လါဒံၣ်စ့ဘၢၣ် ၁၆သီ, ၂၀၂၅နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုးအံၤ စူးကါ၀ဲ ဒြိတူၢ်သံတဖၣ်၀ံၤ လဲၤတ့ၢ်လီၤမ့ၣ်ပိၢ်တဖၣ် ဖဲရၢၢ်ခၢၣ်ကီၢ်စဲၣ်, ကၠီးဖၠူၣ်ကီၢ်ဆၣ်အပူၤအိၣ် သ၀ီ(၃)ဖျၢၣ်အပူၤ သီခါဖၠၣ်(၂)ဖျၢၣ်ဒီး တၢ်မၤလိကၠိတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
အပူၤကွံၥ် လါဒံၣ်စ့ဘၢၣ် ၁၃သီအနံၤ, မုၢ်ထူၣ်(၁း၃၀)မံးနံးအဆၢကတီၢ် သုးကီၣ်မံးရှၢၣ်အသုး စူးကါ၀ဲဒြိတူၢ်သံတဖၣ်၀ံၤ လဲၤတ့ၢ်လီၤမ့ၣ်ပိၢ်တဖၣ် ဖဲအ့ၣ်တဲကၠံသ၀ီ, ကၠီးကလ့သ၀ီဒီး မ့ယဲးသ၀ီတဖၣ်အဂ့ၢ် လီၢ်က၀ီၤတၢ်ကစီၣ်စံး၀ဲန့ၣ်လီၤ.
အ့ၣ်တဲကၠံသ၀ီ သီခါဖၠၣ်ဘၣ်တၢ်တ့ၢ်လီၤအီၤလၢ မ့ၣ်ပိၢ်အဃိ သီခါဖၠၣ်အခိၣ်ဒုးဒီး တၢ်အဒူၣ်တဖၣ် လီၤပှီၢ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. သုးကီၣ်မံးရှၢၣ်အသုးအံၤ ဖဲမုၢ်ထူၣ်(၂)နၣ်ရံၣ်ဃၣ်ဃၣ်အဆၢကတီၢ်န့ၣ် စူးကါ၀ဲဒြိတူၢ်သံ(၁)ခိၣ်၀ံၤ လဲၤတ့ၢ်လီၤကဒီး၀ဲမ့ၣ်ပိၢ် ဖဲကၠီးကလ့ၣ်သ၀ီ သီခါဖၠၣ်လိၤလိၤန့ၣ်လီၤ.
တကးဘၣ် ဖဲလါဒံၣ်စ့ဘၢၣ် ၁၃သီအနံၤ, မုၢ်ထူၣ်(၂း၃၀)မံးနံးအဆၢကတီၢ်စ့ၢ်ကီး စူးကါ၀ဲဒြိတူၢ်သံဒီး ဟဲတ့ၢ်လီၤကဒီး၀ဲမ့ၣ်ပိၢ်ဖဲ ပှၤစံၣ်သုးပှၤလီၢ်အိၣ်ကမှံဖိအိၣ် မ့ယဲးသ၀ီ ကတီၤဆိတၢ်မၤလိကၠိအဂ့ၢ် တၢ်သ့ၣ်ညါဘၣ်န့ၣ်လီၤ.
သီခါဖၠၣ်(၂)ဖျၢၣ်ဒီး တၢ်မၤလိကၠိလၢ ဘၣ်တၢ်ဒုးတ့ၢ်လီၤမ့ၣ်ပိၢ်တဖၣ်အံၤ အခိၣ်ဒုးတဖၣ် ဖျိးထီၣ်၀ံၤ တၢ်အဒူၣ်တဖၣ်စ့ၢ်ကီး လီၤပှီၢ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
ဖဲအပူၤကွံၥ် လါဒံၣ်စ့ဘၢၣ် ၁၁သီအနံၤ သုးကီၣ်မံးရှၢၣ် လဲၤဒုး၀ဲ ကၠီးဖၠူၣ်အိၣ် င/လိစူးသ၀ီဒီး အီးသ၀ီတဖၣ်အဃိ ကမျၢၢ်(၈)ဂၤဘၣ်သံ၀ဲ၀ံၤ ဘၣ်ဒိ၀ဲ(၁၆)ဂၤန့ၣ်လီၤ.
ကတီၢ်ခဲအံၤန့ၣ် ကၠီးဖၠူၣ်ကီၢ်ဆၣ်အပူၤ AAဒီးသုးကီၣ်မံးရှၢၣ်အသုးအဘၢၣ်စၢၤ တၢ်ဒုးဆူၣ်၀ံၤ သုးကီၣ်မံးရှၢၣ်တပၤ ဘၣ်ဒိနးအဃိ ဘၣ်မၤပှဲၤအါထီၣ်၀ဲသုးဂံၢ်ဘါလၢ သုးသီတဖၣ်န့ၣ်လီၤ.
သုးကီၣ်မံးရှၢၣ်အသုးအံၤ တၢ်ဃုထၢအယီၤအဘျၣ်လၢ ကမၤ၀ဲတၢ်ဆၢကတီၢ်ဟဲအိၣ်ဘူးထီၣ်အဆၢကတီၢ် ပၥ်၀ဲကမျၢၢ်ဒ်တၢ်ခးပနီၣ်အသိး၀ံၤ တၢ်ခးပနီၣ်တမ့ၢ်လၢအမ့ၢ် တၢ်ဆါဟံၣ်, သီခါဖၠၣ်, တၢ်မၤလိကၠိတဖၣ် ပညိၣ်ဒုး၀ဲလၢ ကလံၤကျါအိၣ်ထီၣ်၀ဲတဘီယူၥ်ဃီန့ၣ်လီၤ.
