လါနိၣ်၀့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်ပယီၤကီၢ်ဆၢ,မ့လဲးပၣ်ဟီၣ်က၀ီၤအပူၤအိၣ်DKBAခိၣ်နၢ်ပၢဆှၢအစုတီၤဖီလၥ်ကၠါဖၠးတၢ်မၤလီၢ်တဖၣ်လၢအလဲၤသရံးတဖၣ်အပူၤတၢ်ပီးတၢ်လီလၢဘၣ်တၢ်ဖီၣ်န့ၢ်၀ဲတဖၣ်တၢ်တမၤဟးဂီၤကွံၥ်၀ဲဘၣ်ဒီးကဆီတလဲဟ့ၣ်လီၤ၀ဲဆူပှၤဘၣ်မူဘၣ်ဒါတဖၣ်အအိၣ်၀ံၤပှၤလၢပၣ်ဃုၥ်ဘၣ်ထွဲဒီးပှၤလၢအိၣ်၀ဲလၢတၢ်လီၢ်ခံတဖၣ်တၢ်ကသမံသမိးမၤဖျါထီၣ်၀ဲအဂ့ၢ် KNU ပှၤကတိၤတၢ်ပၢ ပဒိၣ်စီၤတီနံ စံး၀ဲန့ၣ်လီၤ.
“တၢ်လၢယအဲၣ်ဒိးတဲ (၁)တထံၣ်န့ၣ် ပတမၤဟးဂီၤကွံၥ် တၢ်ပီးတၢ်လီတဖၣ်ဘၣ်. ဘၣ်မနုအဃိလဲၣ် တၢ်မ့ၢ်အဲၣ်ဒိးသ့ၣ်ညါ တၢ်မၤနီၣ်မၤဃါတဖၣ်န့ၣ် တၢ်ဖံးတၢ်မၤတဖၣ်အံၤ မတၤတဖၣ်မၤ၀ဲလဲၣ်ဒီး မတၤတဖၣ်အိၣ်ဆၢထၢၣ်လၢတၢ်လီၢ်ခံဒီး နဲၣ်လီၤဟ့ၣ်တၢ်ကလုၢ်လဲၣ်န့ၣ် ပအဲၣ်ဒိးသ့ၣ်ညါ၀ဲခဲလၢၥ်လီၤ. တၢ်အံၤန့ၣ် ပမၤတန့ၢ်ခဲလၢၥ်ဘၣ်ဆၣ် ပကန့ၢ်ဘၣ်အါမးလီၤ. တၢ်အံၤသ့ၣ်တဖၣ်အဖီခိၣ် တၢ်ဖိတၢ်လံၤတဖၣ်န့ၣ် ပတမၤဟးဂီၤကွံၥ်အီၤဘၣ်. ပကပၢၤဃၥ်အီၤလီၤ. ၀ံၤအလီၢ်ခံ ပကဟ့ၣ်ဆီတလဲဟ့ၣ်လီၤဆူ ပှၤဘၣ်မူဘၣ်ဒါတဖၣ်ဒီး ပှၤသ့ပှၤဘၣ်တဖၣ်အအိၣ်န့ၣ်လီၤတံၢ်လီၤ. “
ဖဲအပူၤကွံၥ် လါနိၣ်၀့ဘၢၣ် ၂၁သီအနံၤန့ၣ် KNLAတၢ်ပၢၢ်ဆၢသုးပၥ်ဖှိၣ်ဒီး သုးကီၣ်မံးရှၢၣ်အသုးအဘၢၣ်စၢၤ တၢ်ဒုးကဲထီၣ်လၢ မ့လဲးပၣ်သ၀ီပူၤ၀ံၤ ဖဲသ၀ီပူၤအိၣ်ကၠါဖၠးအပူၤအိၣ် DKBAအပှၤသုးဖိတဖၣ်ခး၀ဲလၢကျိအဃိ လၢတၢ်တပညိၣ်အပူၤ တၢ်နုၥ်လီၤဒုး၀ဲဒီး တၢ်သ့ၣ်ညါဘၣ်လၢ ကၠါဖၠးတၢ်မၤလီၢ်အဂ့ၢ် KNUထုးထီၣ်ပၥ်ဖျါဃၥ်၀ဲန့ၣ်လီၤ.
