လါမးရှး(၂၄)သီ, ၂၀၂၄နံၣ်
ဖဲ၂၀၂၄နံၣ်, လါမးၡး(၂၄)သီအနံၤ ဟါ(၁၀)ဒီး(၁၁)နၣ်ရံၣ်အဘၢၣ်စၢၤအဆၢကတီၫ် သုးကီၣ်ကး အကဘီယူၤဒုးသုး ဟဲခးလီၤတၫဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူသထူၣ်, ကီၫ်ဆၣ်ဘံလ့, ဃီဖိပျဲၫ်သ၀ီ(မင်းစောင်းရွာ)ပူၤ(၃)ဘျီအဃိ တီၤခၢၣ်သးကၠိတၫ်သူၣ်ထီၣ်(၃)ဖျၢၣ်ဒီး ကမျၢၫ်အိၣ်ဟံၣ်(၁)ဖျၢၣ်ဟးဂီၤကွံာ်၀ဲန့ၣ်လီၤ.
သုးကီၣ်ကးအကဘီယူၤဒုးသုး ဟဲတ့ၫ်လီၤမ့ၣ်ပိၫ်(၈)ဖျၢၣ်အကျါ (၂)ဖျၢၣ်တခီ တပိာ်ဖးထီၣ်၀ဲဘၣ်န့ၣ်လီၤ. တကးဘၣ် သ၀ီဖိတဂၤလၢအမ့ၫ် တံကဲၣ်, သးနံၣ်(၅၆)နံၣ်စ့ၫ်ကီး ကျိချံအက့အခီဘၣ်အီၤဒီး အစုတခီဘၣ်ဒိ၀ဲန့ၣ်လီၤ.
“ဟဲခးလီၤတၫ်လၢ ယဟံၣ်(၂)ဖျၢၣ်ညါ. ဟံၣ်ခိၣ်ဒီန့ၣ်တဖျၢၣ်ဒီး အခီၣ်ထံးန့ၣ်တဖျၢၣ်. မံလၢဒၢးပူၤလီၤ. တၫ်ဘၣ်ဒိဘၣ်ထံးဒီးတၫ်ဟးဂုၤဟးဂီၤတခီ တအိၣ်ဘၣ်. ယပျံၤတၫ်စ့ၫ်လီၤ“ အဂ့ၫ် သ၀ီပိာ်ခွါတဂၤတဲ၀ဲန့ၣ်လီၤ.
ဃီဖိပျဲၫ်သ၀ီၤအံၤ မ့ၫ်သုးက့(၁)သုးက့ခိၣ်(တပ်မဟာမှူး)အသ၀ီအဃိ တၫ်ပညိၣ်တ့ၫ်လီၤမ့ၣ်ပိၫ်လၢသုးက့ခိၣ်အဟံၣ်အဂ့ၫ် လီၫ်က၀ီၤပှၤဘၣ်မူဘၣ်ဒါတဖၣ်စံး၀ဲန့ၣ်လီၤ.
တကးဘၣ် သ၀ီပိာ်မုၣ်တဂၤတဲ၀ဲလၢ “ယမံလၢတၫ်ဖီခိၣ်လီၤ. ယဖိဒုမံလၢဟံၣ်ပူၤလီၤ. ကျိသၣ်ဟဲလီၤတဲာ်ဒီးပဖုးဘၣ်သးလီၤ. ပှၤဂၤန့ၣ်အလဲၤမံလၢပှၫ်ပူၤလီၤ. ပတနၫ်ဟူတၫ်နီတမံၤအဃိ ပတလဲၤမံဘၣ်. ကျိသၣ်လီၤတဲာ်၀ံၤ ပမံက့ၤတဘူၣ်လၢာ်ဘၣ်ဒီး ပက့ၤမံက့ၤလၢတၫ်လီၫ်အဂၤအဂ့ၫ်“ န့ၣ်လီၤ.
“အဖံန့ၣ် မံတဂၤလီၤ. အိၣ်သးပှၫ်တဂၤလီၤ. တအိၣ်ဒီးအဖိအလံၤဘၣ်. နၫ်ဟူလၢဟဲခးလီၤတၫ်လၢကၠိအဃိ အ၀ဲစံၣ်လီၤပူၤ၀ံၤ မ့ၣ်ပိၫ်ဟဲဘၣ်အဟံၣ်လီၤ. စံၣ်လီၤမ့တပူၤဒုသံလီၤသၢၣ်“အဂ့ၫ် ပိာ်ခွါတဂၤစ့ၫ်ကီးတဲ၀ဲန့ၣ်လီၤ.
ကီၫ်ရ့ၣ်ဒူသထူၣ်, ကီၫ်ဆၣ်ဘံလ့(ဘီးလင်းမြို့နယ်), ဃီဖိပျဲၫ်သ၀ီအံၤ က၀ီၤဒ့အိၣ်၀ဲ(၅)က၀ီၤဒ့ဒီး ဟံၣ်ခိၣ်ခဲလၢာ်အိၣ်၀ဲ (၃၀၀)ဘျဲၣ်န့ၣ်လီၤ.
မ့မ့ၫ်ခဲအံၤတခီ ခီဖျိလၢသုးကီၣ်ကး ဟဲတ့ၫ်လီၤမ့ၣ်ပိၫ်လၢ ဃီဖိပျဲၫ်သ၀ီပူၤ၀ံၤအလီၫ်ခံ ဒူသ၀ီကမျၢၫ်တဖၣ် ပျံၤတၫ်ဖုးတၫ်ဒီး လဲၤအိၣ်ကဒုဖဲ ပှၫ်ပူၤအဂ့ၫ်တၫ်သ့ၣ်ညါဘၣ်န့ၣ်လီၤ.
ကီၫ်ရ့ၣ်ဒူသထူၣ်(ဘီးလင်းခရိုင်), ကီၫ်ဆၣ်ဘံလ့ဟီၣ်က၀ီၤပူၤ ကလံၤကျါတၫ်လီၤဘၣ်ယိၣ်အိၣ်၀ဲအဃိ ဒ်သိးလီၫ်က၀ီၤကမျၢၫ်တဖၣ် တၫ်ကဒီသဒၢကလံၤကျါတၫ်လီၤဘၣ်ယိၣ်အဂီၫ် လီၫ်က၀ီၤပှၤဘၣ်မူဘၣ်ဒါတဖၣ် ဒုးသ့ၣ်ညါမၢခူၣ်လီၤပာ် တၫ်အိၣ်ကဒုတၫ်ပူၤတဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
