အပူၤကွံာ် ၂၀၂၃နံၣ်, လါဒံၣ်စ့ဘၢၣ် စးထီၣ်လၢ ၁၈အသီအနံၤဒီး တုၤလီၤလၢ (၂ဝ)သီ, (၂)သီအတီၫ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၢ်ရ့ၣ်ဖၣ်အၣ်,ကီၢ်ဆၣ်တၢ်ကြဲၢ်, သဝီပံၢ်တခးကၠိ တၫ်မၤ၀ဲ ကၠိဖိ, ကၠိသရၣ် ဒီး ကၠိဖိမိၢ်ပၢ် တၢ်ရ့လိာ်မုာ်လိာ်န့ၣ်လီၤ.
တၫ်မၤ၀ဲတၫ်ရ့လိာ်မုာ်လိာ်တၫ်ပညိၣ်တခီ ကၠိတဖျၢၣ်စုာ်စုာ် ကၠိဖိသ့ၣ်တဖၣ်ကဒဲကဒဲကသူၣ်ထီၣ်တၢ်ရ့လိာ်သးႇ ကသးအိၣ်မၤလိတၢ်, သရၣ်ႇ သရၣ်မုၣ်ဒီး ကၠိဖိမိၢ်ပၢ်တဖၣ် ကပာ်ဖှိၣ်မၤသကိးတၢ်အါထီၣ်အဂီၢ် တၢ်မၤဝဲတၢ်ရဲၣ်တၢ်ကျဲၤ၀ဲအဂ့ၫ် ကညီကူၣ်သ့ဆဲးလၤ၀ဲၤကျိၤ တၫ်ဆဲးကျိးဒီး တၫ်ကရၢကရိမူဒါခိၣ် စီၤသီသံၣ် စံး၀ဲန့ၣ်လီၤ.
တၫ်ရ့လိာ်မုာ်လိာ်တၫ်ရဲၣ်တၫ်ကျဲၤအပူၤ တၫ်မၤ၀ဲဖျၢၣ်ထူႇ ဖျၢၣ်ဃၤႇ တၢ်ဃ့ၢ်ပြၢဒီးအဂၤတဖၣ်ႇ တၢ်ဟ့ၣ်တၢ်သ့ၣ်ညါနၢ်ပၢၢ်ႇ တၢ်ဆဲးတၢ်လၤတၢ်ပြၢ, တၢ်ဂဲၤကလံၣ်ပြၢ, တၢ်ဖးပြၢထါသ့ၣ်တဖၣ် ပာ်ဃုာ်၀ဲအဂ့ၫ် စံး၀ဲန့ၣ်လီၤ.
တၫ်မၤတၫ်ရ့လိာ်မုာ်လိာ်တၫ်ရဲၣ်တၫ်ကျဲၤအပူၤ ပံၢ်တခးကၠိဒီး ကၠိအဂၤ(၈)ဖျၢၣ်လၢအမ့ၫ် ဝီကၠဲၣ် တီၤဖုၣ်ကၠိႇ ကီးဖီ တီၤဖုၣ်ကၠိႇ မဲၣ်တပူကၠိႇ နိၣ်ဖိခံကၠိႇ တကူၢ်တြီကၠိႇ ကနဲဃီဝၢ်ကၠိႇ နီၣ်တၢၣ်ခံကၠိႇ ကြူမရီၢ်တြီၤကၠိတဖၣ်န့ၣ်လီၤ. ကၠိဖိမိၢ်ပၢ်၊ ကၠိကမံးတံာ် သရၣ်, သရၣ်မုၣ်တဖၣ် ပၣ်ဃုာ်မၤသကိးတၢ်န့ၣ်လီၤ.
ကီၢ်ရ့ၢ်, ကီၢ်ဆၣ် ကူၣ်သ့ၦၤဘၣ်မူဘၣ်ဒါတဖၣ်, ကညီဒီကလုာ်စၢဖှိၣ်ကရၢ ပၢပြးၦၤဘၣ်မူဘၣ်ဒါတၢ်ဟဲထီၣ်ဝဲန့ၣ်လီၤ.
