လါဒံၣ်စ့ဘၢၣ်(၁၇)သီ,၂၀၂၅နံၣ်
ကၠီၣ်တဲၣ်-ခၣ်ဘီဒံယါ ကီၫ်ဆၢတၫ်ဂ့ၫ်လိာ်ဘှီလိာ် တၫ်ဒုး(၈)သီနံၤပှဲၤထီၣ်အပူၤ ခၣ်ဘီဒံယါတကပၤ သုးဖိ ဘၣ်သံ၅၀၀ ဂၤအဂ့ၫ် ကၠီၣ်တဲၣ်သုးမုၫ်ဒိၣ်(ခိသုး)အတၫ်ထုးထီၣ်ဘိးဘၣ်ရၤလီၤအဖီခိၣ် ကၠီၣ်တဲၣ်တၫ်ကစီၣ်တဖၣ်အပူၤ ပာ်ဖျါ၀ဲ လီၤ.
ဒံၣ်စ့ဘၢၣ်(၈)သီ တုၤ (၁၅)သီ လၢ(၈)သီအတီၫ်ပူၤ တၫ်ဒုးအပူၤ ခၣ်ဘီဒံယါသုးကလၢၤခဲလၢာ် (၈၂)ဖျၢၣ် ဒုးမၤန့ၫ်၀ဲဒီး ခၣ်ဘီဒံယါသုးဖိသံ(၅၀၅)ဂၤအဂ့ၫ် ကၠီၣ်တဲၣ်သုးမုၫ်ဒိၣ်(ခိသုး)ပှၤတဲတၫ်ပၢခံဂၤတဂၤ သုးခိၣ်ဒိၣ်စိ ရံးခၠါဆူးဆူ၀ၣ်နိ တဲလီၤ၀ဲ ဖဲလါဒံၣ်စ့ဘၢၣ်(၁၅)သီအနံၤဟါလီၤခီန့ၣ်လီၤ.
တၫ်အံၤ မ့ၫ်ဒၣ်လၢအ၀ဲသ့ၣ်တကပၤ မၤန့ၫ်၀ဲတၫ်ဂ့ၫ်တၫ်ကျိၤအဖီခိၣ်လီၤအဂ့ၫ်,တၫ်ဒုးအပူၤ ခၣ်ဘီဒံယါသုးအ BM-21မျိာ်တခါ,သိလ့ၣ်ဒုးသုး(၁၂)ခိၣ်,သိလ့ၣ်တီၣ်တၫ်စုက၀ဲၤ (၁၀)ခိၣ်,ကျိဖးဒိၣ်လၢတၫ်ခးလၢတၫ်ဒ့စၢၤယံၤ (၇)ခိၣ်, တၫ်မၤဟးဂီၤဒြိ(၅)ခါ,ဒြိ(၁၇၅)ခိၣ် မၤန့၀ဲဒီး တၫ်ဆဲးကျိးတၢၫ်(၅)တၢၣ် မၤဟးဂီၤ၀ဲန့ၫ်အဂ့ၫ် တဲ၀ဲလီၤ.
ကၠီၣ်တဲၣ်သုးတကပၤတခီ တၫ်ဒုးအပူၤ ဒ်ပှၤဂ့ၫ်၀ီတၫ်ဘျၢတဖၣ်အသိး လူၤပိာ်မၤထွဲ၀ဲအဂ့ၫ်,တၫ်ဒုးအံၤတဘၣ်ဃးဒီး ထံကီၫ်ခံဘ့ၣ်ကမျၢၫ်ဘၣ်အဂ့ၫ်,ထံကီၫ်ခံဘ့ၣ်လၢာ်ကမျၢၫ်တဖၣ် အိၣ်ဆိးသကိးလၢတၫ်ဃူတၫ်ဖိးအပူၤလီၤ. တၫ်ဒုးအံၤ ဘၣ်ထွဲဒၣ်ဒီးဟိၣ်ဆၣ်ဒီးအပှၤတဖၣ်အဃိ ဘၣ်ကဲထီၣ်၀ဲအဂ့ၫ်,ကမျၢၫ်သးသမူတၫ်စုလီၫ်ခီၣ်ခိၣ် ဘၣ်ဟးဂီၤ၀ဲလီၤ.ကၠီၣ် တဲၣ်တကပၤ ထံဖိကီၫ်ဖိကမျၢၫ်လၢဘၣ်ဒိဘၣ်ထံးတဖၣ် တနီၤဖး၀ဲအဒူၣ်အဆၢဘၣ်အမဲာ်ညါ ကဟုကယာ်ကူစါယါ ဘျါန့ၫ်၀ဲအဂ့ၫ် တဲ၀ဲလီၤ.
