လါဖ့ၤဘြူၤအါရံၤ ၂၉သီႇ ၂၀၂၄နံၣ်
ယိၤဒိၣ်ကီၫ်စဲၣ်ကလံၤစိးတကပၤ(ရှမ်းပြည်နယ်မြောက်ပိုင်း) လၢမိမ့း(မိုးမိတ်)အပူၤ သုးတြိၤ(၉၉)လၢဘၣ်တၫ်သ့ၣ်ညါအီၤဒ် နီၫ်ဂံၫ်(၉၉)ခီၣ်ချ့သုးတြိၤ၀ဲၤလီၫ်ခိၣ်သ့ၣ်(ခြေမြန်တပ်မဌာနချုပ်) အသုးဖိတဖၣ်န့ၣ် မၤသံကမျၢၫ်လၢတဖိးသဲစးတဖၣ်, ပာ်ဖှိၣ်ထီၣ်အသးဒီး ဖီၣ်ဆူၣ်ဖီၣ်စိးတၫ်(အုပ်စုဖွဲ့အဓမ္မပြုကျင့်ခြင်း) ဒီးဒွဲၣ်အူမၤဟးဂီၤဟံၣ်ဃီတဖၣ်အဂ့ၫ် ယိၤဒိၣ်ဟီၣ်ခိၣ်ဖိခွဲးယာ်ကရၢ(ရှမ်းလူ့အခွင့်အရေးအဖွဲ့) ထုးထီၣ်လံာ်ပာ်ဖျါ ဖဲလါဖ့ၤဘြူၤအါရံၤ(၂၇)သီအနံၤအဂ့ၫ် Myanmar Now တၫ်ကစီၣ်သန့ ပာ်ဖျါ၀ဲလီၤ.
စးထီၣ်ဖဲလါယနူၤအါရံၤ(၁)အနံၤတုၤ လါဖ့ၤဘြူၤအါရံၤ(၂)သီအနံၤန့ၣ် လၢမိမ့းကီၫ်ဆၣ်အပူၤ သုးကီၣ်ကး အတၫ်ဒုးတဖၣ်အဃိ ကမျၢၫ်(၂၇)ဂၤဘၣ်သံ၀ံၤ ဘၣ်ဒိဘၣ်ထံး၀ဲ(၂၁)ဂၤ ဒီးလၢအ၀ဲသ့ၣ်အကျါ(၁၇)ဂၤန့ၣ် သုးတြိၤ(၉၉)အစုတီၤဖီလာ် သုးဖိတဖၣ် မၤသံအီၤအဂ့ၫ် လၢ(၁၉၉၀)နံၣ်လံၤလံၤ ယိၤဒိၣ်ဟီၣ်ခိၣ်ဖိခွဲးယာ်ကရၢ(ရှမ်းလူ့အခွင့်အရေးအဖွဲ့)လၢ ဘၣ်တၫ်ဒုးအိၣ်ထီၣ်အီၤအံၤ အတၫ်ပာ်ဖျါအပူၤပာ်ဖျါ၀ဲလီၤ.
သုးတြိၤ(၉၉)လၢအိၣ်ဆီလီၤအသးဖဲ ၀့ၫ်မ့းထံၣ်လၣ်(မိတ္ထီလာမြို့)အံၤ ဟီၣ်ခိၣ်ဖိခွဲးယာ်တဖၣ် မၤကမၣ်၀ဲခီဖျိလၢ တၫ်ပၢၫ်ဆၢသုးတဖၣ် အတၫ်ဂုၫ်ကျဲးစၢးလၢကထီၣ်ဒုးမၤန့ၫ် ၀့ၫ်မိမ့းအဖီခိၣ် လၢဒုးဆၢကဒါက့ၤ၀ဲအပူၤ မၤကမၣ်၀ဲအဂ့ၫ် ပာ်ဖျါ၀ဲလီၤ. သုးတြိၤ(၉၉)သုးဖိတဖၣ် သ၀ီဖိအိၣ်လၢဟံၣ်မ့ၫ်ဂ့ၤ, ပှၫ်ပူၤမ့ၫ်ဂ့ၤ ခးသံ၀ဲ၀ံၤ ပှၤအစိၣ်တနီၤန့ၣ် ဘၣ်တၫ်ဒွဲၣ်အူအီၣ်ဃာ်၀ံၤ ပှၤသးနံၣ်(၁၀)ဘျဲၣ်ခံဂၤတခီ ဘၣ်တၫ်ဒီၣ်တဲာ်ကွံာ်ဃာ်အခိၣ်အဂ့ၫ် တၫ်ပာ်ဖျါအပူၤပာ်ဖျါ၀ဲလီၤ.
ပာ်ဖှိၣ်ထီၣ်သးမၤဆူၣ်မၤစိးတၫ်(အုပ်စုဖွဲ့အဓမ္မပြုကျင့်ခြင်း) အိၣ်(၃)ဘျီ ဒီးလၢတၫ်ဒွဲၣ်အူထီၣ်ကွံာ် ကမျၢၫ်ဟံၣ်(၁၅၀)ဖျၢၣ် အပူၤစ့ၫ်ကီး သုးတြိၤ(၉၉)အမူဒါအိၣ်၀ဲအဂ့ၫ် ယိၤဒိၣ်ဟီၣ်ခိၣ်ဖိခွဲးယာ်ကရၢ တဲ၀ဲလီၤ.
