ပှၤလၢဖီၣ်ဃာ် ရခၢၣ်ကီၫ်စဲၣ်လံာ်ခိၣ်ဂီၤတဖၣ် သုးကီၣ်ကး တဟ့ၣ်ခွဲးလၢကဟးထီၣ်က့ၤလီၤ

လါမးရှး(၂၁)သီ, ၂၀၂၄နံၣ်

ပှၤအိၣ်လၢ၀့ၫ်တကူၣ်ဖီၣ်ဃာ် လံာ်ခိၣ်ဂီၤ(၁၁/)ပှၤရခၢၣ်ကီၫ်စဲၣ်ဖိတဖၣ် ထံလီၫ်ကီၫ်ပူၤ တၫ်ဟးထီၣ်က့ၤလီၤခွဲး ဘၣ်တၫ်ကးတံာ်ကွံာ်ဃာ်၀ံၤ သိလ့ၣ်လၢတီၣ်ပှၤဟးထီၣ်က့ၤလီၤ လၢတၫ်လီၫ်ယံၤတဖၣ်တကပၤ သုတဆါန့ၫ်၀ဲ လံာ်ပျဲက့(လက်မှတ်)အဂီၫ် ဖဲလါမးရှး(၁၈)သီနံၤန့ၣ် သုးကီၣ်ကး နဲၣ်လီၤဃာ်၀ဲအဂ့ၫ် အ့ၣ်ယၣ်၀တံၣ် တၫ်ကစီၣ်သန့ ပာ်ဖျါ၀ဲလီၤ.

သုးကီၣ်ကး အတၫ်ဟ့ၣ်ပလီၫ်လံာ်ပူၤ ပှၤလၢဖီၣ်ဃာ်(၁၁/)လံာ်ခိၣ်ဂီၤတဖၣ် အိၣ်လၢ၀့ၫ်တကူၣ်ပူၤဒီး သုးတဟးထီၣ်က့ၤလီၤလၢတၫ်လီၫ်အဂၤတဂ့ၤအဂီၫ်ဒီး တၫ်သုတဆါန့ၫ်အီၤ လံာ်ပျဲက့အဂီၫ် ပာ်ဃုာ်၀ံၤ ပှၤလၢဖံးမၤတၫ်လၢတၫ်ဟးထီၣ်က့ၤလီၤတကပၤ မ့ၫ်တလူၤပိာ်မၤထွဲ၀ဲန့ၣ် တၫ်ကဟံးန့ၫ်အီၤဂ့ၫ်၀ီတုၤလီၤတီၤလီၤအဂ့ၫ် ပာ်ဃုာ်၀ဲလီၤ.

“တၫ်လဲၤထီၣ်က့ၤလီၤ Agency တခါ ဆှၢဃာ်လံာ်လီၤ. လၢလံာ်ပူၤ ပှၤဟးထီၣ်က့ၤလီၤကိးဂၤန့ၣ် ကဘၣ်စိာ်ဃုာ် တၫ်လဲၤထီၣ်က့ၤလီၤတၫ်အုၣ်ကီၤ(ခရီးသွားထောက်ခံစာ)ဒီး တၫ်မၤတၫ်အုၣ်ကီၤတဖၣ်လီၤ. မ့မ့ၫ်လၢ(၁၁/)တဖၣ်တခီ လၢကတီၫ်အံၤ တၫ်တဟ့ၣ်ခွဲးလၢ ဆါန့ၫ်အ၀ဲသ့ၣ် လံာ်ပျဲက့(လက်မှတ်)ဘၣ်. တဲ၀ဲဒ်န့ၣ်လီၤ. မ့ၫ်လၢမနုၤအဃိလဲၣ်န့ၣ် တတဲ၀ဲဘၣ်. လၢကတီၫ်အံၤ ကးတံာ်ဃာ်၀ဲဒ်န့ၣ်အဃိ ပ၀ဲစ့ၫ်ကီး ပဆါန့ၫ်အခွဲးတအိၣ်ဘၣ်. မ့ၫ်ဆါန့ၫ်ဘၣ်ဖုးန့ၣ် ပကဘၣ်တၫ်ဟံးန့ၫ်ပှၤဂ့ၫ်၀ီ” အဂ့ၫ် တဲ၀ဲန့ၣ်လီၤ.

ပှၤလၢတဖီၣ်ဃာ်ရခၢၣ်ကီၫ်စဲၣ်လံာ်ခိၣ်ဂီၤတဖၣ် က၀ီၤဒ့(ရပ်ကွက်), ပၢၤကီၫ်၀ဲၤဒၢး(ရဲစခန်း), တၫ်မၤ(အလုပ်)ဒီး တၫ်အုၣ်ကီၤမ့ၫ်ပာ်ဃုာ်တခါခါမးဒီး နဲၣ်လီၤဃာ်၀ဲလၢ တၫ်ဆါန့ၫ်လံာ်ပျဲက့(လက်မှတ်)သ့၀ံၤ မ့ၫ်လၢတၫ်ဂ့ၫ်မနုၤအဃိ ကးတံာ်ကွံာ်၀ဲဒ်သိးအံၤန့ၣ် တၫ်တသ့ၣ်ညါလီၤတံၫ်လီၤဆဲးဘၣ်အဂ့ၫ် ပှၤမၤတၫ်ဟးထီၣ်က့ၤလီၤတၫ်ဖံးတၫ်မၤတဖၣ် တဲ၀ဲလီၤ.

