လါနိၣ်၀့ဘၢၣ် ၂၉သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ကၠီၢ်တဲၣ်-ပယီၤကီၢ်ဆၢ ရၤမတံ၀့ၢ်ကလံၤထံး, မ့လဲးပၣ်သ၀ီအပူၤအိၣ် အိၣ်လဲတၢ်လံၣ်တၢ်လီကျိၥ်စ့ကရၢၢ်အပူၤ ကီၢ်ပယီၤပှၤမၤတၢ်ဖိ ဘူးထီၣ် ၁,၀၀၀ဃၣ်ဃၣ် က့ၤဆူအအိၣ်ဆိးလီၢ်ကျဲ ဖဲမဟါအနံၤ နိၣ်၀့ဘၢၣ် ၂၇သီ, မုၢ်ထူၣ် ၁နၣ်ရံၣ်ဃၣ်ဃၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
ကညီဒီကလုၥ်စၢဖှိၣ်ကရၢ (KNU) ဒီး ကမျၢၢ်တၢ်ဒီသဒၢသုး (PDF)တဖၣ် နုၥ်လီၤဖီၣ်၀ဲ အိၣ်လဲတၢ်လံၣ်တၢ်လီကရၢၢ်အပူၤ လၢ ၅သီအနံၤန့ၣ် ကီၢ်ပယီၤပှၤမၤတၢ်ဖိတဖၣ် က့ၤဆူအအိၣ်ဆိးလီၢ်ကျဲအဂ့ၢ် တၢ်သ့ၣ်ညါဘၣ်န့ၣ်လီၤ.”
“ပှၤလၢက့ၤ၀ဲတဖၣ်အကျါ သးစၢ်လၢသးနံၣ်အိၣ် ၂၀ဒီး၃၀ဃၣ်ဃၣ်တဖၣ်ပၣ်ဃုၥ်လီၤ. သုးကီၣ်မံးရှၢၣ်တပၤ ကအိးထီၣ်န့ၢ်ကျဲ စးထီၣ်လၢ မုၢ်ထူၣ် (၁း၃၀)နၣ်ရံၣ်တုၤ (၂)နၣ်ရံၣ်လီၤ. ဖဲအတီၢ်ပူၤ တၢ်ကဘၣ်ဟးထီၣ်၀ဲ အ၀ံၥ်အတဲၥ်လီၤ. ကလဲၤ၀ဲဆူ ၀့ၢ်ရၤမတံ၀ံၤ စိၥ်၀ဲ တၢ်ပိၥ်အဒိၣ်အဆံးတဖၣ်၀ံၤ လဲၤ၀ဲ”အဂ့ၢ် မ့လဲးပၣ်လီၢ်က၀ီၤဖိ တဂၤစံး၀ဲန့ၣ်လီၤ.
ပှၤလၢက့ၤလီၤအိၣ်ဆူ ရၤမတံတဖၣ်တခီ က့ၤ၀ဲလၢ ခီၣ်, မီၣ်တီၣ်တုၥ်, သိလ့ၣ်ဒိးဟံၣ်ဒီး သိလ့ၣ်တီၣ်တၢ်ဖိတၢ်လံၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤမၤတၢ်ဖိလၢမၤတၢ်ဖဲ အိၣ်လဲတၢ်လံၣ်တၢ်လီကျိၥ်စ့ကရၢၢ်ပူၤတဖၣ် ဟးထီၣ်လၢ မ့လဲးပၣ်ဒီးလဲၤဆူအ့ကၠ့မၠဲၣ်သ၀ီ ကျဲအပူၤ သုးကီၣ်မံးရှၢၣ်တပၤ ခးပျံၤခးဖူး၀ဲလၢ ကျိဖးဒိၣ် ၁ဖျၢၣ်ဒီး ပွဲးဖဲးန့ၣ်လီၤ.
