လါနိၣ်ဝ့ဘၢၣ် ၂၈သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-သုးက့(၅)ဟီၣ်ကဝီၤအပူၤ သုးကီၣ်မ့းရှၢၣ်သုးကျိၤလၢဟဲထီၣ်သုးကျိၤတန့ၢ်တဖၣ် BGFသုးဒီး ဘိၣ်ဘံးတီခိၣ်ရိၣ်မဲ DKBAသုးတဖၣ် ဃုန့ၢ်ကျဲသီဝံၤ ကလဲၤသုးကျိၤလၢBGFနီၣ်ဂံၢ် ၁၀၁၃အိၣ်သူၣ်လီၤတၢ်လီၢ်တဖၣ်လၢအမ့ၢ် နိးထၣ်, ပွဲၢ်ထၣ်, တဒွံခိ, တခီၣ်ခိး, လၢၢ်ကွဲတဖၣ်အပူၤအဂ့ၢ် လီၢ်ကဝီၤဖိတဖၣ် စံးဝဲန့ၣ်လီၤ.
တကးဘၣ် သုးကီၣ်မံးရှၢၣ်သုးလၢဟဲထီၣ်သုးကျိၤတဖၣ်အဂီၢ် လီၢ်ကဝီၤသုးတဖၣ် ခးစၢၤဝဲဒၣ်လၢ ကျိဖးဒိၣ်ဒီး ကလံၤကျါတဖၣ်အဂ့ၢ် ဂံၢ်ခီၣ်ထံးတၢ်ကစီၣ် စံးဝဲန့ၣ်လီၤ.
နိၣ်ဝ့ဘၢၣ် ၂၇သီအနံၤ, ဟါ၈နၣ်ရံၣ်ဃၣ်ဃၣ်အဆၢကတီၢ် သုးကီၣ်မံးရှၢၣ်အသုး လဲၤတ့ၢ်လီၤမ့ၣ်ပိၢ် ဖဲ ခ့ၣ်အဲၣ်ယူၣ်-သုးက့(၅), ဘုသိၣ်ကီၢ်ဆၣ်, ဖၣ်ပူၣ်လၥ်ခီတကပၤလၢ ကဘီယူၤ ၂ခိၣ်လၢ တစှၤန့ၢ်မ့ၣ်ပိၢ် (၄၀)ဖျၢၣ်အဂ့ၢ် လီၢ်ကဝီၤဂံၢ်ခီၣ်ထံးတၢ်ကစီၣ် စံးဝဲန့ၣ်လီၤ.
“စှၤသီအတီၢ်ပူၤ တၢ်ဘၣ်သဂၢၢ်ခးလိၥ်သးတအိၣ်ဘၣ်. သုးကီၣ်မံးရှၢၣ်တပၤမ့ဟူးထီၣ်န့ၣ် လၢတပၤခီၣ်ဆၢက့ၤဝဲတဘျီဃီလီၤ. ကမးမိၢ်, ကတါအူ, ကတၢးတံးအိၣ်သူၣ်လီၤသုးကီၣ်မံးရှၢၣ်သုးကလၢၤတဖၣ် ခးလီၤစၢၤ၀ဲကျိဖးဒိၣ်တဖၣ် ခဲအံၤခဲအံၤအဂ့ၢ်” လီၢ်က၀ီၤတၢ်ပၢၢ်ဆၢသုးဖိတဂၤ စံး၀ဲန့ၣ်လီၤ.