တၫ်လဲၤထီၣ်က့ၤလီၤတၫ်အုၣ်ကီၤသနူ(ခရီးသွားထောက်ခံစာစနစ်) သုးကီၣ်ကး က့ၤစးထီၣ်မၤကဒီး၀ဲန့ၣ် မ့ၫ်ဒ်သိး ကတြီဃာ် သးစၫ်လၢတအဲၣ်ဒိးကဲသုးတဖၣ် သုတဃ့ၫ်ပူၤအသးလၢ တၫ်လီၫ်အဂၤအဂီၫ်သ့၀ဲအဂ့ၫ် သးစၫ်တနီၤတဲ၀ဲလီၤ.

ပှၤလၢအိၣ်ဖဲ၀့ၫ်တကူၣ် လၢဖီၣ်ဃာ်ရခၢၣ်ကီၫ်စဲၣ်လံာ်ခိၣ်ဂီၤတဂၤ တဲ၀ဲလၢ “မ့မ့ၫ်(၁၁/)န့ၣ် တဆါန့ၫ်၀ဲ တၫ်လဲၤထီၣ်က့ၤလီၤ လံာ်ပျဲက့လၢၤဘၣ်န့ၫ်မ့ၫ်အနီၫ်ကီၫ်လီၤ. မ့မ့ၫ်လၢတၫ်သံတၫ်မူအဂီၫ်ဒု ပသါကလဲၤထီၣ်က့ၤလီၤဒ်လဲၣ်. မ့ၫ်ထံကီၫ်လၢလီၤသးဟးဂီၤတဘ့ၣ်” အဂ့ၫ် တဲ၀ဲစ့ၫ်ကီးလီၤ.

ကမျၢၫ်တၫ်ဘၣ်ကဲသုးတၫ်ဘျၢသဲစး တၫ်ပာ်ဂၢၫ်ပာ်ကျၢၤအီၤ၀ံၤအလီၫ်ခံ ပှၤလဲၤထီၣ်က့ၤလီၤဖိတဖၣ်လၢ ကဒိးကဘီယူၤ က့ၤဆူရခၢၣ်ကီၣ်စဲၣ်တဖၣ် ဘၣ်တၫ်သမံသမိးအီၤဃံးဃံး၀ံၤ တနီၤတၫ်တဟ့ၣ်ခွဲးလၢကဒိးကဘီယူၤဘၣ်အမဲာ်ညါ တၫ်ဖီၣ်သမံသမိးအ၀ဲသ့ၣ်ဒီး တနီၤတၫ်ပျၫ်ကွံာ်အ၀ဲသ့ၣ်အိၣ်အသိး တနီၤတုၤလၢတနံၤအံၤ တၫ်ဖီၣ်ဒံးဃာ်အီၤအဂ့ၫ် ရခၢၣ်တၫ်ကစီၣ် Western News ပာ်ဖျါဃာ်၀ဲလီၤ.

အပူၤကွံာ် လါဖ့ၤဘြူၤအါရံၤ (၁၂)သီနံၤ ပှၤအိၣ်လၢ၀့ၫ်တကူၣ် လၢကလဲၤဆူ ရခၢၣ်ကီၫ်စဲၣ်၀့ၫ်တဖၣ် ကဘၣ်ဟံးန့ၫ် တၫ်ပျဲလၢကီၣ်ရ့ၣ်ပၢပြး၀ဲၤဒၢး (ခရိုင်အထွေထွေအုပ်ချုပ်ရေးမှူး)အသိး ပှၤလၢတၫ်အိၣ်ဆူၣ်အိၣ်ချ့တဂ့ၤတဖၣ်, ပှၤကၠိဖိလၢမၤလိတၫ်တဖၣ်ဒီး ပဒိၣ်ပှၤမၤတၫ်ဖိလၢဒိးန့ၫ်တၫ်ပျဲတဖၣ် တၫ်ကဟ့ၣ်တၫ်ပျဲ၀ံၤ ပၢပြး၀ဲၤဒၢးမ့ၫ်တဟ့ၣ်တၫ်ပျဲဘၣ်န့ၣ် တၫ်သုတဟ့ၣ်ခွဲးလၢ ပှၤဟးထီၣ်က့ၤလီၤဖိတဖၣ် ကဒိးပိာ်အခံဘၣ်န့ၣ် သုးကီၣ်ကးနဲၣ်လီၤဃာ်၀ဲ ပှၤမၤတၫ်ဟးထီၣ်က့ၤလီၤတၫ်ဖံးတၫ်မၤတဖၣ်လီၤ.

Ref : westernnews