လါမးရှး(၅)သီ, ၂၀၂၄နံၣ်
NATO သုးဂ့ၫ်၀ီ သိၣ်မှံၤအသုးဂ့ၫ်၀ီ တၫ်ဂဲၤလိလၢဟ့ၣ်ဃာ်၀ဲအမံၤဒ် Nordic Responseအံၤ မၤ၀ဲဖဲဟီၣ်က၀ီၤလၢဘျးစဲလိာ်သးဒီးရၢၡၢၣ်လၢအမ့ၫ် နီၣ်၀့ၣ်(နော်ဝေ), ဆွံၣ်ဒ့ၣ်(ဆွီဒင်)ဒီး ဖ့ၣ်လၣ်(ဖင်လန်)ထံကီၫ်တဖၣ်အပူၤ ဖဲလါမးၡး(၄)သီအနံၤန့ၣ်လီၤ.
ဆွံၣ်ဒ့ၣ်ဒီး ဖ့ၣ်လၣ် ထံကီၫ်ခံဘ့ၣ် ဖဲတချူးကဲထီၣ် NATO ထံကီၫ်ကရၢအကတီၫ် သုးတၫ်မၤလိ၀ဲအံၤဟ့ၣ်ဃာ်၀ဲအမံၤလၢ Cold Response၀ံၤ မၤသုးတၫ်ဂဲၤလိဖဲ ကီၫ်နီၣ်၀့ၣ်အပူၤန့ၣ်လီၤ. Nordic ထံကီၫ်ခဲလၢာ် ကဲထီၣ် NATO ထံကီၫ်ကရၢအဃိ Nordic ထံကီၫ်တဖၣ် မၤလဲၫ်ထီၣ်သုးတၫ်ဂဲၤလိအဂ့ၫ် နီၣ်၀့ၣ်တၫ်ဒီသဒၢ၀ဲၤကျိၤတဲ၀ဲန့ၣ်လီၤ.
သုးတၫ်ဂဲၤလိအပူၤ နီၣ်၀့ၣ်, ဆွံၣ်ဒ့ၣ်ဒီး ဖ့ၣ်လၣ်ထံကီၫ်တဖၣ် အသုးဖိတဖၣ်ပာ်ဃုာ်အါမး၀ံၤ, NATOကရၢဖိထံကီၫ်အဘ့ၣ်(၁၀)သုးဖိတဖၣ်စ့ၫ်ကီး ပာ်ဃုာ်၀ဲအဂ့ၫ် ဖ့ၣ်လၣ် တၫ်ဒီသဒၢ၀ဲၤကျိၤတဲ၀ဲလီၤ.
သုးတၫ်ဂဲၤလိအပူၤ သုးဖိပာ်ဃုာ်(၂၀,၀၀၀)ဂၤဘျဲၣ်၀ံၤ မၤသုးတၫ်ဂဲၤလိဖဲဘူးဒီးရၢၡၢၣ်( ရုရှား)ကီၫ်ဆၢတၫ်လီၫ် နီၣ်၀့ၣ်ကလံၤစိးတကပၤ( နော်ဝေမြောက်ပိုင်း)ဒီး ဆွံၣ်ဒ့ၣ်, ဖ့ၣ်လၣ်ထံကီၫ်တဖၣ် အကလံၤဒီး ထံတၫ်ပၢဟီၣ်က၀ီၤတဖၣ်အပူၤအဂ့ၫ် နီၣ်၀့ၣ်တၫ်ဒီသဒၢ၀ဲၤကျိၤတဲ၀ဲလီၤ.
သုးဖိအဂၤ(၁၀,၀၀၀)ဘျဲၣ် ကဂဲၤလိသုးလၢဟီၣ်ခိၣ်လိၤ၀ံၤ အိၣ်တ့ၫ် အဂၤ(၁၀,၀၀၀)ဘျဲၣ်တခီ ကဂဲၤလိသုးလၢ ထံကျါဒီး ကလံၤကျါအဂ့ၫ် တဲ၀ဲလီၤ.
သုးတၫ်ဂဲၤလိအပူၤ ထံလာ်ကဘီဒုးသုး(ရေငုပ်သင်္ဘော)တဖၣ်, ကဘီတီၣ် ကဘီယူၤ(လေယာဉ်တင် သင်္ဘော)ပာ်ဃုာ် ထံကဘီဒုးသုး(တိုက်ရေယာဉ်) အကလုာ်(၅၀)ဘျဲၣ်ဒီး ကဘီယူၤဒုးသုး(တိုက်လေယာဥ်)အကလုာ်ကလုာ် ပာ်ဃုာ်(၁၀၀)ဘျဲၣ်၀ံၤ ကဂဲၤလိ၀ဲတုၤလၢလါမးၡးတ၀ာ်အဂ့ၫ် နီၣ်၀့ၣ်တၫ်ဒီသဒၢ၀ဲၤကျိၤတဲ၀ဲန့ၣ်လီၤ.
ref:bnn
