လါနိၣ်၀့ဘၢၣ်(၁၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
လၢကတီၫ်အံၤ တၫ်သုတလဲၤဟးလၢကီၫ်ယပၣ်တဂ့ၤအဂီၫ် ပှၤတရူးဖိတဖၣ်န့ၣ် တရူးပဒိၣ်ဟ့ၣ်ပလီၫ်၀ဲလီၤ.
ယပၣ်ကိတိာ်ခိၣ်ကျၢၫ်တၣ်ကဲၣ်ခၠံးဆၣ်န့ အတၫ်ကတိၤလၢထဲၣ်၀ၣ်ဂ့ၫ်၀ီအဖီခိၣ်အဃိ တၫ်ခီၣ်ဆၢ၀ဲဒ်သိးအံၤအဂ့ၫ် တရူးပှၤဘၣ်မူဘၣ်ဒါတဖၣ်တဲ၀ဲလီၤ.
တတရူးထံဂုၤကီၫ်ဂၤကိတိာ်၀ဲၤကျိၤန့ၣ် ဖဲမုၫ်ယဲၫ်နံၤအလီၫ်ခံ ထုးထီၣ်တၫ်ဘိးဘၣ်ရၤလီၤတတီၤဒီးဆၣ်န့အတၫ်ကတိၤလၢ ထဲၣ်၀ၣ်ဂ့ၫ်၀ီအဖီခိၣ်န့ၣ် မ့ၫ်တၫ်ဃုအ့ၣ်လိာ်ဒီးထီဒါ၀ဲ၀ံၤ ထံကီၫ်ခံဘ့ၣ်အဘၢၣ်စၢၤ တၫ်လဲၤဟးသကိးကဒဲကဒဲန့ၣ် ကဲထီၣ်တၫ်ဘၣ်ဒိဘၣ်ထံးလၢတဂ့ၤတဖၣ်အဂ့ၫ် ပဲာ်အၢပဲာ်သီ၀ဲလီၤ.
ကီၫ်ယပၣ်အပူၤ ပှၤတရူးဖိအသးသမူဒီးတၫ်ဘံၣ်တၫ်ဘၢန့ၣ် လၢကတီၫ်အံၤ တၫ်ဘၣ်ယိၣ်အိၣ်ထီၣ်လံအဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲ၀ံၤ တၫ်ဘံၣ်တၫ်ဘၢတၫ်အိၣ်သးန့ၣ် ကပလီၫ်သးအဂီၫ် တဲဆီၣ်တခူ၀ဲလီၤ.
ထဲၣ်၀ၣ်ဂ့ၫ်၀ီ လၢသုးဂ့ၫ်၀ီအဖီခိၣ် ဂ့ၫ်ဂီၫ်အူတၫ်အိၣ်သးန့ၣ် တၫ်ပာ်ပနီၣ်သ့ဒ်တၫ်အိၣ်သးတခါ လၢမၤပျံၤမၤဖုး ကီၫ်ယပၣ်အဂ့ၫ် ယပၣ်ကိတိာ်ခိၣ်ကျၢၫ်ဆၣ်န့ တဲလီၤ၀ဲလၢဘျီၣ်ဒိၣ်အပူၤ ဖဲတလါအံၤထီၣ်သီန့ၣ်လီၤ.
ပှၤတရူးဖိလၢဟဲဆူကီၫ်ယပၣ်တဖၣ်ဒီးဘၣ်ထွဲထံကီၫ်ခံဘ့ၣ် တၫ်လဲၤဟးကဒဲကဒဲတၫ်ရဲၣ်တၫ်ကျဲၤတဖၣ် တၫ်ဘၣ်ယိၣ်ဒိၣ်ထီၣ်၀ဲလီၤ.
တနံၣ်အံၤ စးထီၣ်ဖဲလါယနူၤအါရံၤ တုၤ လါစဲးပထ့ဘၢၣ်အတီၫ်အပူၤ ပှၤတရူးဖိလၢလဲၤဟးဆူကီၫ်ယပၣ်အနီၫ်ဂံၫ်န့ၣ် အိၣ်၀ဲ ၇.၄၈ကကွဲၫ်ဒီးမ့ၫ်ပှၤလၢဟဲဟးဆူယပၣ်ကီၫ်အအါကတၢၫ်အဂ့ၫ် ယပၣ်တၫ်ဟးကသုၣ်တၫ်ဖံးတၫ်မၤကရၢ တဲ၀ဲလီၤ.
