လါမးရှး(၅)သီ, ၂၀၂၄နံၣ်
မၤတၫ်ပတုာ်တၫ်ခးဒီးကလံၤစိးသိၣ်မှံၤ(မြောက်ပိုင်းမဟာမိတ်)ကန့ၫ်အဂီၫ် ဂဲၤလိာ်၀ဲအဂ့ၫ်ဒီး စံးဘျုးဘၣ်ကီၫ်တရူး(တရုတ်)လၢ နုာ်လီၤမၤဘၣ်လိာ်ဖိးဒ့တၫ်လၢ တၫ်ဘၢၣ်စၢၤအဂ့ၫ် သုးကီၣ်ကးၦၤတဲတၫ်ပၢ စီၣ်မ့ထိ တဲလီၤ၀ဲဒၣ်ဖဲ သုးကီၣ်ကးပၢ တၫ်ကစီၣ်သန့တဖၣ်အပူၤန့ၣ်လီၤ.
၁၀၂၇ ဒုးယၤရဲၣ်ကျဲၤအဃိ သုးကီၣ်ကးလၢဘၣ်ဒိဆါအံၤ တၢၣ်ပီၣ်တဲသကိးတၫ်လၢ ကလံၤစိးသိၣ်မှံၤ(၃)ဖု လၢအမ့ၫ် ကိကးသုး(ကိုးကန့်တပ် -MNDAA), တအါသုး(တအာင်းတပ် TNLA), ရခၢၣ်သုး(ရခိုင်တပ် AA)တဖၣ် ဖဲအပူၤကွံာ်စှၤသီလၢတရူးကီၫ်န့ၣ်လီၤ.
တၫ်တၢၣ်ပီၣ်တဲသကိးတဘျီအံၤန့ၣ် ဖဲအပူၤကွံာ် လါယနူၤအါရံၤအပူၤ သုးကီၣ်ကးဒီး ကလံၤစိးသိၣ်မှံၤတဖၣ်အဘၢၣ်စၢၤ မ့ၫ်ဟဲၣ်က့ၣ်(ဟိုင်ဂင်)လံာ်တၫ်အၢၣ်လီၤ တၫ်တၢၣ်ပီၣ်တဲသကိး လၢကဟဲပိာ်ထွဲထီၣ်အခံတဖၣ်န့ၣ်လီၤ. တၫ်တၢၣ်ပီၣ်တဲသကိး၀ဲန့ၣ်အပူၤ တၫ်ကစီၣ်ဟးထီၣ်၀ဲလၢ တၫ်ကပာ်ပနီၣ် MNDAA ဒ်ကိကးဟီၣ်က၀ီၤ ပဒိၣ်လၢဖိးသဲစးတဖုအဂီၫ်, ယိၤဒိၣ်ကီၫ်စဲၣ်ကလံၤစိး၀့ၫ်လၢ ကလံၤစိးသိၣ်မှံၤ(၃)ဖုထီၣ်ဒုးမၤန့ၫ်၀ဲတဖၣ် သုးကီၣ်ကးကပျၫ်ကွံာ်လၢဖိးသဲစးအဂီၫ်, ကီၫ်ဆၢတၫ်ကူၣ်လဲၤမၤကၤအပူၤ ကလံၤစိးသိၣ်မှံၤတဖၣ် ကတီခိၣ်ရိၣ်မဲထၢခိသွဲတဖၣ်အဂီၫ်န့ၣ်လီၤ.
သုးကီၣ်ကးၦၤတဲတၫ်ပၢ စီၣ်မ့ထိတခီ တၫ်ပၢဆှၢရဲၣ်ကျဲၤ ကီၫ်ဆၢတြဲၤတဖၣ်ဒီး တၫ်ကူၣ်လဲၤမၤကၤတဖၣ်န့ၣ် အိၣ်ဒံးဒၣ်လၢ တရူးပဒိၣ်ဒီး သုးကီၣ်ကးအစုပူၤန့ၣ်လီၤအဂ့ၫ် ဖၢနုာ်တဲဃုာ်၀ဲလီၤ.
