လါမးရှး(၁၈)သီ, ၂၀၂၄နံၣ်
သုးကီၣ်ကးထၢန့ၫ်ဆူၣ်သုးသီတၫ်ရဲၣ်တၫ်ကျဲၤကကတၢၫ်ကွံာ်အဂီၫ် ထံဂုၤကီၫ်ဂၤကဟံးန့ၫ်ဂ့ၫ်၀ီအဂီၫ် ဘီမုၫ်စၢဖှိၣ်ကရၢဘၣ်ထွဲကီၫ်ပယီၤထီဘိခၢၣ်စးမီၫ်သီအူကၠီၣ်မိထိ ဃ့ထီၣ်၀ဲဖဲဘီမုၫ်စၢဖှိၣ်ကရၢတၫ်ဘံၣ်တၫ်ဘၢကီၣ်ကး(ကုလလုံခြုံရေး ကောင်စီ)တၫ်တၢၣ်ပီၣ်တဲသကိးအပူၤန့ၣ်လီၤ.
သုးကီၣ်ကးမၢန့ၫ်ဆူၣ်ကဲသုးလၢကီၫ်ပယီၤပှၤသးစၫ်တဖၣ်အံၤ မ့ၫ်ဒၣ်တၫ်ကသူအီၤဒ်ပှၤကညီတၫ်ဒီသဒၢ ဖဲတၫ်ဒုးမ့ၫ်ကဲထီၣ်သးဒီး တၫ်ပၢၫ်ဆၢဂံၫ်ဘါကရူၫ်တဖၣ်ကတီၫ်၀ံၤ တၫ်မၢန့ၫ်ဆူၣ်ဒ်အံၤန့ၣ် ကမၤကီခဲထီၣ် လီၫ်က၀ီၤတဖၣ်လၢပှၤဘၣ်ကွၫ်ဆၢၣ်မဲာ်ဒီး ပှၤဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်အဂ့ၫ် တဲဖျါထီၣ်၀ဲဆူ ဘီမုၫ်စၢဖှိၣ်ကရၢတၫ်ဘံၣ်တၫ်ဘၢကီၣ်ကး(ကုလလုံခြုံရေး ကောင်စီ)အအိၣ်န့ၣ်လီၤ.
တၫ်ဘံၣ်တၫ်ဘၢကီၣ်ကးတခီ ဖဲ၂၀၂၂နံၣ်, တၫ်ဆၢတဲာ်လၢဘၣ်ထွဲဒီးကီၫ်ပယီၤဂ့ၫ်၀ီ ၂၆၆၉တၫ်ပိာ်ထွဲထီၣ်အခံအသိး တၫ်ကပလီၫ်ကဒီးတၫ်ဆၢတဲာ်တခါလၢအတုၤလီၤတီၤလီၤစ့ၫ်ကီး ဃ့ထီၣ်၀ဲန့ၣ်လီၤ.
တကးဘၣ် သုးကီၣ်ကးလၢအမၤကလံၤကျါတၫ်ဒုးအံၤ ဒ်သိးကဘီယူၤသိသုတန့ၫ်အဂီၫ်, သုးကီၣ်ကးအမၤကမၣ်သုးကွီၫ်မ့ၣ်တဖၣ်အဖီခိၣ် ကဟံးန့ၫ်မူကဟံးန့ၫ်ဒါကအိၣ်ထီၣ်အဂီၫ်, တၫ်ဟ့ၣ်ပှၤဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤအကျိၤတဖၣ်သုတကးတံာ်အဂီၫ်, ကီၫ်ပယီၤဒံၣ်မိၣ်ကရ့ၣ်စံၣ် ဒီးတၫ်ဘျၢသဲစးကဒိၣ်စိအဂီၫ် ကဆီၣ်ထွဲမၤစၢၤဘၣ်အီၤအဂ့ၫ်စ့ၫ်ကီး ဃ့ထီၣ်၀ဲဆူ တၫ်ဘံၣ်တၫ်ဘၢကီၣ်ကးအအိၣ်န့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ကီၫ်ပယီၤပူၤ တၫ်ထီဒါသုးမုၫ်ဒိၣ်အတၫ်မၤအၢမၤသီတဖၣ်အပူၤ ပိာ်မုၣ်ဒီးပှၤသးစၫ်တဖၣ် ပာ်ဃုာ်ပာ်ဂီၤလၢတၫ်မဲာ်ညါအဂ့ၫ် မီၫ်သီအူကၠီၣ်မိထိ တီၣ်ဖျါထီၣ်၀ဲဖဲလါးမးၡး(၁၃)သီအနံၤ တၫ်မၤ၀ဲဘီမုၫ်စၢဖှိၣ်ကရၢတၫ်ဘံၣ်တၫ်ဘၢကီၣ်ကး(ကုလလုံခြုံရေး ကောင်စီ) ဖဲနယူယီး “တၫ်မၤဂ့ၤထီၣ် တၫ်ဒီသဒၢဆိတၫ်သဘံၣ်သဘုၣ်ဒီးပိာ်မုၣ်ဒီးပှၤသးစၫ်တဖၣ်ပာ်ဃုာ် ပှၤလၢဟူးဂဲၤတၫ်ခဲလၢာ် တၫ်ကဟ့ၣ်ခွဲးယာ်အါထီၣ်ဂ့ၫ်၀ီ“ တၫ်တၢၣ်ပီၣ်တဲသကိးအပူၤန့ၣ်လီၤ.
ref:voa
