လါမးရှး(၁၉)သီ, ၂၀၂၄နံၣ်
ကီၫ်ကၠီၣ်တဲၣ်, ၀့ၫ်ကံၫ်မဲအပူၤ ကလုာ်ဒူၣ်ပှၤဖီၣ်စုက၀ဲၤ(၇)ဖုလၢ အဆဲးလီၤပာ် ထံကီၫ်ဒီတဘ့ၣ်တၫ်ပတုာ်တၫ်ခးလံာ်ဟံးဃာ်(NCA) တၫ်တၢၣ်ပီၣ်တဲသကိး၀ံၤအလီၫ်ခံ တၫ်ကရၢကရိဒုးအိၣ်ထီၣ် 7 Ethnic Armed Organizations Alliance-7 EAO Alliance ကရၢအပူၤ ပအိးဒီကလုာ်တၫ်ထူၣ်ဖျဲးသုးမုၫ်ဒိၣ်(PNLO)တပာ်ဃုာ်၀ဲဘၣ်အဂ့ၫ် PNLO/PNLA သုးပှၤနဲၣ်တၫ် သုးခိၣ်ကျၢၫ်ဂီၫ်ဂ့ၫ်ခိၣ်သူၣ်ရ့ၣ် တဲ၀ဲအဂ့ၫ် the Irrawaddy ပာ်ဖျါဃာ်၀ဲန့ၣ်လီၤ.
လါမးၡး(၁၇)သီအနံၤဒီး (၁၈)သီအနံၤ တၫ်မၤ၀ဲတၫ်တၢၣ်ပီၣ်တဲသကိး၀ံၤ ကလုာ်ဒူၣ်(၇)ဖုလၢအဆဲးလီၤပာ် NCA အံၤ တၫ်ဒုးအိၣ်ထီၣ်၀ဲ 7 EAO Alliance ဒ်သိၣ်မှံကရၢအသိးအဂ့ၫ် ထုးထီၣ်ပာ်ဖျါထီၣ်၀ဲ၀ံၤ ဖဲ(၇)ဖုအကျါ PNLO စ့ၫ်ကီးပာ်ဃုာ်၀ဲန့ၣ်လီၤ.
PNLO/PNLA သုးပှၤနဲၣ်တၫ် သုးခိၣ်ကျၢၫ်ဂီၫ်ဂ့ၫ်ခိၣ်သူၣ်ရ့ၣ်တခီ “ဘၣ်ထွဲဒီးတၫ်ဒုးအိၣ်ထီၣ်(၇)ဖုတၫ်ဂ့ၫ်န့ၣ် ပ၀ဲလီၫ်ခၢၣ်သးကမံးတံာ်တၫ်ဆၢတဲာ်တပာ်၀ဲအဃိ PNLO တခီ တပာ်ဃုာ်၀ဲဘၣ်အဂ့ၫ် စံးဆၢက့ၤ၀ဲ“ န့ၣ်လီၤ.
(၂)သီအတီၫ်ပူၤတၫ်တၢၣ်ပီၣ်တဲသကိးအပူၤ PNLO ပှၤဆီၣ်ထွဲမၤစၢၤတၫ် သုးခိၣ်ဒိၣ်စိခိၣ်အိးကၣ်ဒီး လီၫ်ခၢၣ်သးပၢဆှၢတၫ်ကမံးတံာ်(၂)ဂၤလဲၤထီၣ်၀ဲ၀ံၤ 7 EAO Alliance နဲၣ်ရွဲၣ်ကရၢအပူၤ PNLO ကရၢဖိတဂၤပာ်ဃုာ်၀ဲဒ် ကရၢဖိတဂၤအသိးအဂ့ၫ် တၫ်ထုးထီၣ်ပာ်ဖျါဃာ်၀ဲန့ၣ်လီၤ.