“တၢ်အံၤ တၢ်မနုလဲၣ်န့ၣ် DKBA ကရၢန့ၣ် အမၤသကိးတၢ်ဒီး ဒုၣ်ဒါလီၤ. တၢ်၀ဲန့ၣ် ပသုးကရၢတဖၣ် နုၥ်လီၤရှဲပျီကွံၥ်၀ဲလီၤ. တၢ်နုၥ်လီၤရှဲ၀ဲအဆၢကတီၢ် လၢတၢ်တမုၢ်လၢ်အပူၤ တၢ်လဲၤဖီၣ်န့ၢ်၀ဲ ကၠါဖၠးတၢ်မၤလီၢ်ဖးဒိၣ်တလီၢ်န့ၣ်လီၤ. ဖဲပလဲၤနုၥ်လီၤရှဲပျီ၀ဲဒၣ်န့ၣ် ဖဲ နိၣ်၀့ဘၢၣ် ၂၁သီအနံၤန့ၣ်လီၤ. ဖဲအနံၤလၢ ပနုၥ်လီၤရှဲပျီတၢ်အလီၢ်န့ၣ် မ့ၢ်DKBAတၢ်လီၢ်လၢ သုးခိၣ်ဒိၣ်စိ နၢၤလွ့ၣ်ပၢဆှၢအလီၢ်လီၤ. အ၀ဲန့ၣ် အကဲ၀ဲ စဲကၠီၣ်လးအပျဲၢ်လီၤ. စဲၣ်ကၠီၣ်လးန့ၣ် မ့ၢ်ပှၤတဂၤလၢ US ကးတံၥ်ဟံးန့ၢ်ဂ့ၢ်၀ီ Sanctionsအကျါပၣ်ဃုၥ်လီၤ. တၢ်အံၤတခီ ပဘိးဘၣ်ရၤလီၤပၥ်ဖျါတ့ၢ်လံ”အဂ့ၢ် ပဒိၣ်စီၤတီနံ စံးအါထီၣ်၀ဲန့ၣ်လီၤ”
ဖဲလၢတၢ်နုၥ်လီၤရှဲပျီတၢ်အဆၢကတီၢ် DKBAအပှၤသုးဖိ ၂၃၀ဘျဲၣ်ပၥ်လီၤစုက၀ဲၤ၀ံၤ, ကၠါဖၠးတၢ်မၤလီၢ်လၢ ဆီလီၤဃၥ်ဘံၣ်ဘၢဃံးဃံးအံၤအပူၤ တၢ်ဖီၣ်န့ၢ်၀ဲ ကၠါဖၠးပှၤမၤတၢ်ဖိ ၂ကထိဃၣ်ဃၣ်န့ၣ်လီၤ. ဖဲန့ၣ်အကျါ ပှၤတရူးထံဖိကီၢ်ဖိပၣ်ဃုၥ်၀ဲ အအါကတၢၢ်လီၤဒီး ကၠီၣ်တဲၣ်, လၣ်အိၣ်, မလ့ရှါ, ဖံးလံးပံး, ဘ့ကလါဒ့း, ထဲၣ်၀ၣ်, ဟီၣ်ကီၣ်, အံၣ်သံၣ်ရိဘံယါ, ရ၀ၣ်တၣ်ဒီး အံၣ်ကၠ့းထံဖိကီၢ်ဖိတဖၣ် ပၣ်ဃုၥ်၀ဲအဂ့ၢ် စံး၀ဲန့ၣ်လီၤ.
အ၀ဲသ့ၣ်တဖၣ် ကက့ၤဆူအိၣ်ဆိးလီၢ်ကျဲပၣ်ဃုၥ် တၢ်ကမၤသမံသမိးမၤဖျါထီၣ် ကၠါဖၠးတၢ်လံၣ်တၢ်လီကျိၥ်စ့ကဲတဖၣ်အဂီၢ် လိၣ်ဘၣ်၀ဲ ဟီၣ်ခိၣ်ဘီမုၢ်ထံကီၢ်တဖၣ် အတၢ်ပၥ်ဖှိၣ်မၤသကိးအဂ့ၢ် KNU စံး၀ဲန့ၣ်လီၤ.
