လါဒံၣ်စ့ဘၢၣ်(၂)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
တၫ်ဃုထၢလၢသုးဟံးန့ၫ်ဆူၣ်တၫ်စိကမီၤ ကဟံးန့ၫ်မူဒါမၤ၀ဲန့ၣ် အိၣ်တ့ၫ်ဒၣ်ဖဲစှၤသီလီၤဘၣ်ဆၣ် အ့ၣ်ယၣ်၀တံၣ်ကီၫ် ခီပူၤ ကမျၢၫ်အါတက့ၫ်ဒု အသးစၢၫ်ဆၢ၀ဲတအိၣ်ဘၣ်အဂ့ၫ် လီၫ်က၀ီၤဖိတဖၣ်တဲ၀ဲအဖီခိၣ် တၫ်သ့ၣ်ညါဘၣ်လီၤ.
သုးခီၣ်မံးရှၢၣ်န့ၣ် တၫ်ဃုထၢအကူာ်(၁)ကမၤ၀ဲဖဲလါဒံၣ်စ့ဘၢၣ်(၂၈)သီနံၤအဂ့ၫ် ဘိးဘၣ်ရၤလီၤဃာ်၀ဲဒီးအ့ၣ်ယၣ်၀တံၣ် ကီၫ်ခီပူၤ ရဲၣ်ကျဲၤ၀ဲလၢကမၤတၫ်ဃုထၢလၢကီၫ်ဆၣ်(၈)ဘ့ၣ်အပူၤဘၣ်ဆၣ် ကမျၢၫ်အါတက့ၫ်ဒု အသးတစၢၫ်ဆၢလၢ ကဟ့ၣ်တၫ်ဖးဘၣ်အဂ့ၫ် တဲ၀ဲလီၤ.
“ကဟ့ၣ်တၫ်ဖးအဂီၫ် သးတစၢၫ်ဆၢဘၣ်.တၫ်မၤတချူးဒၢးလဲၤကွၫ်တၫ်ဖးစရီဒၣ်လဲၣ်တတုၤဘၣ်.သုးပၢတၫ်အစိၤ ပနံာ် အပှ့ၤကလံၤဒိၣ်ထီၣ်ဒီးဘၣ်ဃုအီၣ်ဃုအီကီခဲနးမးလီၤ.ဖီၣ်ဃာ်ဒီၣ်စူးဒီးမၤတၫ်ဃုထၢန့ၣ် နာ်အီၣ်တသ့ဘၣ်.တလဲၤ ဟ့ၣ်စ့ၫ်ကီးတၫ်ဖးဘၣ်အဂ့ၫ်”ပှၤ၀့ၫ်ပသံၣ်ဖိ ပိာ်မုၣ်တဂၤတဲ၀ဲလီၤ.
သုးခီၣ်မံးရှၢၣ်န့ၣ် တၫ်ဃုထၢအကူာ်(၁)အပူၤ အ့ၣ်ယၣ်၀တံၣ်ကီၫ်ခီပူၤ ပသံၣ်,ဟီကတး,မအူၣ်ပ့ၣ်, လးပိးလၣ်,မၠီမၠး ,ယ့ၣ်ကၠံၣ်,ကၠိၣ်ပၠီၣ်ဒီးကၠၣ်ခ့ကီၫ်ဆၣ်တဖၣ်အပူၤ ကမၤတၫ်ဃုထၢအဂ့ၫ် ဘိးဘၣ်ရၤလီၤဃာ်၀ဲလီၤ.