လၢ(၈)သီတၫ်ဒုးအပူၤ ကၠီၣ်တဲၣ်တကပၤ သုးဖိသံ(၁၇)ဂၤဒီးဘၣ်ဒိဘၣ်ထံး (၃၂၇)ဂၤန့ၣ်လီၤ.အလီၫ်ခံကတၢၫ်သုးဖိ လၢဘၣ်သံတခီ မ့ၫ်၀ဲဖဲလါဒံၣ်စ့ဘၢၣ်(၁၅)သီနံၤ လၢကီၫ်ရ့ၣ်ဆူရ့,ကီၫ်ဆၣ်ဖနီၣ်ဒုၣ်ရးတၫ်ဒုး ကျိချံဘၣ်ဒီးဘၣ်သံ၀ဲအ ဂ့ၫ် တဲ၀ဲလီၤ.
ဖဲဒံၣ်စ့ဘၢၣ်(၁၆)သီအနံၤစ့ၫ်ကီး ခၠီးအၣ်မး,ခၠီးဘီး,ဆးတဆူၣ်,ဖရး၀ံးဟၣ်ရဟွ့ၣ်တၣ်မၣ်လ့,ဖူမခ့ၣ်,ခၠီးကၠိၣ် ,ပရးဆး (တၫ်ဘါယွၤကၠိ) ခနါ,ပရးဆး(တၫ်ဘါယွၤကၠိ)တၣ်ခွဲဒီးပွဲး ၃၅၀ ကစၢၫ်ဖီခိၣ် (၉)သီနံၤတၫ်ဒုးကဲထီၣ်ကဒီး၀ဲအဂ့ၫ် နီၫ်ဂံၫ် (၂)ကီၫ်ခီသုး၀ဲၤလီၫ်ခိၣ်သ့ၣ် ထုးထီၣ်ဘိးဘၣ်ရၤလီၤဃာ်၀ဲလီၤ.
ခၣ်ဘီဒံယါတကပၤ အဲၣ်ဒိးတၢၣ်ပီၣ်တဲသကိးတၫ်ပတုာ်တၫ်ခးအဂ့ၫ် လၢပှၤတ၀ၢပှာ်ဘျးစဲအပူၤ ကွဲးဖျါ၀ဲလီၤ.
တၫ်တၢၣ်ပီၣ်တဲသကိးတၫ်ပတုာ်တၫ်ခးန့ၣ် ဒိးသန့ၤထီၣ်အသးလၢထံကီၫ်ခံဘ့ၣ်ဧိၤလီၤဒီးခၣ်ဘီဒံယါတကပၤ မ့ၫ်အဲၣ်ဒိးပတုာ်တၫ်ခးအနီၫ်ကီၫ်န့ၣ် ကဘၣ်မၤဖျါထီၣ်၀ဲအမိၫ်လံၤမိၫ်ပှၫ်နီၫ်ကီၫ်အဂ့ၫ် ကၠီၣ်တဲၣ်တကပၤတဲ၀ဲလီၤ.
နီၫ်ဂံၫ်(၁)တထံၣ်န့ၣ် ကတုာ်တၫ်ခးအဂ့ၫ် ကဘၣ်ဘိးဘၣ်ရၤလီၤ၀ဲ,(၂)ထံၣ်တထံၣ်န့ၣ် ကဘၣ်ပတုာ်တၫ်ခးအနီၫ်ကီၫ်,(၃) ထံၣ်တထံၣ်န့ၣ် တၫ်ကဘၣ်မၤပျီသကိးဟီၣ်လာ်မ့ၣ်ပိၫ်တပူၤဃီအဂ့ၫ် ကၠီၣ်တဲၣ်ထံဂုၤကီၫ်ဂၤကိတိာ်၀ဲၤကျိၤ ပှၤတဲတၫ် ပၢ နဲနံးကိတ့ၣ်ခၠး ဖလါကိ တဲလီၤ၀ဲဖဲလါဒံၣ်စ့ဘၢၣ်(၁၅)သီအနံၤန့ၣ်လီၤ.
