တၫ်လံာ်တၫ်လီကျိာ်စ့ကၢ(ငွေလိမ်ဂိုဏ်း)ဒီး တဖိးသဲစးကၣ်စံၣ်နိၣ် တၫ်တၤကျိာ်တၤစ့တၫ်ဖံးတၫ်မၤ(တရားမဝင် ကာစီနိုလောင်းကစားလုပ်ငန်း)တဖၣ် လၢအိၣ်ဖဲကညီကီၫ်စဲၣ် ကီၫ်ဆၢဒီတဘိညါအံၤ တၫ်ကဒုးလီၤၦီၫ်ကွံာ်၀ဲအဂ့ၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ထုးထီၣ်ရၤလီၤဃာ်၀ဲဖဲ ဖ့ၤဘြူၤအါရံၤ(၁၃)သီအနံၤန့ၣ်လီၤ.
ကဖီၣ်လိာ်စုမၤသကိးတၫ်ဒီး လီၫ်က၀ီၤခိၣ်ဃၢၤထံကီၫ်တဖၣ်ဒီး ထံဂုၤကီၫ်ဂၤတၫ်ကရၢကရိတဖၣ်လၢ တၫ်ကမၤပျီကွံာ် တဖိးသဲစးတၫ်ဖံးတၫ်မၤအဂ့ၫ်စ့ၫ်ကီး ခ့ၣ်အဲၣ်ယူၣ်တဲ၀ဲန့ၣ်လီၤ.
ဘၣ်ထွဲဒီး တၫ်လံာ်အီၣ်လီအီၣ် တၫ်တၤကျိာ်တၤစ့တၫ်ဖံးတၫ်မၤတဖၣ်, တဖိးသဲစးကၣ်စံၣ်နိၣ်တၫ်လိာ်ခိၣ်လိာ်ကွဲတၫ်ဖံးတၫ်မၤတဖၣ်အဖီခိၣ် သုးဟံးန့ၫ်ဆူၣ်ထံကီၫ်တၫ်စိတၫ်ကမီၤသုးကီၣ်ကးအံၤ ဒိးန့ၫ်ဘၣ်၀ဲ တၫ်ဘၣ်ဘျုးဘၣ်ဖှိၣ်လိၤလိၤအဃိ ဆီၣ်ထွဲမၤစၢၤဒီသဒၢဃာ်၀ဲဒီး ဖီၣ်ပျံၤလၢတၫ်လီၫ်ခံအဂ့ၫ်စ့ၫ်ကီး တဲ၀ဲန့ၣ်လီၤ.
ကၠီၣ်တဲၣ်-ပယီၤကီၫ်ဆၢ ကညီကီၫ်စဲၣ်, ရၤမတံကီၫ်ဆၣ်(မြဝတီမြို့နယ်), ဆွ့ၣ်ကိကိၣ်၀့ၫ်သီ(ရွှေကုက္ကိုမြို့သစ်), မဲၫ်ထီၣ်သလ့(မယ်ထော်သလေး) KK Park ဒီး ကၠီးခဲးသ၀ီ(ကျောက်ခက် ကျေးရွာ)အပူၤ အိၣ်လဲတၫ်လံာ်တၫ်လီကၢး(အွန်လိုင်းငွေလိမ်ဂိုဏ်း)တဖၣ် ဒီး ကၣ်စံၣ်နိၣ်တၫ်လိာ်ခိၣ်လိာ်ကွဲတၫ်ဖံးတၫ်မၤ(ကာစီနိုလောင်းကစားရုံ)တဖၣ် အိၣ်၀ဲအဂ့ၫ် ရၤမတံ၀့ၫ်လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
လီၫ်က၀ီၤတဖၣ်အံၤ မ့ၫ်၀ဲ သုးခိးကီၫ်ဆၢ(BGF) ဒီး ကညီတၫ်ဘၣ်ဘျုးဒံၣ်မိၣ်ကရ့ၣ်စံၣ်သုးမုၫ်ဒိၣ်(ဒီမိုကရေစီအကျိုးပြုကရင့်တပ်မတော်)(DKBA)တဖၣ် ပၢဆှၢရဲၣ်ကျဲၤဟီၣ်က၀ီၤတဖၣ်န့ၣ်လီၤ.
မ့မ့ၫ်လၢ BGF နဲၣ်ရွဲၣ်ခိၣ်ကျၢၫ် သုးခိၣ်ဒိၣ်စိစီၤခၠံးသူၣ်(ဗိုလ်မှူးကြီးစောချစ်သူ)တခီ တတူၫ်လိာ်၀ဲ အိၣ်လဲတၫ်လံာ်တၫ်လီကျိာ်စ့တၫ်ဖံးတၫ်မၤ(အွန်လိုင်းငွေလိမ်လုပ်ငန်း)တဖၣ်အဂ့ၫ်, တၫ်မ့ၫ်ဒုးလီၤၦီၫ်ကွံာ် တၫ်ဖံးတၫ်မၤတဖၣ်အပူၤ ကၠီၣ်တဲၣ်-ပယီၤၦၤဘၣ်မူဘၣ်ဒါတဖၣ် တၫ်မ့ၫ်ကွဲမုာ်အီၤန့ၣ် တၫ်ကဖီၣ်လိာ်စုမၤသကိးတၫ်ဒီးအီၤအဂ့ၫ် တဲဖျါဃာ်၀ဲန့ၣ်လီၤ.
သုးကီၣ်ကးတပၤစ့ၫ်ကီး ကၠီၣ်တဲၣ်-ပယီၤကီၫ်ဆၢ, ကညီကီၫ်စဲၣ် ရၤမတံကီၫ်ရ့ၣ်, အိၣ်လဲတၫ်လံာ်တၫ်လီကျိာ်စ့ကၢ(အွန်လိုင်း ငွေလိမ်ဂိုဏ်း)တဖၣ် တၫ်ကဒုးလီၤၦီၫ်ကွံာ်အဂီၫ် ထံကီၫ်(၂)ဘ့ၣ် သုးခိၣ်နၫ် ဒိၣ်ထီတဖၣ် တၫ်တၢၣ်ပီၣ်တဲသကိး၀ဲအိၣ်အဂ့ၫ် သုးကီၣ်ကးမံၣ်ဒံၣ်ယၣ်(မီဒီယာ)တဖၣ် ပာ်ဖျါဃာ်၀ဲဖဲလါယနူၤအါရံၤ(၁၂)သီ အနံၤန့ၣ်လီၤ.
photo:bnionline