တၫ်သိၣ်လိဒီတနံၣ်အတီၫ်ပူၤ သုးကီၣ်ကးကဘီယူၤသ့ၣ်တဖၣ် ဟဲဆှၣ်တၢ်ထီဘိန့ၣ်လီၤ. လၢတၢ်ဒုးတၢ်ယာ်ကဲထီၣ်လီၢ်တဖၣ် ကလံၤကျါတၢ်ထီၣ်ဒုးမ့ၢ်ဂ့ၤႇ တၢ်ခးကျိဖးဒိၣ်မ့ၢ်ဂ့ၤ အိၣ်ဝဲဒၣ်ဃိ ကၠိဘၣ်ပတုာ်မ့ၢ်ဂ့ၤဒီး ဘၣ်သုးလီၢ်သုးကျဲမ့ၢ်ဂ့ၤအိၣ်ဝဲဒၣ်အဂ့ၫ် အ၀ဲတဲ၀ဲန့ၣ်လီၤ. ကၠိတၢ်လိၣ်နီၢ်နီၢ်တခီမ့ၢ်ဝဲ တၢ်ဘံၣ်တၢ်ဘၢ, တၢ်ဆဲးကျိးဆဲးကျဲဒီး ဂ့ၢ်ခီၣ်ထံးကူၣ်သ့တၢ်လိၣ်တဖၣ်န့ၣ်လီၤ. လၢတၢ်လိၣ်တၢ်အဖီခိၣ် KECD မၤလၢၦဲဝဲအိၣ်တနီၤႇ ဒီးကၠိဖိမိၢ်ပၢ်ဒီးလီၢ်ကဝီၤ မၤၦဲၤသကိးဝဲအိၣ်တနီၤစ့ၢ်ကီးန့ၣ်လီၤ.
လၢဆၢကတီၢ်ခဲအံၤ ဘၣ်ထွဲလၢတၢ်ကူၣ်ဘၣ်ကူၣ်သ့တၢ်လိၣ်အိၣ်ဝဲဒၣ်အါမး ဒီး KECD ခိၣ်နၫ်တဖၣ် ဒ်တၢ်သ့အိၣ်ဒီးၦၤအသိးပမၤလၢအဂ့ၤကတၢၢ်အဂ့ၫ် တဲ၀ဲန့ၣ်လီၤ. လီၢ်ကဝီၤပူၤတၢ်ကရၢကရိမ့ၢ်ဂ့ၤ ဒီးထံဂုၤကီၢ်ဂၤတၢ်ကရၢကရိတဖၣ်မ့ၢ်ဂ့ၤ လၢကညီတၢ်ကူၣ်ဘၣ်ကူၣ်သ့အဂီၢ်ဒီး နီၢ်ကစၢ်တၢ်ပၢလီၤသးအဂီၢ် ပတူၢ်လိာ်မုာ်အဝဲသ့ၣ်ထီဘိလၢ ကဟဲမၤသကိးတၢ်ဒီးအီၤအဂ့ၫ်စ့ၫ်ကီး ကညီကူၣ်သ့ဆဲးလၤ၀ဲၤကျိၤ တၫ်ဆဲးကျိးဒီး တၫ်ကရၢကရိမူဒါခိၣ် စီၤသီသံၣ် ကွဲမုာ်၀ဲန့ၣ်လီၤ.
ပံၫ်တခးကၠိတၫ်ရ့လိာ်မုာ်လိာ်တၢ်ရဲၣ်တၢ်ကျဲၤအပူၤ ကၠိဖိမုၣ်ခွါ, ကၠိဖိမိၫ်ပၫ်, သရၣ်သမါ ဒီး ပှၤဘၣ်မူဘၣ်ဒါ ခဲလၢာ်ပာ်ဖှိၣ် (၄၉၆)ဂၤဟဲထီၣ်၀ဲန့ၣ်လီၤ.
photo:KECD
