လါဒံၣ်စ့ဘၢၣ် ၁၆သီ, ၂၀၂၅နံၣ်
လါဒံၣ်စ့ဘၢၣ်၁၅သီ,မုၢ်ထူၣ်အဆၢကတီၢ်န့ၣ်ပယီၤ, ကၠီၣ်တဲၣ်,တရူးထံကီၢ်၃ဘ့ၣ် အိၣ်ဖှိၣ်တဲသကိး၀ဲဘၣ်ထွဲဒီးတၢ်ဒုးလီၤပှီၢ်ကၠါဖၠးဂ့ၢ်၀ီဖဲကညီကီၢ်စဲၣ်,ကၠီၣ်တဲၣ်ပယီၤကီၢ်ဆၢကီၢ်ပယီၤတပၤနီၣ်ဂံၢ်(၁)တၢ်ရ့လိၥ်မုၥ်လိၥ်တိၤတၢ်အိၣ်ဖှိၣ်ဘျီၣ်ဒိၣ်အပူၤန့ၣ်လီၤ.
ကီၢ်တရူး, ကမျၢၢ်တၢ်ဘံၣ်တၢ်ဘၢကိတိၥ်ခိၣ်(၂) လၠူၣ်ကၠူယံၣ်ဒီး ကီၢ်ပယီၤတပၤ ပၢၤကီၢ်ခိၣ်(၂)မၠိမ့ထဲးတဖၣ် ဟဲထီၣ်၀ဲ၀ံၤ, ကၠီၣ်တဲၣ်တပၤတခီ ပၢၤကီၢ်ခိၣ်ကျၢၢ်အနီၢ်ကစၢ်ဟဲထီၣ်၀ဲန့ၣ်လီၤ.
တၢ်အိၣ်ဖှိၣ်တၢ်ဆၢတဲၥ်အဖီခိၣ် ကၠီၣ်တဲၣ်တခီ ကစူးကါ၀ဲ ACSC (Anti Cyber Scam Center)၀ံၤ ကမၤ၀ဲဒ် တၢ်ဟ့ၣ်ခီဟ့ၣ်နီၤလိၥ်သးယၢ်ခီယၢ်ခီတၢ်ကစီၣ်တၢ်ဂ့ၢ်တၢ်ကျိၤလီၣ်ခၢၣ်သးအသိးအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ကမၤဖျါထီၣ်၀ဲ ကွီၢ်မ့ၣ်ပှၥ်ဘျးစဲတဖၣ်အဂီၢ် ကဟ့ၣ်ခီဟ့ၣ်နီၤလိၥ်သးယၢ်ခီယၢ်ခီ တၢ်ကစီၣ်တၢ်ဂ့ၢ်တၢ်ကျိၤဒီး တၢ်မၤနီၣ်မၤဃါတဖၣ်အဂီၢ် ကဒုးအိၣ်ထီၣ်၀ဲ တၢ်ပၥ်ဖှိၣ်မၤသကိးကရၢအဂ့ၢ် ဆှၢနုၥ်လီၤ၀ဲန့ၣ်လီၤ.
ကီၢ်ဆၢဟီၣ်က၀ီၤ ကွီၢ်မ့ၣ်ကဲ တၢ်သူၣ်ထီၣ်တဖၣ် တၢ်ကဒီၣ်တဲၥ်ကွံၥ်ဃၥ်၀ဲ လီမ့ၣ်အူဒီးအ့ၣ်ထၣ်နဲးတဖၣ်လၢ တၢ်ဆၢကတီၢ်တၢ်ပၥ်ပနီၣ်တအိၣ်အပူၤအဂီၢ် အၢၣ်လီၤအီလီၤ၀ဲန့ၣ်လီၤ.
တရူးကိတိၥ်ဒီး အကရၢတဖၣ်အံၤ လဲၤကွၢ်သမံသမိး၀ဲ တရူးကၠါဖၠးတဖၣ်လၢ ဘၣ်တၢ်ဖီၣ်န့ၢ်အီၤဖဲ KK Parkဒီး ရွ့ၣ်ကိကိၣ်ဟီၣ်က၀ီၤအပူၤ လၢတၢ်ပၢၤဃၥ်အီၤလၢ ရၤမတံ၀့ၢ်တၢ်ပၢၤဃၥ်သုးကလၢၤန့ၣ်လီၤ.
တရူးထံဖိကီၢ်ဖိတဖၣ်အံၤ တၢ်ကဆှၢက့ၤဆူ တရူးကီၢ်အဂီၢ် တၢ်ပၢၤဃၥ်အီၤန့ၣ်လီၤ. တရူးကိတိၥ်ဒီး အကရၢတဖၣ်အံၤ လဲၤ၀ဲလၢမဲဆီးအဆိ၀ံၤမး လဲၤတဲသကိးတၢ်လၢ ကီၢ်ပယီၤတပၤန့ၣ်လီၤ.
လါဒံၣ်စ့ဘၢၣ် ၁၂သီအနံၤတခီ တရူးကိတိၥ်ဒီး အကရၢတဖၣ်အံၤ လဲၤထံၣ်လိၥ်တဲသကိးတၢ်ဒီး ကီၢ်ပယီၤထံလီၢ်ကီၢ်ပူၤကိတိၥ် သုးခိၣ်ကျၢၢ်စိ ထိထိနီၣ်လၢ တၢ်ကဒုးလီၤပှီၢ်အိၣ်လဲတၢ်လံၣ်တၢ်လီဂ့ၢ်၀ီဖဲန့ၣ်ပၠံၣ်တီၣ်န့ၣ်လီၤ.
ထံကီၢ်၃ဘ့ၣ်အတၢ်ပၥ်ဖှိၣ်မၤသကိးတၢ်အံၤ ပှၤတူၢ်ကွီၢ်တဖၣ်လၢအိၣ်ဖဲ ကီၢ်ဆၢဟီၣ်က၀ီၤအပူၤအဂီၢ် တၢ်လီၢ်လၢဘံၣ်ဘၢ၀ဲတအိၣ်၀ဲနီတလီၢ်လၢၤဘၣ်အဂ့ၢ် မ့ၢ်၀ဲတၢ်ဟ့ၣ်ပလီၢ်တခါအဂ့ၢ် ပၥ်ဖျါဃၥ်၀ဲန့ၣ်လီၤ.
