လါနိၣ်၀့ဘၢၣ် ၁၇သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
အ့ၣ်ယၣ်၀တံၣ်ကီၢ်ခီ, မအူၣ်ပ့ၣ်ကီၢ်ဆၣ်အပူၤ သုးကီၣ်မံးရှၢၣ်အစုတီၤဖီလၥ် ပၢပြးခိၣ်ဒီးကရၢတဖၣ် ဖီၣ်၀ဲကမျၢၢ်ဖိလၢဖှီၣ်ယၥ်တဖၣ်၀ံၤ ဆါအီၣ်၀ဲလၢ ကမျၢၢ်တၢ်ဘၣ်ကဲသုးအဂီၢ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.
ကမျၢၢ်တၢ်ဘၣ်ကဲသုးအဂီၢ် ပှၤလၢဆါအီၣ်ကမျၢၢ်တဖၣ်န့ၣ်မ့ၢ်၀ဲ ရွ့ၣ်တီၣ်မီၣ်ကရူၢ်, ရွ့ၣ်တီၣ်မီၣ်သ၀ီ သုးကီၣ်မံးရှၢၣ်အစုတီၤဖီလၥ် ပၢပြးခိၣ် အူအီၣ်၀့, ပှၤကွဲးနီၣ်တၢ် မၠိမ့ဒီးအပှၤမၤသကိးတၢ်တဖၣ်လၢအမ့ၢ် မီၣ်စီၣ်, ကၠံၢ်စိ, သ့ထဲး, မၠိ၀့, အ့ငွ့ၣ်, မ့နၢၤတဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
“ပှၤဖှီၣ်ဖိယၥ်ဖိ ဟံၣ်ဖိဃီဖိဒီး ပှၤလၢတအိၣ်ဒီးတၢ်အိၣ်ယၢၤတဖၣ် တၢ်ဖီၣ်အီၤ၀ံၤ တၢ်ဆါအီၣ်အီၤလၢ ကမျၢၢ်တၢ်ဘၣ်ကဲသုးအဂီၢ်လီၤ. ဒ်သိးအမဲၥ်သၣ်ကဂ့ၤအဂီၢ် ပှၤလၢဘၣ်တၢ်ဆါအီၣ်အီၤတဖၣ် တၢ်ဟ့ၣ်၀ဲ အကလီၢ်၄၀, ၅၀န့ၣ်လီၤ. ကျိၥ်စ့လၢအိၣ်တ့ၢ်အဘျဲၣ်တဖၣ် ပၢပြးခိၣ်တဖၣ်ဟံး၀ဲ၀ံၤ ခဲအံၤန့ၣ်အ၀ဲသ့ၣ်ကဲဒိၣ်ထီၣ်လံ”အဂ့ၢ် ရွ့ၣ်တီၣ်မီၣ်ကရူၢ် လီၢ်က၀ီၤဖိတဂၤ စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်မံးရှၢၣ်အစုတီၤဖီလၥ် ပၢပြးခိၣ် အူအီၣ်၀့ဒီး ကရၢတဖၣ်အံၤ ဃ့န့ၢ်ဆူၣ်၀ဲ ရွ့ၣ်တီၣ်မီၣ်သ၀ီအပူၤအိၣ် ဟံၣ်တဖျၢၣ်စုၥ်စုၥ်လၢ တၢ်ဘၣ်ကဲသုးအဂီၢ် စ့ပယီၤ ၂ကလးကၠးအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ရွ့ၣ်တီၣ်မီၣ်သ၀ီအပူၤ က၀ီၤဒ့အိၣ်၀ဲ ၁၃ဘ့ၣ်၀ံၤ ဟံၣ်ခိၣ်အိၣ်၀ဲ ၁၈၀၀ဘျဲၣ်ဒီး ကမျၢၢ်တၢ်ဘၣ်ကဲသုးအဂီၢ် ကိးလါဒဲး တၢ်ထၢန့ၢ်၀ဲ ကျိၥ်စ့အကလီၢ်လၢအကယၤဘျဲၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီအပူၤအိၣ် ကီၢ်ဆၣ်အါတက့ၢ်အပူၤ သုးကီၣ်မံးရှၢၣ်အစုတီၤဖီလၥ် ပၢပြးခိၣ်တဖၣ် ဃ့န့ၢ်ဆူၣ်၀ဲ ကျိၥ်စ့လၢ ကမျၢၢ်တၢ်ဘၣ်ကဲသုးလၢတလၢအခၢးအါအါဂီၢ်ဂီၢ်ဘၣ်ဆၣ် နီၢ်နီၢ်တခီ ပှၤလၢဘၣ်တၢ်ဆှၢအီၤဒ် ကမျၢၢ်တၢ်ဘၣ်ကဲသုးအဂီၢ်တဖၣ်န့ၣ် မ့ၢ်ပှၤတဖၣ်လၢ တၢ်အိၣ်ယၢၤတအိၣ် ပှၤဖှီၣ်ဖိယၥ်ဖိတဖၣ်အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီအပူၤ ကီၢ်ဆၣ်အိၣ်၀ဲ ၂၆ဘ့ၣ်၀ံၤ သုးကီၣ်မံးရှၢၣ်အစုတီၤဖီလၥ် ပၢပြးခိၣ်အါတက့ၢ်န့ၣ် ဒ်သိး ကမၤစၢၤ၀ဲဒီး တၢ်ကပှ့ၤ၀ဲ ဒူသ၀ီဂၢၤကီၢ်သုး, ကမျၢၢ်တၢ်ဘၣ်ကဲသုးအဂီၢ်အဂ့ၢ်၀ံၤ ကတီၢ်ခဲအံၤဒၣ်လဲၥ် ဃ့န့ၢ်ဆူၣ်၀ဲကျိၥ်စ့တဖၣ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
