ကလံၤကျါ ဒီး ကျိဖးဒိၣ်တဖၣ်အဃိ ၀့ၫ်စယဲးကၠံကမျၢၫ်တဖၣ် တၫ်သံတၫ်ၦၫ်အိၣ်ထီၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇ သုးက့နီၫ်ဂံၫ်(၂), တီအူကီၫ်ရ့ၣ်ႇ ထီတထူၣ်ကီၫ်ဆၣ်ႇ ၀့ၫ်စယဲးကၠံ, နီၫ်ဂံၫ်(၇၃)ခီၣ်ချ့သုးရ့ၣ်အံၤ စးထီၣ်ဖဲ လါဖ့ၤဘြူၤအါရံၤ(၇)သီအနံၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး ကမျၢၫ်တၫ်ဒီသဒၢသုးပာ်ဖှိၣ် (ပြည်သူ့ကာကွယ်ရေးပူးပေါင်းတပ်)တဖၣ် လဲၤနုာ်လီၤဒုး၀ဲ၀ံၤ ခံခီခံကပၤ တၫ်ဒုးဆူၣ်ထီၣ်၀ဲန့ၣ်လီၤ.

တၫ်ဒုးအပူၤ သုးကီၣ်ကးတပၤ ဟဲခးလီၤတၫ်လၢ ကလံၤကျါဒီး ကျိဖးဒိၣ်တဖၣ်အဃိ လီၫ်က၀ီၤကမျၢၫ် (၅၀)ဘျဲၣ် သံတ့ၫ်၀ဲအဂ့ၫ် စယဲးကၠံ လီၫ်က၀ီၤကမျၢၫ်တဂၤလၢ တအဲၣ်ဒိးပာ်ဖျါအမံၤတဂၤ တဲ၀ဲန့ၣ်လီၤ.

“လီၫ်က၀ီၤကမျၢၫ်ဖိ သံအိၣ်လီၤ. တၫ်ဟဲခးလီၤတၫ်ဒီးကဘီယူၤဖဲ တၫ်ဖီခိၣ်လီၤ. ခးလီၤ၀ဲဒၣ်လၢ ကမျၢၫ်လၢဃ့ၫ်တဖၣ်အကျါအဃိ ဖဲန့ၣ်ၦၤသံအိၣ်လီၤ. တၫ်ခးလီၤကျိဖးဒိၣ်အဃိ ၦၤသံအိၣ်စ့ၫ်ကီးလီၤ. ၦၤသံအစိာ်အကျါစ့ၫ်ကီး တၫ်ဒိးလီၤဃၣ်မ့ၣ်ပိၫ်လီၤ. ကျဲကပၤစ့ၫ်ကီး တၫ်ခးအီၤအဃိ ၦၤသံအိၣ်စ့ၫ်ကီးလီၤ. ဖိသၣ် ဒီး ၦၤသးၦၫ်တဖၣ် သံလၢ ကျဲကပၤဖၢပူၣ်န့ၣ်လီၤ. တၫ်မ့ၫ်လဲၤထၢအစိာ်န့ၣ် အစိာ်ဖီလာ်အိၣ်ဒီး မ့ၣ်ပိၫ်တဖၣ်ႇ တၫ်ပာ်တ့ၫ်ဃာ်ဒ်န့ၣ်ႇ အၢအၢနးနးလီၤ. ၦၤသံအိၣ်အါအါဂီၫ်ဂီၫ်လီၤ. ၦၤသံအနီၫ်ဂံၫ်နီၫ်ဒွးန့ၣ် ယထံၣ်ဘၣ်အီၤ ဖးအါလီၤ. ကအိၣ်ညါ(၄၀) (၅၀)ဃၣ်ဃၣ်လီၤ. ထဲလၢယဟးကျဲတဘိဒၣ်လဲၣ်န့ၣ် ကအိၣ်(၅၀)ဘျဲၣ်ညါလီၤ.”

