စုဒီးကမျၢၫ် လၢတၫ်မ့ၫ်တၫ်တီအဂီၫ်ဒီး လဲၤသကိးဃူဃူဖိးဖိး ဒ်သိးကတုၤဆူ တၫ်မၤနၢၤဖီတၢၣ် လၢအဆိအချ့အဂီၫ် တၫ်ဒီသဒၢ၀ဲၤကျိၤခိၣ် တဲသဆၣ်ထီၣ်ဒီး ဟ့ၣ်ဂံၫ်ဟ့ၣ်ဘါ၀ဲ အဲၣ်ကလုာ်ပၢၫ်ဆၢတၫ်ခိၣ်နၫ်သိၣ်ဒူတဖၣ်န့ၣ်လီၤ.
ပဒိၣ်စီၤဆၢဂ့ၤန့ၣ် ဖဲခ့ၣ်အဲၣ်ယူၣ်ခီကရဲး(၁၇)၀ီတ၀ီန့ၣ် ဘၣ်တၫ်ဃုထၢထီၣ်အီၤ ဒ်ခ့ၣ်အဲၣ်ယူၣ်ကရၢခိၣ်(၂)အသိးဒီး ကတီၫ်အံၤမ့ၫ်စ့ၫ်ကီးခ့ၣ်အဲၣ်ယူၣ် တၫ်ဒီသဒၢ၀ဲၤကျိၤခိၣ်တဂၤန့ၣ်လီၤ.