အ့ၣ်ယၣ်၀တံၣ်ကီၫ်ခီပူၤ သုးဆီၣ်ထွဲဃာ် ကၠးခၣ်ယ့ပၣ်တံၣ်,အူကိၣ်ကိၣ်ကၠံအပၠံၣ်သူးပၣ်တံၣ်ဒီး ဒီၣ်သဲးသဲးခဲၣ် အပၠံၣ်သူးရှ့းဆီၣ်ပၣ်တံၣ်တဖၣ် ဟူးဂဲၤလူၤကရၢကရိတၫ်ဖးအိၣ်၀ဲဘၣ်ဆၣ် ပၣ်တံၣ်အဂၤတဖၣ်တခီ တၫ်တထံၣ် အတၫ်ဟူးတၫ်ဂဲၤတဖၣ်ဘၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
“အခဲအံၤခၢၣ်စးလၢကနုာ်လီၤတၫ်ဃုထၢတဖၣ် တၫ်မ့ၫ်ကွၫ်န့ၣ် မ့ၫ်ပှၤအိၣ်ဃူသုး,တမ့ၫ်ပှၤမူၤပှၤနီၫ်နီတဂၤဘၣ်အဃိ သးတအိၣ်ဟ့ၣ်တၫ်ဖးဘၣ်.မ့ၫ်တဟ့ၣ်တၫ်ဖးဘၣ်န့ၣ် ဘၣ်ယိၣ်လၢကဟဲဃုတၫ်အ့ၣ်လိာ်ဒီးက့ၤဖီၣ်တၫ်လီၤ. မ့ၫ်သ့ဒု တအဲၣ်ဒိးဟ့ၣ်တၫ်ဖးဘၣ်အဂ့ၫ်”ပှၤ၀့ၫ်မၠီးမၠးဖိ ပိာ်မုၣ်တဂၤတဲ၀ဲလီၤ.
လၢကတီၫ်အံၤ ပသံၣ်ဒီးမၠီမၠးပာ်ဃုာ် လီၫ်က၀ီၤအါတက့ၫ်အပူၤ တၫ်ဟ့ၣ်တၫ်ဖးတၫ်ဟ့ၣ်ပီညါ,ကၠးခၣ်ယ့ပၣ်တံၣ် အတၫ်ကရၢကရိတၫ်ဖးအပူၤ တၫ်ကလဲၤထီၣ်ဘၣ်အဂီၫ် ဟ့ၣ်ကမျၢၫ်တၫ်ဆီၣ်သနံးအိၣ်ထီၣ်၀ဲဘၣ်ဆၣ် မၢန့ၫ်ဆူၣ် တၫ်လဲၤကွၫ်တၫ်ဖးစရီဒီးမၢန့ၫ်ဆူၣ် တၫ်ဟ့ၣ်တၫ်ဖးတဖၣ်တခီ တအိၣ်၀ဲဘၣ်အဂ့ၫ် တၫ်သ့ၣ်ညါဘၣ် လၢလီၫ်က၀ီၤ ဖိတဖၣ်အိၣ်န့ၣ်လီၤ.
“ကမျၢၫ်န့ၣ် ဘၣ်သးNLDဒီးဟ့ၣ်၀ဲတၫ်ဖး၀ံၤလံ.နဲၣ်တၫ်လၢကျိဒီးမၢပှၤထၢနုာ်တၫ်ဖးဒု တသ့တဘၣ်အဃိတၫ်ကဖၢနုာ် လီၤ.တၫ်ဃုထၢမ့ၫ်ဂ့ၤပၣ်တံၣ်ခၢၣ်စးတဖၣ်မ့ၫ်ဂ့ၤ တမ့ၫ်သးကစၢၫ်ဆၢဘၣ်.ပှၤလၢသးစၢၫ်ဆၢတၫ်ဃုထၢအိၣ်၀ဲတဒူၣ် လီၤ.အ၀ဲအံၤန့ၣ်မ့ၫ်ဒၣ် ပှၤလၢတန့ၫ်ကမျၢၫ်အတၫ်အဲၣ်,မ့ၫ်ပြၢဒီးNLDတနၢၤနီတဘျီ လၢအမ့ၫ် ပၣ်တံၣ်လၢကနုာ်လီၤ သုးခီၣ်မံးရှၢၣ်အတၫ်ဃုထၢတဖၣ်အဂ့ၫ် NLDပၣ်တံၣ်ခၢၣ်စးလၢမၤနၢၤတၫ်ဖဲ၂၀၂၀နံၣ်တၫ်ဃုထၢအပူၤ ကၣ်ကၠံဒီးကီၫ်ဆၣ် ကမျၢၫ်ဘျီၣ်ဒိၣ်ခၢၣ်စး ကိၣ်၀့ၣ်ယၣ်အီၣ် တဲ၀ဲန့ၣ်လီၤ.
