သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအတီၢ်ပူၤ ထံရူၢ်ကီၢ်သဲးပှၤလီၢ်ဃိၣ်ဖိလၢတဒိးန့ၢ်ဆူၣ်ချ့တၢ်ကူစါယါဘျါ ဘၣ်သံ၀ဲအိၣ်(၁၃၉)ဂၤ

လါဒံၣ်စ့ဘၢၣ် ၁၇သီ, ၂၀၂၅နံၣ်

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ (၄)နံၣ်ဘျဲၣ်အတီၢ်ပူၤ ဃိၣ်အပူၤ ထံရူၢ်ကီၢ်သဲးပှၤလီၤဃိၣ်ဖိမုၣ်/ခွါ ၁၃၉ဂၤလၢတဒိးန့ၢ် ဆူၣ်ချ့တၢ်ကူစါယါဘျါတဖၣ်ဘၣ်သံ၀ဲ၀ံၤ ပှၤလၢသံအါတက့ၢ်မ့ၢ် တဒိးန့ၢ်ခွဲးလၢကစူးကါကသံၣ်ကသီလၢလိၣ်၀ဲတဖၣ်ဘၣ်အဂ့ၢ် တၢ်သ့ၣ်ညါဘၣ်လၢ Myanmar Prison Witnessအအိၣ်န့ၣ်လီၤ.

ပှၤဘၣ်သံ၀ဲတၢ်ဂ့ၢ်ခိၣ်သ့ၣ်တဖၣ်န့ၣ် ခီဖျိတၢ်ဆါအယံၤအထၢတဖၣ်လၢအမ့ၢ် သးတၢ်ဆါ, သွံၣ်ထီၣ်တၢ်ဆါ, သွံၣ်ဆၢဆံၣ်ဆၢ, ခဲစၢၣ်, ထံၣ်ဘံၣ်တၢ်ဆါတဖၣ်တကးဘၣ် တၢ်ဘၣ်တမုၥ်ဆူၣ်ဆူၣ်ကိၤကိၤ, တၢ်မၤဆူၣ်မၤဆါအီၤဒီး တၢ်ဘၣ်ဒိဘၣ်ထံးတဖၣ်အဃိ ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

တကးဘၣ် အါတက့ၢ် ကသံၣ်ကသီလၢလိၣ်ဘၣ်၀ဲတဖၣ်မ့ၢ်ဒိးန့ၢ်တခီ သံ၀ဲတသ့ဘၣ်ဆၣ် ဃိၣ်ပူၤကသံၣ်သရၣ်တအိၣ်, တဒိးန့ၢ်ခွဲးယါဘျါအသးလၢ တၢ်ချၢတၢ်ဆါဟံၣ်, ကသံၣ်ကသီလၢ ဟံၣ်ဖိဃီဖိဆှၢန့ၢ်၀ဲတဖၣ်တန့ၢ်ခွဲးစူးကါဘၣ်အဃိ တၢ်သံတၢ်ပှၢ်တဖၣ်ဒိၣ်ထီၣ်ဒံးအဖၢမုၢ်အဂ့ၢ် MPWပၥ်ဖျါဃၥ်၀ဲန့ၣ်လီၤ.

“ဂ့ၢ်ဂီၢ်အူတၢ်ဘၣ်ကူစါယါဘျါသးအဆၢကတီၢ် ထုးတၢ်ဆၢကတီၢ်ယံၤထၢအဃိ တကြၢးသံအလီၢ် ဘၣ်သံ၀ဲန့ၣ်လီၤ. ဘၣ်ထွဲဒီးတၢ်ဂ့ၢ်အံၤအဖီခိၣ်ထံဂုၤကီၢ်ဂၤတၢ်ကရၢကရိတဖၣ်တဃ့ထီၣ်န့ၢ်၀ဲလၢကဒိးန့ၢ်ကသံၣ်ကသီလၢလၢလီၣ်လီၣ်ဒီး ဆူၣ်ချ့တၢ်ကဟုးကယၥ်ဘၣ်အဂ့ၢ်” ကီၢ်ပယီၤဃိၣ်ပူၤတၢ်မၤနီၣ်မၤဃါ(MPW)တၢ်ကရၢကရိ ပှၤဘၣ်မူဘၣ်ဒါတဂၤ စံး၀ဲန့ၣ်လီၤ.

