ကီၫ်ပယီၤ လံာ်ခီကီၫ်၀ဲၤဒၢး(ပတ်စ်ပို့ရုံး)အမဲာ်ညါ ဟံးန့ၫ်တၫ်လီၫ်ရဲၣ်လီၤသးကတီၫ် ၦၤ(၂)ဂၤသံ၀ဲအဂ့ၫ် ၦၤအမၤပူၤဖျဲးတၫ်ဖိ(ကယ်ဆယ်ရေးသမား)တဂၤ တဲ၀ဲဆူ AFP တၫ်ကစီၣ်သန့၀ံၤ ကမျၢၫ်လၢအကထိတဖၣ် ကပူၤဖျဲးလၢသုးကီၣ်ကး ကမျၢၫ်ကဘၣ်ကဲသုးတၫ်ဘျၢအဂီၫ် ဂုာ်လိၣ်ဟးထီၣ်၀ဲဒၣ်လၢ ကီၫ်ပူၤန့ၣ်လီၤ.
ဖဲ လါဖ့ၤဘြူၤအါရံၤ(၁၉)သီအနံၤ, မါတလ့၀့ၫ်လံာ်ခီကီၫ်၀ဲၤဒၢး(မန္တလေးပတ်စ်ပို့ရုံး)အမဲာ်ညါ ၦၤအကယၤတဖၣ် ဟံးန့ၫ်တၫ်လီၫ်ရဲၣ်လီၤအသးကတီၫ် သးနံၣ်(၅၂)နံၣ်ဒီး သးနံၣ်(၃၉)နံၣ်အိၣ် ပိာ်မုၣ်(၂)ဂၤ သံ၀ဲအဂ့ၫ် ၦၤအမၤပူၤဖျဲးတၫ်ဖိ(ကယ်ဆယ်ရေးသမား)လၢ အလဲၤတုၤဖဲတၫ်ကဲထီၣ်သးအလီၫ်တဂၤ တဲ၀ဲဆူ AFP တၫ်ကစီၣ်သန့န့ၣ်လီၤ.
“ၦၤဂီၫ်မုၫ်အကပၤ တၫ်ပျၫ်ထံကျိၤ(ရေနုတ်မြောင်း)အိၣ်တဘိလီၤ. အ၀ဲသ့ၣ်လီၤတဲာ်၀ဲဒၣ်ဖဲ တၫ်ပျၫ်ထံကျိၤဘိ၀ံၤ Oxygen ဒီၣ်တဲာ်ကွံာ်ဒီး သံ၀ဲအဂ့ၫ်“ ၦၤအမၤပူၤတၫ်ဖိ(ကယ်ဆယ်ရေးသမား)လၢ တအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤ.
ပိာ်မုၣ်အဂၤတဂၤစ့ၫ်ကီး ဘၣ်ဒိ၀ဲအသိး ပိာ်မုၣ်(၂)ဂၤလၢသံ၀ဲပာ်ဃုာ် အ၀ဲသ့ၣ်(၃)ဂၤအံၤ မ့ၫ်ၦၤလၢအဆါလီၤ ၦၤရဲၣ်လီၤ တိၣ်က့ၣ်(လူတန်းစီတိုကင်)တဖၣ်န့ၣ်လီၤ. သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ(၃)နံၣ်၀ံၤအလီၫ်ခံ သုးကီၣ်ကးကပၢၤ၀ဲ တၫ်ပၢၫ်ဆၢထီဒါတဖၣ်ကန့ၫ်အဂီၫ် ဂုၤကျဲးစၢး၀ဲအဖၢမုၫ်ဒံးန့ၣ်လီၤ.
တလါအံၤ လါထီၣ်စှၤသီအတီၫ်ပူၤ သုးကီၣ်ကး ပာ်လီၤ၀ဲလၢ ၦၤပိာ်ခွါလၢ သးနံၣ်(၁၈)ဆူ (၃၅)နံၣ်တဖၣ်ဒီး ပိာ်မုၣ်လၢ သးနံၣ်(၁၈)နံၣ် ဆူ(၂၇)နံၣ်တဖၣ် အစှၤကတၢၫ် တၫ်ကဘၣ်ကဲသုး(၂)နံၣ်အဂ့ၫ် ပာ်ဂၢၤပာ်ကျၢၫ်၀ဲန့ၣ်လီၤ.
စှၤနွံအတီၫ်ပူၤစ့ၫ်ကီး ကီၫ်ပူၤမံၣ်ဒံၣ်ယၣ်တဖၣ် အတၫ်ပာ်ဖျါအပူၤ မါတလ့လံာ်ခီကီၫ်၀ဲၤဒၢးတၫ်ချၢ ကမျၢၫ်အကယၤလၢ အိၣ်ခိးတၫ်တဖၣ်ယ ၀့ၫ်တကူၣ်တၫ်လီၫ်ခိၣ်သ့ၣ် ကၠီၣ်တဲၣ်မီၫ်သီ(ရန်ကုန်မြို့အခြေစိုက်ထိုင်းသံရုံး)အမဲာ်ညါ ၦၤသးစၫ်ဒီးပိာ်မုၣ်အကထိလၢ ရဲၣ်လီၤအိၣ်ခိး တၫ်နုာ်လီၤကၠီၣ်တဲၣ်ဘံၣ်စၣ်တဖၣ် တၫ်ထံၣ်ဘၣ်၀ဲန့ၣ်လီၤ.
သုးကီၣ်ကးၦၤတဲတၫ်ပၢတခီ ကီၫ်ပယီၤကမျၢၫ် ၦၤနီၫ်ဂံၫ်(၁၃)ကကွဲၫ်ဃၣ်ဃၣ်အံၤ တၫ်ကဘၣ်ကဲသုးဘၣ်ဆၣ်ဒီး တနံၣ်အတီၫ်ပူၤ တၫ်ကသိၣ်လိန့ၫ် သုးတၫ်သိၣ်လိ ၦၤနီၫ်ဂံၫ်(၅)ကလးလီၤအဂ့ၫ် တဲလီၤဃာ်၀ဲန့ၣ်လီၤ.
ref:borderecho