“တၢ်န့ၣ်အဃိ ဒ်သိးတၢ်ကဒုးလီၤပှီၢ်ကွံၥ် ကၠါဖၠးတဖၣ်အပူၤ ဟီၣ်ခိၣ်ဘီမုၢ်ထံကီၢ်တဖၣ် မ့ၢ်တပၣ်ဃုၥ်န့ၣ် ပမၤတသ့နီတမံၤဘၣ်. ဒ်သိး အ၀ဲသ့ၣ်ကက့ၤဆူအိၣ်ဆိးလီၢ်ကျဲတဖၣ်ဒၣ်လဲၣ် တၢ်ဂ့ၢ်ကီအိၣ်လီၤ. အဃိ တၢ်သ့ၣ်တဖၣ်အံၤ ပတဲအီၤဖးယံၥ်လံ. သနၥ်က့တကဲထီၣ်ဘၣ်. တကဲထီၣ်ဘၣ်စံးတၢ်န့ၣ် ကီခဲဒိၣ်မးလီၤ.ထံကီၢ်တဘ့ၣ်စုၥ်စုၥ်အကဒဲကဒဲအပတီၢ် တၢ်ရ့ၣ်လိၥ်မုၥ်လိၥ်ခဲလၢၥ်လီၤ. ဘၣ်ဆၣ်နၥ်က့ ပတဲကိးဆၢကတီၢ်ဒဲးလီၤ ပမ့ၢ်မၤ၀ဲဒ်အံၤန့ၣ် တၢ်တကဲထီၣ်နီတမံၤဘၣ်. ဒ်လဲၣ်ဂ့ၤန့ၣ် တၢ်ကဒုးလီၤပှီၢ်ကၠါဖၠးတဖၣ်အဂီၢ် လၢတၢ်နၢ်ပၢၢ်အပူၤ ကပၥ်ဖှိၣ်မၤသကိးတၢ်ဒီး ထံကီၢ်လၢအိၣ်ဘူးလိၥ်သးတဖၣ်မ့ၢ်ဂ့ၤ, ထံကီၢ်လၢအိၣ်ယံၥ်တဖၣ်မ့ၢ်ဂ့ၤ, တၢ်ကရၢကရိတဖၣ်မ့ၢ်ဂ့ၤ, အ့ၣ်ကၠ့ၣ်စံၣ်တဖၣ်မ့ၢ်ဂ့ၤ ကပၥ်ဖှိၣ်မၤသကိးတၢ်လၢ ကျဲအကလုၥ်ကလုၥ်အဂ့ၢ်” KNU ပှၤကတိၤတၢ်ပၢ ပဒိၣ်စီၤတီနံ စံး၀ဲန့ၣ်လီၤ.
ဘၣ်ထွဲဒီးတၢ်ဂ့ၢ်အံၤအဖီခိၣ် တၢ်ဆဲးကျိးသံကွၢ် DKBA၀ဲၤလီၢ်ခိၣ်သ့ၣ် အတၢ်ဘၣ်သးအဖီခိၣ်ဘၣ်ဆၣ် တၢ်တသ့ၣ်ဘၣ်ဒံး၀ဲ ဟီၣ်ခိလိၤတၢ်အိၣ်သးတဖၣ် လီၤတံၢ်လီၤဆဲးဒံးဘၣ်အဃိ ကတဲဖျါထီၣ်အဂီၢ် တအိၣ်နီတမံၤဒံးဘၣ်အဂ့ၢ် ခီၣ်ဆၢတဲက့ၤဒ်န့ၣ်န့ၣ်လီၤ.
ကၠီၣ်တဲၣ်-ပယီၤကီၢ်ဆၢဒီတကျိၤအပူၤ ကၠါဖၠးတၢ်မၤလီၢ် အိၣ်၀ဲ (၄၀)ဃၣ်ဃၣ်၀ံၤ ကညီသုးခိးကီၢ်ဆၢ(BGF)ဒီး DKBAတဖၣ် ဟံးန့ၢ်၀ဲတၢ်ဘံၣ်တၢ်ဘၢအဖီခိၣ် လဲၤသရံး၀ဲတၢ်မၤတဖၣ်၀ံၤ ကိးနံၣ်ဒဲး ဒိးန့ၢ်ဘၣ်၀ဲ အမဲရကၤဒီလၣ်ဘံၣ်လံၣ်ယၣ်အါအါဂီၢ်ဂီၢ်လၢ တဖိးသဲစးအကျဲန့ၣ်လီၤ. ကၠါဖၠးတၢ်ဖံးတၢ်မၤတဖၣ် တကးဘၣ် တၢ်ပိၥ်ထွဲထီၣ်အခံလၢအမ့ၢ် တၢ်ကူလဲၢ်မၤကၤပှၤကညီ, တၢ်မၢဆူၣ်မၢဆိးတၢ်တဖၣ်ပၣ်ဃုၥ် တၢ်မၤကမၣ်ပှၤဂ့ၢ်၀ီခွဲးယၥ်တဖၣ်စ့ၢ်ကီး အိၣ်ထီၣ်၀ဲအါအါဂီၢ်ဂီၢ်အဂ့ၢ် လံၥ်ပၥ်ဖျါတဖၣ် စံး၀ဲန့ၣ်လီၤ.