သုးက့(၅)ဟီၣ်က၀ီၤအပူၤ သုကလၢၤလၢဘၣ်တၢ်ပျၢ်ကွံၥ်၀ဲတဖၣ် ဒ်သိးကဒုးန့ၢ်က့ၤဒီး ကဒိၣ်စိက့ၤဟီၣ်က၀ီၤတဖၣ်အဂီၢ် သုးကီၣ်မံးရှၢၣ်သုးတဖၣ်, သုးခိၣ်ခၠံးမီၣ် တီခိၣ်ရိၣ်မဲ BGF၁၀၁၄, သုးခိၣ်လးကၠဲၣ်တီခိၣ်ရိၣ်မဲ BGFနီၣ်ဂံၢ် ၂၀၁၃အစုတီၤဖီလၥ် သုးတဖၣ်ဒီး ဘိၣ်ဘံးတီခိၣ်ရိၣ်မဲ DKBAသုးပၥ်ဖှိၣ်တဖၣ် ပၥ်ဖှိၣ်ထီၣ်သးဝံၤဟဲထီၣ်သုးကျိၤအဂ့ၢ် လီၢ်ကဝီၤဖိတဖၣ် စံးဝဲန့ၣ်လီၤ.
သုးကီၣ်မံးရှၢၣ်သုးပၥ်ဖှိၣ်သုးကျိၤလၢ ကလဲၤထီၣ်လၢ ကမးမိၢ်ဆူ ကတၢးတံး-ဖၣ်ပူၤတပၤအဂီၢ် လီၢ်ကဝီၤBGF ဒီးDKBAသုးတဖၣ် နဲၣ်ဝဲကျဲဒီးဟဲထီၣ်သုးကျိၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကလၢၤဒီးဟီၣ်ကဝီၤလၢ ဘၣ်ပျၢ်ကွံၥ်ဝဲတဖၣ် ဒ်သိးပၢဆှၢက့ၤကန့ၢ်အဂီၢ် ကလဲၤထီၣ်ဆူ ကမးမိၢ်-ဖၣ်ပူၣ်အဂီၢ် သုးကီၣ်မံးရှၢၣ်အသုး,BGF,DKBA တဖၣ် ဟဲထီၣ်ဝဲသုးကျိၤ အိၣ်ထီၣ်၄လါဘျဲၣ်လံန့ၣ်လီၤ.
သုးကီၣ်မံးရှၢၣ်သုးကျိၤလၢ ဟဲထီၣ်သုးကျိၤတဖၣ်အံၤ KNLA, PDFပၣ်ဃုၥ်တၢ်ပၢၢ်ဆၢသုးပၥ်ဖှိၣ်တဖၣ် ကဝီၤကးတံၥ်ဒုးဝဲအဃိ ဟဲထီၣ်ဝဲဆူဝၣ်သိခိၣ်တန့ၢ်ဘၣ်အသိး ဟီၣ်ခိၣ်မဲၥ်ဖံးခိၣ် သုးမၤစၢၤတဖၣ် ခးစၢၤဝဲလၢကျိဖးဒိၣ်, ဒြိ, ကဘီယူၤတဖၣ်ဘၣ်ဆၣ် ဟဲထီၣ်တၢ်မဲၥ်ညါတန့ၢ်ဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
KNLA သိၣ်မှံသုးပၥ်ဖှိၣ်တဖၣ် ဒုးအီၤအဃိ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်သုးပၥ်ဖှိၣ်သုးကျိၤအပူၤ သုးခိၣ်ဘိၣ်ဘံးတီခိၣ်ရိၣ်မဲ DKBAသုးဖိတဖၣ် ဘၣ်ဒိဘၣ်ထံးဝဲအအါကတၢၢ်လီၤအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးဖိတဂၤအအိၣ်န့ၣ်လီၤ.
သုးကီၣ်မံးရှၢၣ်သုးပၥ်ဖှိၣ်တဖၣ်အံၤ အပှၤသုးဖိလၢဘၣ်ဒိဝဲတဖၣ် တီၣ်ဝဲလၢသိလ့ၣ်(၂)ခိၣ်ဒီး လဲၤဆှၢဝဲဆူ ဖၣ်အၣ်, တီၣ်ကလ့တၢ်ဆါဟံၣ်လၢ ဟါ ၁၁နံၣ်ရံၣ်ဘျဲၣ်အဆၢကတီၢ်အဂ့ၢ် အဝဲစံးဝဲန့ၣ်လီၤ.
