လါဒံၣ်စ့ဘၢၣ် ၃သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၅)ဟီၣ်က၀ီၤအပူၤ ၁လါအတီၢ်ပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLAအဘၢၣ်စၢၤ တၢ်ဒုးကဲထီၣ်တ့ၢ်၀ဲ ၁၀၄ဘျီအဂ့ၢ် ခ့ၣ်အဲၣ်ယူၣ်-ကီၢ်ရ့ၣ်မုၢ်တြီၢ်ပၥ်ဖျါဃၥ်၀ဲတၢ်ကစီၣ် ဖဲလါဒံၣ်စ့ဘၢၣ် ၂သီအနံၤန့ၣ်လီၤ.
ခံခီခံကပၤ တၢ်ဒုးကဲထီၣ်သးတဖၣ်အပူၤ သုးကီၣ်မံးရှၢၣ်အပှၤသုးဖိ သံ၀ဲ(၁၆)ဂၤဒီးဖဲန့ၣ်အကျါ ပၣ်ဃုၥ်ဒီး G-3(၁)ဂၤ၀ံၤ ဘၣ်ဒိ၀ဲ(၁၀၅)ဂၤဒီး ဖဲန့ၣ်အကျါ ပၣ်ဃုၥ်၀ဲသုးခိၣ်စိ(၁)ဂၤ, သုးခိၣ်ဂီၢ်ဂ့ၢ်(၁)ဂၤဒီးသုးစကီၤဖိ(၁)ဂၤအဂ့ၢ် တၢ်သ့ၣ်ညါဘၣ်လၢ တၢ်ကစီၣ်တၢ်ပၥ်ဖျါအဖီခိၣ်န့ၣ်လီၤ.
မ့မ့ၢ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLAတခီ တၢ်ဘၣ်ဒိဘၣ်ထံးအိၣ်၀ဲတဆံးတက့ၢ်အဂ့ၢ် စံး၀ဲန့ၣ်လီၤ.
တကးဘၣ် သုးက့နီၣ်ဂံၢ်(၅)ဟီၣ်က၀ီၤအပူၤ ဖဲလါနိၣ်၀့ဘၢၣ် ၁လါအတီၢ်ပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုး ဟဲဒုးတ့ၢ်လီၤမ့ၣ်ပိၢ်လၢဒြိ(၇)ဘျီ, ကဘီယူၤဒုးသုး(Jet Fighter) (၁၅)ဘျီ, ခးလီၤစ့ၢ်ကီးကျိဖးဒိၣ်(၁၂၀-မမ)တဖၣ်လၢ ဒူသ၀ီပူၤဒီး ကမျၢၢ်တၢ်ဖံးအီၣ်မၤအီၣ်အလီၢ်အကျဲ(၂၃)ဘျီအဃိ ဘၣ်ဒိ၀ဲသ၀ီဖိ(၃)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ သုးက့နီၣ်ဂံၢ်(၅)ဟီၣ်က၀ီၤအပူၤ ဖဲအပူၤကွံၥ် လါအီးကထိဘၢၣ် ၁လါအတီၢ်ပူၤစ့ၢ်ကီး သုးကီၣ်မံးရှၢၣ်အသုးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLAအဘၢၣ်စၢၤ တၢ်ဒုးကဲထီၣ်တ့ၢ်၀ဲ (၁၂၁)ဘျီ, သုးကီၣ်မံးရှၢၣ်အပှၤသုးဖိ သံ(၃၄)ဂၤဒီး ဘၣ်ဒိ၀ဲ(၇၈)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