ထံဂုၤကီၢ်ဂၤတၢ်ကရၢကရိတဖၣ်, NGOတဖၣ်တခီ ဃ့ထီၣ်န့ၢ်၀ဲလၢ တၢ်ကပျၢ်ကွံၥ် ထံရူၢ်ကီၢ်သဲးပှၤလီၢ်ဃိၣ်ဖိတဖၣ်, တၢ်ပၥ်ဖျါထီၣ်တၢ်ပၥ်သးတဖၣ်အိၣ်ထီၣ်၀ဲအါအါဂီၢ်ဂီၢ်ဘၣ်ဆၣ် တဟ့ၣ်၀ဲ တၢ်ကူစါယါဘျါအခွဲးဒီး ဆူၣ်ချ့တၢ်ကဟုးကယၥ်လၢလၢလီၣ်လီၣ်ဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.

တၢ်ပၢၢ်ဆၢအဆၢကတီၢ်ဟဲယံၤထီၣ်တကတီၢ်ဃီ ဃိၣ်အပူၤ ထံရူၢ်ကီၢ်သဲးပှၤလီၢ်ဃိၣ်ဖိတဖၣ်ဘၣ်ကွၢ်ဆၢၣ်မဲၥ်ဒီး တၢ်ကူစါယါဘျါသးအခွဲးတၢ်ကီတၢ်ခဲတဖၣ်၀ံၤ ကတီၢ်ခဲအံၤထံရူၢ်ကီၢ်သဲးပှၤလီၢ်ဃိၣ်ဖိလၢအသံတဖၣ်အပူၤ နီၣ်ဂံၢ်အအါကတၢၢ်မ့ၢ် ပှၤလၢသးပှၢ်တဖၣ်အဂ့ၢ်  MPWတၢ်ပၥ်ဖျါအဖီခိၣ် တၢ်သ့ၣ်ညါဘၣ်န့ၣ်လီၤ.

“ထံရူၢ်ကီၢ်သဲးပှၤလီၢ်ဃိၣ်ဖိမုၣ်/ခွါလၢ ဘၣ်တၢ်ဖီၣ်န့ၢ်ဆူၣ်ဃၥ်အီၤတဖၣ် ကပျၢ်ကွံၥ်အဂီၢ် တၢ်ဃ့ထီၣ်တဖၣ်တကတီၢ်ဃီ တချူးလၢထူၣ်ဖျဲးထီၣ်ကွံၥ်အဆၢကတီၢ်အဘၢၣ်စၢၤ ကမူအဂီၢ် ထံဂုၤကီၢ်ဂၤတခီ ကဃ့ထီၣ်န့ၢ်၀ဲတၢ်မၤစၢၤတဖၣ် လီၤတံၢ်လီၤဆဲးအဂီၢ် ပ၀ဲတခီဃ့ထီၣ်၀ဲအဂ့ၢ်” MPWပှၤဘၣ်မူဘၣ်ဒါ စံးကဒီး၀ဲန့ၣ်လီၤ.

ကတီၢ်ခဲအံၤ ထံကီၢ်ဒီတဘ့ၣ် ဃိၣ်တဖျၢၣ်စုၥ်စုၥ်အပူၤ ထံရူၢ်ကီၢ်သဲးပှၤလီၢ်ဃိၣ်ဖိမုၣ်/ခွါလၢ ဘၣ်တၢ်ပၥ်လီၤဃၥ်ဃိၣ်ပူၤ ခဲလၢပၥ်ဖှိၣ် အိၣ်၀ဲ ၂၂,၆၅၆ဂၤအဂ့ၢ် တၢ်မၤစၢၤထံရူၢ်ကီၢ်သဲးပှၤလီၢ်ဃိၣ်ဖိကရၢ(AAPP)ထုးထီၣ်ပၥ်ဖျါဃၥ်၀ဲန့ၣ်လီၤ.