လါဒံၣ်စ့ဘၢၣ် ၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဒုးလၢကဲထီၣ်သးလၢ ကီၢ်ပယီၤတပၤတဖၣ်အပူၤ ကျိဖးဒိၣ်တဖၣ် လဲၤလီၤတဲၥ်၀ဲဒၣ်ဖဲ ကၠီၣ်တဲၣ်ဟီၣ်က၀ီၤပူၤ၀ံၤအလီၢ်ခံ ကၠီၣ်တဲၣ်သုးမုၢ်ဒိၣ်တခီ ဟ့ၣ်ပလီၢ်ခီၣ်ဆၢခးက့ၤ၀ဲလၢ မ့ၣ်အူလူၢ်မ့ၣ်ပိၢ်ကျိဖးဒိၣ်တဖၣ်န့ၣ်လီၤ.
ကီၢ်ပယီၤတပၤ တၢ်ဒုးလၢကဲထီၣ်သးတဖၣ်အပူၤ ကျိဖးဒိၣ် ၆၀မမ မီၣ်တၣ်ကျိဖးဒိၣ်အဆၣ်(၅)ဖျၢၣ် လဲၤလီၤတဲၥ်၀ဲဒၣ်ဖဲကီၢ်ကၠီၣ်တဲၣ်တၢ်ပၢဟီၣ်က၀ီၤအပူၤအဂ့ၢ် နီၣ်ဂံၢ်(၃) သုးဟီၣ်က၀ီၤပၢဆှၢရဲၣ်ကျဲၤ၀ဲၤကျိၤ ခိၣ်နၢ်ဒိၣ်ထီ သုးခိၣ်ကျၢၢ်စိ ၀ံၣ်ရၣ်သဲးဘိၣ်ညၣ် တဲပၥ်ဂၢၢ်ပၥ်ကျၢၢ်၀ဲန့ၣ်လီၤ.
လၢတၢ်န့ၣ်အဃိ ဒ်သိးကခးလီၤ၀ဲမ့ၣ်အူမ့ၣ်ပိၢ်ကျိဖးဒိၣ်ဆူ ကီၢ်ပယီၤတပၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုးဒီး ကညီတၢ်ပၢၢ်ဆၢဂံၢ်ဘါကရူၢ်တဖၣ် တၢ်ဒုးကဲထီၣ်သး တၢ်လီၢ်ခၢၣ်သး၀ံၤ ကဟ့ၣ်ပလီၢ်၀ဲအဂီၢ် နဲၣ်လီၤ၀ဲ သုးခိးကီၢ်ဆၢသုးတဖၣ်အဂ့ၢ် ဘိၣ်ညၣ်စံး၀ဲန့ၣ်လီၤ.
ရၤမတံကီၢ်ဆၣ်အပူၤ သုးကီၣ်မံးရှၢၣ်အသုးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးတဖၣ်ကဲထီၣ်၀ံၤ ကျိဖးဒိၣ်တဖၣ်လဲၤခီကီၢ်ဆၢ၀ံၤ လဲၤလီၤတဲၥ်၀ဲဒၣ်ဖဲ ကၠီၣ်တဲၣ်, တးကီၢ်စဲၣ်ဟီၣ်က၀ီၤအပူၤန့ၣ်လီၤ.
ကီၢ်ပယီၤတပၤ ၆၀မမကျိဖးဒိၣ်လၢ ခးလီၤ၀ဲတဖၣ် လဲၤလီၤတဲၥ်၀ဲဒၣ်ဖဲ မဲဆီးကီၢ်ရ့ၣ်, ကီၢ်ဆၢဟီၣ်က၀ီၤတဖၣ်အပူၤအဂ့ၢ် တၢ်ထံၣ်၀ဲ၀ံၤအလီၢ်ခံ သုးခိးကီၢ်ဆၢယူးနံးတခါလၢအမ့ၢ် နၣ်ရဲၣ်ဆိၣ်သုးကရၢ က့ၤခးလီၤ၀ဲလၢ ၁၂၀မမ မ့ၣ်အူလူၢ်မ့ၣ်ပိၢ်တဖၣ်အဂ့ၢ် ဘိၣ်ညၣ် တဲလီၤ၀ဲဖဲ လါနိၣ်၀့ဘၢၣ် ၃၀သီအနံၤန့ၣ်လီၤ.
တၢ်တီၣ်ဖျါထီၣ် တၢ်ပၥ်ဖျါအဖီခိၣ် ကျိဖးဒိၣ်လၢဟဲလီၤ၀ဲဒၣ်ဖဲ ကၠီၣ်တဲၣ်ဟီၣ်က၀ီၤပူၤ အက့အခီတဖၣ် ဟဲဘၣ်၀ဲအဃိ ဟံၣ်(၁)ဖျၢၣ် ဘၣ်ဟးဂီၤကွံၥ်၀ဲ တဆံးတက့ၢ်အဂ့ၢ် ဘိၣ်ညၣ်စံး၀ဲန့ၣ်လီၤ.
၀ံၤအလီၢ်ခံ ကီၢ်ပယီၤပှၤစံၣ်သုးပှၤလီၢ်အိၣ်ကမှံဖိ ပိၥ်မုၣ်(၁)ဂၤဒီး ဖိသၣ်(၁)ဂၤစ့ၢ်ကီး ဘၣ်ဒိၣ်၀ဲလၢတအိၣ်ဒီးတၢ်ဘၣ်ယိၣ်ဘၣ်အဂ့ၢ် ကၠီၣ်တဲၣ်သုးမုၢ်ဒိၣ် ထုးထီၣ်ပၥ်ဖျါဃၥ်၀ဲန့ၣ်လီၤ.
ကီၢ်ဆၢတၢ်ဘံၣ်တၢ်ဘၢအဂီၢ် နီၣ်ဂံၢ်(၃) သုးဟီၣ်က၀ီၤပၢဆှၢရဲၣ်ကျဲၤ၀ဲၤကျိၤနဲၣ်လီၤဃၥ်၀ဲ သုးခိးကီၢ်ဆၢသုးတဖၣ်၀ံၤ ကၠီၣ်တဲၣ်ထံဖိကီၢ်ဖိတၢ်ဘံၣ်တၢ်ဘၢန့ၣ် တၢ်ကပၥ်အီၤဒ်အဆိတက့ၢ်မူဒါအသိးအဂီၢ် နဲၣ်လီၤဃၥ်၀ဲအဂ့ၢ် ဘိၣ်ညၣ်စံး၀ဲန့ၣ်လီၤ.