ကညီဒီကလုၥ်စၢဖှိၣ်ကရၢ(KNU) ဒီး (PDF)တဖၣ်ပၥ်ဖှိၣ်ထီၣ်သး၀ံၤ နိၣ်၀့ဘၢၣ် ၂၃သီအနံၤန့ၣ် လဲၤနုၥ်လီၤဖီၣ်တၢ်ဖဲ ရၤမတံ၀့ၢ်ကလံၤထံး, မ့လဲးပၣ်သ၀ီ (DKBA) ဒီသဒၢန့ၢ်ဃၥ် Shunda Park တရူးမၣ်ဖံယါကဲတီခိၣ်ရိၣ်မဲ အိၣ်လဲတၢ်လံၣ်တၢ်လီကရၢၢ်တခါအပူၤအဂ့ၢ် KNU ဘိးဘၣ်ရၤလီၤဃၥ်၀ဲန့ၣ်လီၤ.
ပှၤကီၢ်ချၢဖိလၢမၤအိၣ်လဲတၢ်လံၣ်တၢ်လီကျိၥ်စ့တၢ်မၤတဖၣ် ကက့ၤဆူအအိၣ်ဆိးလီၢ်ကျဲလၢ ကီၢ်ကၠီၣ်တဲၣ်တဆီအဂီၢ် ကွၢ်ဆၢၣ်မဲၥ်ဘၣ်ဒီး တၢ်ကီတၢ်ခဲ၀ံၤ အိၣ်ကးတံၥ်အသးဖဲ ကၠီၣ်တဲၣ်-ပယီၤကီၢ်ဆၢ သူမှဲကျိထံကၢၢ်နံၤန့ၣ်လီၤ.
အိၣ်လဲတၢ်လံၣ်တၢ်လီကျိၥ်စ့ကရၢၢ်လၢ တၢ်နုၥ်လီၤဖီၣ်၀ဲအံၤန့ၣ် DKBA နီၣ်ရံၣ်(၉၀၅)သုးရ့ၣ်ခိၣ်-၂ သုးခိၣ်ဒိၣ်ဖိ စီၤကၠီၣ်ကိၣ်မ့(ခ) သခွါသံ တီခိၣ်ရိၣ်မဲမၤ၀ဲ တၢ်မၤလီၢ်ကရၢၢ်အဂ့ၢ် တၢ်သ့ၣ်ညါဘၣ်န့ၣ်လီၤ. သုးခိၣ်ဒိၣ်ဖိ စီၤကၠီၣ်ကိၣ်မ့(ခ) သခွါသံအံၤ DKBA ထုးထီၣ်ကွံၥ်အီၤ ဖဲနိၣ်၀့ဘၢၣ် ၂၄သီအနံၤလၢ သုးတၢ်သိၣ်တၢ်သီအဆၢဒိၣ်(၂)လၢ မူဒါအပူၤလၢ တမၤလၢပှဲၤမၤဒါ, သုးတၢ်သိၣ်တၢ်သီအဆၢဒိၣ်(၁၃)လၢ မၤတလၢကွံၥ်မူဒါလၢ တၢ်ဟ့ၣ်လီၤဃၥ်အီၤအဂ့ၢ်ဒီး ထုးထီၣ်ဃၥ်၀ဲ တၢ်ဖီၣ်တၢ်ပျဲအဂ့ၢ် တၢ်သ့ၣ်ညါဘၣ်န့ၣ်လီၤ.
နိၣ်၀့ဘၢၣ် ၂၃သီအနံၤန့ၣ် ပှၤလၢဖံးမၤတၢ်လၢ အိၣ်လဲတၢ်လံၣ်တၢ်လီကျိၥ်စ့တၢ်မၤကရၢၢ်ပူၤ ကီၢ်ပယီၤပှၤမၤတၢ်ဖိ ပိၥ်မုၣ်၃ဂၤ သုးကီၣ်မံးရှၢၣ် ခးသံ၀ဲဒံးန့ၣ်လီၤ. တကးဘၣ် ကမျၢၢ်တနီၤ ဘၣ်ဒိဘၣ်ထံး၀ဲအဃိ ဘၣ်တၢ်ကူစါယါဘျါန့ၢ်အီၤအဂ့ၢ် တၢ်သ့ၣ်ညါဘၣ်န့ၣ်လီၤ.
