လါမးရှး(၂၁)သီ, ၂၀၂၄နံၣ်
စးထီၣ်ဖဲလါမးၡး(၁၉)သီအနံၤတုၤ(၂၁)သီအနံၤ (၃)သီအတီၫ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, မူကီၫ်ဆၣ်, ယ့ၣ်လဲသ၀ီပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး သုးကီၣ်ကးအဘၢၣ်စၢၤတၫ်ဒုးတဖၣ်ကဲထီၣ်သးတပဃူာ်ဃီဒီး သုးကီၣ်ကးတပၤသံဘၣ်ဒိခဲလၢာ်အိၣ်၀ဲ(၅၀)ဂၤဘျဲၣ်၀ံၤ မ့မ့ၫ် KNLAတပၤဘၣ်ဒိ(၂)ဂၤအဂ့ၫ် ကီၫ်ရ့ၣ်ချၢၣ်လွံၫ်ထူၣ်ပှၤတဲတၫ်ပၢပဒိၣ်စီၤဟဲဂ့ၤတဲ၀ဲန့ၣ်လီၤ.
စးထီၣ်လၢလါမးၡးအတီၫ်ပူၤ သုးကီၣ်ကးနုာ်လီၤဟူးဂဲၤ၀ဲဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, မူကီၫ်ဆၣ်, မုၫ်ဃါပျီကရူၫ်, ယ့ၣ်လဲကရူၫ် ဒီး နိၣ်ကူၤကရူၫ်တဖၣ်၀ံၤ ဟဲခးလီၤတၫ်လၢကဘီယူၤ, ခးကျိဖးဒိၣ်တဖၣ်ဒီးဟဲတ့ၫ်လီၤမ့ၣ်ပိၫ်လၢ ဒရိတဖၣ်အိၣ်ထီၣ်၀ဲကိးမုၫ်နံၤန့ၣ်လီၤ.
ခီဖျိလၢသုးကီၣ်းတပၤ နုာ်လီၤဒူသ၀ီသ့ၣ်တဖၣ်၀ံၤ ဒွဲၣ်အူမၤဟးဂီၤကွံာ် ကမျၢၫ်ဟံၣ်ဃီတၫ်သူၣ်ထီၣ်တဖၣ်အဃိ မူကီၫ်ဆၣ်ဟီၣ်က၀ီၤပူၤ ဒူသ၀ီအဖျၢၣ်(၃၀)ဘျဲၣ်, ဟံၣ်ခိၣ်(၃,၁၃၃)ဖျၢၣ်, ပှၤနီၫ်ဂံၫ်(၁၈,၄၂၂)ဂၤ ဘၣ်ဃ့ၫ်ပူၤဖျဲးအသးန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, မူကီၫ်ဆၣ်ဟီၣ်က၀ီၤပူၤ သုးကီၣ်ကးတပၤ ခးလီၤကျိဖးဒိၣ်, ဟဲတ့ၫ်လီၤမ့ၣ်ပိၫ်လၢဒရိဒီး ခးလီၤဟီၣ်၀့ၣ်စၣ်တဖၣ်ကိးမုၫ်နံၤန့ၣ်လီၤ.
“တကးဒံးဘၣ် ဒူသ၀ီတဖၣ်လၢသုးကီၣ်ကးနုာ်လီၤ၀ဲန့ၫ်တဖၣ် သုးကီၣ်ကးတပၤဒွဲၣ်အူမၤဟးဂီၤကွံာ်၀ဲခဲလၢာ်လီၤ“ အဂ့ၫ် ချၢၣ်လွံၫ်ထူၣ်ပှၤဘၣ်မူဘၣ်ဒါတဲ၀ဲန့ၣ်လီၤ.
ဖဲ၂၀၂၄နံၣ်, (၂)လါဘျဲၣ်အတီၫ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၣ်ထူၣ်ကီၫ်ရ့ၣ်ဟီၣ်က၀ီၤပူၤ သုးကီၣ်ကးတပၤခးလီၤကျိဖးဒိၣ်ကိးမုၫ်နံၤန့ၣ်လီၤ. လၢတၫ်န့ၣ်အဃိ ၂၀၂၄နံၣ်, လါယနူၤအါရံၤဒီး လါဖ့ၤဘြူၤအါရံၤ (၂)လါအတီၫ်ပူၤ သုးကီၣ်ကးခးလီၤကျိဖးဒိၣ်အဃိ ကမျၢၫ်သံခဲလၢာ်(၂၉)ဂၤ, ကမျၢၫ်ဘၣ်ဒိခဲလၢာ်(၇၆)ဂၤအိၣ်၀ဲအသိး တၫ်ဆါဟံၣ်(၁)ဖျၢၣ်ပာ်ဃုာ် ဟံၣ်ဃီတၫ်သူၣ်ထီၣ်(၅၂)ဖျၢၣ်ဟးဂီၤကွံာ်၀ဲန့ၣ်လီၤ.တၫ်ဒုးကဲထီၣ်သးတပယူာ်ဃီအဃိ ဟီၣ်ခိၣ်မဲာ်ဖံးခိၣ်ကမျၢၫ်ဟံၣ်ဃီတၫ်သူၣ်ထီၣ်တၫ်ဟးဂုၤဟးဂီၤတဖၣ် ကအါန့ၫ်ဒံးအလီၫ်န့ၣ်လီၤ.
photo:knu