သုးခိၣ်ကျၢၫ်ဂီၫ်ဂ့ၫ်ခိၣ်သူၣ်ရ့ၣ်တခီ “တၫ်လဲၤခဲအံၤန့ၣ် PNLO လီၫ်ခၢၣ်သးကမံးတံာ် တၫ်ပာ်သးတပာ်ဘၣ်. ပှၤလၢအလဲၤပာ်ဃုာ် နီၫ်တဂၤအမူဒါလီၤအဂ့ၫ် ယအဲၣ်ဒိးတဲဒ်န့ၣ်လီၤ. လၢပ၀ဲတၫ်သူၣ်ထီၣ်ဆီလီအသိး ပှၤစှၤဂၤန့ၣ် ကဘၣ်လူၤပိာ်မၤထွဲ ပှၤအါဂၤတၫ်ပာ်သးလီၤအဃိ ပှၤလၢအလဲၤတဖၣ် အမူဒါလီၤအဂ့ၫ်“ စံး၀ဲန့ၣ်လီၤ.
ကတီၫ်ခဲအံၤ PNLO ဒီးသုးကီၣ်ကးအဘၢၣ်စၢၤ တၫ်ဒုးကဲထီၣ်သးအဖၢမုၫ် ဖဲယိၤဒိၣ်ကီၫ်စဲၣ်, ဆံၣ်ဆဲၣ်ဟီၣ်က၀ီၤပူၤန့ၣ်လီၤ. ထံရူၫ်ကီၫ်သဲးတၫ်ဖံးတၫ်မၤတၫ်လဲၤကျဲတဖၣ်လၢ တၫ်ပာ်လီၤဃာ်၀ဲ ဖဲတၫ်အိၣ်ဖှိၣ်ပူၤအံၤ တၫ်ကမၤဖျါထီၣ်အမိၫ်လံမိၫ်ပှၫ်အဂီၫ် ကရၢခိၣ်အသိး ယိၤဒိၣ်ကီၫ်စဲၣ်တၫ်က့ၤသူၣ်ထီၣ်ဆီလီၤကီၣ်ကး (RCSS/SSA) ပှၤပၢၤလီၫ်ဆ့ၣ်နီၤသုးခိၣ်ကျၢၫ်ဒိၣ်စိယွဲးစ့း ဟံးန့ၫ်မူဒါ၀ံၤ ကရၢခိၣ်ခံအသိး တလၢၤကီၫ်သီပၣ်တံၣ် (MNSP)ကရၢ နဲၣ်အီၣ်မ့ကဟံးန့ၫ်မူဒါန့ၣ်လီၤ.
လၢန့ၣ်အမဲာ်ညါ နဲၣ်ရွဲၣ်ကရၢအပူၤ နဲၣ်ရွဲၣ်အသိး RCSS သုးခိၣ်ဒိၣ်စိစဲင့, နဲၣ်ရွဲၣ်သဃဲၤအသိး ကညီဒီကလုာ်တၫ်ထူၣ်ဖျဲးသုးမုၫ်ဒိၣ်တၫ်မုာ်တၫ်ခုၣ်ကီၣ်ကး (KNU/KNLA-PC) သုးခိၣ်ဒိၣ်စိစီၤကၠီၣ်ညိး ဟံးန့ၫ်မူဒါ၀ံၤ ကရၢဖိတဖၣ်အသိး MNSP ကရၢနၢၤအီၣ်မင့, ဒံၣ်မိၣ်ကရ့ၣ်စံၣ်တၫ်ဘၣ်ဘျူးကညီသုးမုၫ်ဒိၣ် (DKBA) သုးခိၣ်ကျၢၫ်ဖိစီၤစ့ၣ်၀့, လါဟူးဒံၣ်မိၣ်ကရဲးတံးစၢဖှိၣ်ကရၢ (LDU) ကၠၣ်ယၣ်ကိး, ရခၢၣ်ကီၫ်စဲၣ်တၫ်ထူၣ်ဖျဲးပၣ်တံၣ် (ALP) သုးခိၣ်ဒိၣ်စိခဲၣ်ကၠီၣ်လဲၫ်ဒီး PNLOကရၢဖိတဂၤပာ်ဃုာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ref:theirrawaddy
