လါနိၣ်၀့ဘၢၣ် ၁၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဘျံး-ဒ၀ဲၢ်, တနီသရံၣ်ကီၢ်ဆၣ်အပူၤ ခီဖျိတၢ်ထီၣ်ဒုး မိဒီၢ်၀့ၢ်တၢ်ဒုးအဃိ လီၢ်က၀ီၤကမျၢၢ်ဖိလၢအကထိတဖၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်လၢ ပှၤလၢမၤစၢၤ၀ဲပှၤလီၢ်အိၣ်ကမှံဖိတဖၣ်အအိၣ်န့ၣ်လီၤ.
လါနိၣ်၀့ဘၢၣ် ၁၁သီအနံၤ, သုးကီၣ်မံးရှၢၣ်အသုးဒီး KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် တၢ်ဒုးကဲထီၣ်လၢ မိဒီၢ်၀့ၢ်ပူၤအဆၢကတီၢ် ခီဖျိသုးကီၣ်မံးရှၢၣ်အသုး ခးကျိဖးဒိၣ်ဒီးကလံၤကျါတၢ်ဒုးတဖၣ်အဃိ လီၢ်က၀ီၤကမျၢၢ်ဖိတဖၣ် ဘၣ်ဃ့ၢ်ပူၤဖျဲးသးလၢ မုၢ်နၤခီအဆၢကတီၢ်အဂ့ၢ် စံး၀ဲန့ၣ်လီၤ.
ဖဲ၀ံၤအလီၢ်ခံ လါနိၣ်၀့ဘၢၣ် ၁၄သီအနံၤ, တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ မိဒီၢ်၀့ၢ်ဘၣ်ဆၣ် သုးကီၣ်မံးရှၢၣ်အသုးအံၤ တုၤလၢမုၢ်မဆါတနံၤအံၤဒၣ်လဲၥ် မၤ၀ဲကလံၤကျါတၢ်ဒုးတဖၣ်အဃိ လီၢ်က၀ီၤဖိတဖၣ် က့ၤဆူအဟံၣ်ဃီတဘူၣ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“၁၁သီအနံၤဟါအဆၢကတီၢ် တၢ်ဒုးစးထီၣ်ကဲထီၣ်သးလံၤလံၤန့ၣ် သုးကီၣ်မံးရှၢၣ်အသုး ခးလီၤကျိဖးဒိၣ်တဖၣ်အဃိ ဘၣ်ဃ့ၢ်ပူၤဖျဲးအသးလီၤ. တုၤတနံၤအံၤဒၣ်လဲၥ် ဘၣ်ဃ့ၢ်ပူၤဖျဲးသးဒံးလီၤ. က့ၤဆူဟံၣ်ဃီတန့ၢ်ဒံးဘၣ်. ဟဲတ့ၢ်လီၤမ့ၣ်ပိၢ်လၢကလံၤကျါ တုၤလၢမဟါ ၉နၣ်ရံၣ်န့ၣ်လီၤ. တဂီၤအံၤတခီ တနၢ်ဟူဘၣ်ဒံးဘၣ်အဂ့ၢ်” ကိၣ်မၠ့ၣ်ကၠံလၢ အမၤစၢၤ၀ဲ ပှၤလီၢ်အိၣ်ကမှံဖိတဖၣ်စံး၀ဲန့ၣ်လီၤ.
မိဒီၢ်တၢ်ဒုးအပူၤ သုးကီၣ်မံးရှၢၣ်အသုး ခးလီၤကျိဖးဒိၣ်ဒီးမၤကလံၤကျါတၢ်ဒုးတဖၣ်အဃိ လီၢ်က၀ီၤဖိတဖၣ် တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်၀ဲဘၣ်ဆၣ် တၢ်တသ့ၣ်ညါဘၣ်ဒံး၀ဲလီၤတံၢ်လီၤဆဲးဒံးဘၣ်. လီၢ်က၀ီၤဖိတဖၣ်လၢဘၣ်ဃ့ၢ်ပူၤဖျဲးအသးန့ၣ် ခီဖျိအိၣ်နီၤဖးလိၥ်သး တၢ်လီၢ်၃တီၤအဃိ တၢ်ဆီၣ်ထွဲမၤစၢၤအဂီၢ်စ့ၢ်ကီး တၢ်ကီတၢ်ခဲအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ပှၤလီၢ်အိၣ်ကမှံဖိနီၣ်ဂံၢ်န့ၣ် အိၣ်နီၤဖးလိၥ်အသး ၃တီၤလီၤ. ဒူသ၀ီအပူၤ တၢ်လီၢ်လၢကြၢးအပူၤ အိၣ်ကဒု၀ဲတဒူၣ်လီၤ. ဖဲန့ၣ် န့ၣ် ကအိၣ်၀ဲ ၄၀၀, ၅၀၀လီၤ. ထံကီၢ်ခံဘ့ၣ်ကီၢ်ဆၢအဘၢၣ်စၢၤတခီ ကအိၣ်၀ဲ ၁၇၀၀ဃၣ်ဃၣ်လီၤ. တၢ်လီၢ်လၢတၢ်ဆှၢတၢ်အီၣ်တၢ်အီကီအလီၢ်တခီဒု ကအိၣ်၀ဲ ၁၀၀၀ဃၣ်ဃၣ်လီၤ. ကမျၢၢ်ဖိလၢလဲၤဃ့ၢ်အိၣ်ကဒုဖဲ ကၠီၢ်တဲၣ်ကီၢ်ဆၢတဖၣ်ဒု ဘၣ်လီၣ်ဘၣ်စးခဲလၢၥ်လီၤ. တၢ်အီၣ်တၢ်အီမ့ၢ်ဂ့ၤ ,တၢ်အိၣ်ဆူၣ်အိၣ်ချ့မ့ၢ်ဂ့ၤ” ကိၣ်မၠ့ၣ်ကၠံ စံးအါထီၣ်၀ဲန့ၣ်လီၤ.
ဒ်သိးကဒုးန့ၢ်က့ၤ မိဒီၢ်၀့ၢ်အဂီၢ် သုးကီၣ်မံးရှၢၢ်အသုးတပၤ ဟဲဒုးတ့ၢ်လီၤတၢ်လၢကလံၤကျါ တဘီယူၥ်ဃီအဂ့ၢ် တၢ်သ့ၣ်ညါဘၣ်န့ၣ်လီၤ.