“အ၀ဲသ့ၣ်ဟဲခးလီၤတၫ်လၢ ကဘီယူၤတဘိယုာ်ဃီအဃိ လီၫ်က၀ီၤကမျၢၫ်တဖၣ် ဃ့ၫ်ပူၤဖျဲးအကတီၫ် သံ၀ဲအိၣ်လီၤ. ၦၤသံကအိၣ်အဂၤ (၁၀)ဘျဲၣ်န့ၣ် ပသ့ၣ်ညါဘၣ်လီၤ. ၦၤလၢဘၣ်ဒိဘၣ်ထံးတခီအိၣ်အါမးလီၤ. ဖိသၣ်တဖၣ်စ့ၫ်ကီး ပာ်ဃုာ်န့ၣ်လီၤ. တၫ်ခးလီၤစ့ၫ်ကီး ကျိဖးဒိၣ်တဘိယုာ်ဃီန့ၣ်လီၤ. မ့မ့ၫ်ကမျၢၫ်တခီ ဘၣ်ဒိဘၣ်ထံးအါမးလီၤ. ဟံၣ်ဃီတဖၣ်စ့ၫ်ကီး  ဟးဂုၤဟးဂီၤကွံာ်၀ဲန့ၣ်လီၤ. ကတီၫ်ခဲအံၤ တီအူတပၤဒု မၤစၢၤပူၤဖျဲးအသးအိၣ်၀ဲအဂ့ၫ်”

Spring Warriors Column ၦၤတဲတၫ်ပၢစ့ၫ်ကီး တဲ၀ဲန့ၣ်လီၤ.

ခလရ (၇၃) စယဲးကၠံ ပၢၤကီၫ်သုးကလၢၤဒီး ခၠီဖၠါသုးကလၢၤတဖၣ် တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်၀ံၤ ကတီၫ်ခဲအံၤ တၫ်အိၣ်သးဒု တၫ်တသ့ၣ်ညါလီၤတံၫ်ဒံးဘၣ်အဂ့ၫ် တဲ၀ဲန့ၣ်လီၤ.

“ခဲလၢာ်န့ၣ် ကအိၣ်အကလးညါႇ လၢဟဲတုၤလၢ ပ၀ဲဒဲက၀ီၤတဖၣ်တခီ ကအိၣ်အကထိလီၤ. ကအိၣ်(၃)ကထိညါ. တနံၤညါအံၤဒီး ခဲမုၫ်ဆ့ၣ်စ့ၫ်ကီး ကဟဲအါထီၣ်အဃိ တၫ်တဲလီၤတံၫ်တန့ၫ်ဒံးဘၣ်. ၦၤအါတက့ၫ်န့ၣ် လဲၤအိၣ်၀ဲလၢအဘူးအတံၫ်တဖၣ် အဟံၣ်န့ၣ်လီၤ. မ့မ့ၫ်လၢ ပ၀ဲဒဲက၀ီၤန့ၣ် ဟဲလီၤလၢၦၤလၢအဒိးသန့ၤသးတအိၣ် ဒီး ၦၤမုာ်ကျိၤ၀ဲၤကွၫ်တဘၣ်လီၫ်ဘၣ်စးတဖၣ်လီၤအဂ့ၫ်” တီအူ၀့ၫ် ကမျၢၫ်ဒီးတၫ်မၤစၢၤၦၤဂ့ၫ်၀ီကရၢဖိလၢ အမၤစၢၤၦၤဃ့ၫ်သုး ၦၤလီၫ်အိၣ်ကမှံဖိတဂၤ တဲ၀ဲန့ၣ်လီၤ.

မ့မ့ၫ်လၢစယဲးကၠံ၀့ၫ်ပူၤ ကမျၢၫ်အိၣ်တဘူၣ်နီတဂၤလၢၤဘၣ်အဃိ ဃ့ၫ်ပူၤဖျဲးသးလၢာ်လံ. သ၀ီအကပိာ်ကပၤစ့ၫ်ကီး ပှၤလၢအိၣ်ကးတံာ်သးတဖၣ်အိၣ်၀ဲဒီး ၦၤလၢမၤစၢၤပူၤဖျဲးသးကရၢတဖၣ် ဆဲးကျိးဆဲးကျၢ မၤစၢၤ၀ဲန့ၣ်လီၤ. တၫ်အိးထီၣ်န့ၫ်၀ဲ တစိၤတလီၫ်ၦၤဃ့ၫ်သုး ၦၤလီၫ်အိၣ်ကမှံဒဲက၀ီၤတဖၣ်ဖဲ တီအူ၀့ၫ်သီခါဖၠၣ်တဖၣ်ဒီး ခရံာ်ဖိတၫ်ဘါယွၤသရိာ်တဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.

ref:rfa
photo:SpringWarriorsColumn