တၫ်တၢၣ်ပီၣ်တဲသကိးအပူၤ တၫ်အၢၣ်လီၤအီလီၤတဖၣ် အၢၣ်လီၤသကိး၀ဲလၢ တတဲဖျါ၀ဲဘၣ်အဃိ တမ့ၫ်ကတဲဘၣ်၀ဲ တၫ်ဂ့ၫ်လီၤတံၫ်လီၤဆဲးဘၣ်အဂ့ၫ် ဒီးတၫ်ပၢဟီၣ်က၀ီၤ(ပိုင်နက်နယ်မြေ)ဒီး ကီၫ်ဆၢတၫ်စိကမီၤ(နယ်နိမိတ်အချုပ်အချာအာဏာ)န့ၣ် တဆီတလဲသးဘၣ်အဂ့ၫ် တဲ၀ဲန့ၣ်လီၤ.
တၫ်ကစီၣ်ဟးထီၣ်လၢ ကလံၤစိးသိၣ်မှံၤတဖၣ် နီၤဟ့ၣ်လီၤဟီၣ်က၀ီၤလၢဒုးန့ၫ်၀ဲတဖၣ် အကတီၫ် သုးကီၣ်ကးတကပၤ တၫ်လီၫ်လၢ TNLA ဒုးမၤန့ၫ်ဃာ်လၢအမ့ၫ် နၣ်မတူၣ်(နမ္မတူ), နးဆၣ်(နမ့်ဆန်)ဒီး ၀့ၫ်မၣ်တိၣ်(မန်တုံမြို့)တဖၣ် သုးကီၣ်ကး(စစ်ကောင်စီ)ဘိးဘၣ်ရၤလီၤ၀ဲလၢ သုးတၫ်ပၢ(စစ်အုပ်ချုပ်ရေး)န့ၣ်လီၤ.
အပူၤကွံာ်နံၣ် လါအီးကထိဘၢၣ်(၂၇)သီ ဒုးယၤတၫ်ရဲၣ်တၫ်ကျဲၤအပူၤ သုးကီၣ်ကးန့ၣ် ယိၤဒိၣ်ကီၫ်စဲၣ်ကလံၤစိး( ရှမ်းပြည်နယ်မြောက်ပိုင်း)တကပၤ သုးကလၢၤလၢအကယၤ ဘၣ်ပာ်တ့ၫ်ကွံာ်၀ဲ၀ံၤ ဘၣ်သံဘၣ်ၦၫ်, ဘၣ်ဒိဘၣ်ထံးအသိး အသုးဖိလၢအကထိ ပာ်လီၤတၫ်စုက၀ဲၤလၢ ကလံၤစိးသိၣ်မှံၤ(၃)ဖုအအိၣ်န့ၣ်လီၤ.
ကိကးဟီၣ်က၀ီၤ၀့ၫ်ခိၣ် လီးကဲၣ်(လောက်ကိုင်)ဒီး ဟီၣ်က၀ီၤဒီတဘ့ၣ် MNDAA ဒုးမၤန့ၫ်ပၢကဒါက့ၤ၀ဲအသိး, တအါသုးမုၫ်ဒိၣ်(တအာင်းတပ်မတော် -TNLA)စ့ၫ်ကီး ယိၤဒိၣ်ကလံၤစိး( ရှမ်းပြည်နယ်မြောက်ပိုင်း) မဲလိၣ်(မိုင်းလုံ), မဲငီး(မိုင်းငေါ့), နးဆၣ်(နမ့်ဆန်), နးခါ(နမ့်ခမ်း), မၣ်တိၣ်(မန်တုံ), နၣ်မတူၣ်(နမ္မတူ)ဒီး ၀့ၫ်ကိးခဲၣ်(ကွတ်ခိုင်မြို့)တဖၣ် ထီၣ်ဒုးမၤန့ၫ်ဃာ်၀ဲန့ၣ်လီၤ.
ရခၢၣ်သုးမုၫ်ဒိၣ်(AA) စ့ၫ်ကီး ထံကီၫ်မုၫ်နုာ်တကပၤ ရခၢၣ်ကီၣ်စဲၣ်ဒီး ပလဲး၀း(ပလက်ဝ)အပူၤ သုးကီၣ်ကး အသုးကလၢၤတဖၣ် ဒီး၀့ၫ်တဖၣ် ထီၣ်ဒုး၀ဲတပယူာ်ဃီန့ၣ်လီၤ.
ref:myanmarnow