တၫ်မၤနီၣ်မၤဃါတဖၣ်အံၤ မ့ၫ်တၫ်မၤနီၣ်မၤဃါတဖၣ်လၢ အ၀ဲသ့ၣ်ထၢဖှိၣ်၀ဲန့ၫ်တဖၣ်၀ံၤ ဟီၣ်ခိၣ်လိၤတၫ်ကဲထီၣ်အသးနီၫ်နီၫ်လၢ သုးကီၣ်ကး မၤကမၣ်တၫ်လၢ ကမျၢၫ်တဖၣ်အဖီခိၣ်န့ၣ် အါန့ၫ်ဒံးအ၀ဲအံၤအဂ့ၫ် ယိၤဒိၣ်ဟီၣ်ခိၣ်ဖိခွဲးယာ်ကရၢ တကပၤ ယ့လယါဟၣ်(ယိင်းလျန်းဟန်)တဲ၀ဲန့ၣ်လီၤ.
ဖဲလါယနူၤအါရံၤ(၁၉)သီအနံၤတုၤ လါဖ့ၤဘြူၤအါရံၤ(၂)သီနံၤအတီၫ်ပူၤ သုးတြိၤ(၉၉)သုးဖိတဖၣ်အဃိ ၦၤဘၣ်သံ(၁၇)ဂၤတဖၣ်န့ၣ် အါတက့ၫ်မ့ၫ်ပိာ်ခွါ(အမျိုးသား)တဖၣ်၀ံၤ အ၀ဲသ့ၣ်တဖၣ် ဖဲတၫ်ဒုးကဲထီၣ်အကတီၫ် မ့ၫ်သ၀ီဖိတဖၣ်လၢ အိၣ်တ့ၫ်ကွၫ်ထွဲဟံၣ်တဖၣ်လီၤအဂ့ၫ် ယ့လယါဟၣ်(ယိင်းလျန်းဟန်)တဲ၀ဲန့ၣ်လီၤ. ၦၤအစိၣ်တဖၣ်န့ၣ် တၫ်ထံၣ်ဘၣ်လၢ ဘၣ်တၫ်ဒီၣ်တဲာ်ကွံာ်ဃာ်အီၤ အဂ့ၫ်တဲ၀ဲန့ၣ်လီၤ. သုးကီၣ်ကးအံၤ တမၤနၢၤတၫ်ဒုးဘၣ်အဖီခိၣ် ပာ်ဒ့ၣ်ပာ်ကမၣ် မၤသံမၤ၀ီကမျၢၫ်ဒ်သိးအံၤအဂ့ၫ် ယ့လယါဟၣ် (ယိင်းလျန်းဟန်)တဲ၀ဲန့ၣ်လီၤ.
မိးမ့းကီၫ်ရ့ၣ်အ၀့ၫ်ခိၣ် မိမ့း လၢကမျၢၫ်အိၣ်(၆)ကလးဘျဲၣ်အံၤအပူၤ သုးကီၣ်ကးအသုးကလၢၤလၢအိၣ်ဖဲန့ၣ်တဖၣ် ကခၠ့ၣ်တၫ်သဘျ့သုးမုၫ်ဒိၣ်-KIA, ကီၫ်ပယီၤဒီတဘ့ၣ်ကၠိဖိဒံၣ်မိၣ်ကရဲးတံးသုး-ABSDFဒီး ကမျၢၫ်တၫ်ဒီသဒၢသုး-PDF တဖၣ်ပာ်ဃုာ် သုးပာ်ဖှိၣ်တဖၣ် ဖဲလါယနူၤအါရံၤ(၁၈)သီအနံၤဂီၤ အကတီၫ်န့ၣ် စးထီၣ်ထီၣ်ဒုး၀ဲလီၤ.
မိမ့းကီၫ်ဆၣ်အပူၤ သုးကီၣ်ကး အသုးကလၢၤတနီၤ တၫ်ပၢၫ်သုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ၀ံၤအလီၫ်ခံ ဖဲလါဖ့ၤဘြူၤအါရံၤထီၣ်သီအတီၫ်ပူၤ သုးကီၣ်ကးအသုးတဖၣ် ဂုၤက့ၤအခံဒီဟးထီၣ်လၢ၀့ၫ်ပူၤလီၤ. အလီၫ်ခံ သုးကီၣ်ကးအသုးတဖၣ် ဟဲက့ၤနုာ်လီၤကဒါက့ၤ၀ံၤ ဒွဲၣ်အူမၤဟးဂီၤကွံာ်၀့ၫ်အဂ့ၫ် တၫ်သ့ၣ်ညါဘၣ်လီၤ. ၦၤအိၣ်လၢ၀့ၫ်မိမ့းပူၤတဖၣ် ဘၣ်ဃ့ၫ်အိၣ်ကဒုသးအဖၢမုၫ်၀ံၤ ၦၤဟဲက့ၤကဒါက့ၤဆူ၀့ၫ်ပူၤအိၣ်ထဲစှၤဂၤလီၤအဂ့ၫ် တၫ်သ့ၣ်ညါဘၣ်လၢ လီၫ်က၀ီၤကမျၢၫ်တဖၣ် ပာ်ဖျါ၀ဲလၢ ၦၤတ၀ၢၦာ်ဘျးစဲ(လူမှုကွန်ယက်)အပူၤန့ၣ်လီၤ.
ref:myanmarnow
