လါနိၣ်၀့ဘၢၣ် ၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တးကီၢ်ရ့ၣ်, ပှၤကညီတၢ်နုၥ်လီၤဟးထီၣ်၀ဲၤဒၢးန့ၣ် ကီၢ်ပယီၤတပၤအိၣ် ပှၤလၢစံၣ်ပူၤဖျဲးထီၣ်လၢ ကၠါဖၠးတၢ်မၤလီၢ် ပှၤကီၢ်ချၢဖိ ခဲလၢၥ်ပၥ်ဖှိၣ် ၁,၅၉၈ဂၤ အတၢ်ထၢနုၥ်စရီန့ၣ် တၢ်ကးတံၥ်ကွံၥ်အီၤလၢ မဟါအနံၤလံအဂ့ၢ် ပၥ်ဂၢၢ်ပၥ်ကျၢၢ်ထုးထီၣ်ပၥ်ဖျါဃၥ်၀ဲန့ၣ်လီၤ.
ကၠီၣ်တဲၣ်ကရၢလီၤဆီ ယၣ်စမၣ်နူး သုးပှၤဘၣ်မူဘၣ်ဒါ သုးခိၣ်ဒိၣ်စိ ခၠီနၣ်ကၣ်ဆဲၣ်ဆီၣ်စံး၀ဲလၢ စးထီၣ်လၢခဲအံၤန့ၣ် ပှၤလၢဟဲစံၣ်ပူၤဖျဲးထီၣ်လၢ KK Parkတဖၣ် တးပှၤကညီတၢ်နုၥ်လီၤဟးထီၣ်၀ဲၤဒၢး အတၢ်ထၢနုၥ်စရီတဖၣ် ပတုၥ်ကွံၥ်အီၤလံအဂ့ၢ် ဘိးဘၣ်ရၤလီၤ၀ဲန့ၣ်လီၤ.
တကးဘၣ် ဖဲလါနိၣ်၀့ဘၢၣ် ၂သီအနံၤအလီၢ်ခံ မတၤတဂၤဂ့ၤ လၢဟဲနုၥ်လီၤတဖိးသဲစးလၢ ကၠီၣ်တဲၣ်ပူၤတဖၣ် တၢ်ကလိၥ်ကွီၢ်အီၤလၢ ဟီၣ်က၀ီၤပၢၤကီၢ်သုးကလၢၤတဖၣ်အဂ့ၢ် စံး၀ဲန့ၣ်လီၤ.
ပှၤလၢဘၣ်တၢ်ဖီၣ်အီၤလၢ ဟဲနုၥ်လီၤတဖိးသဲစးကွီၢ်မ့ၣ်တဖၣ်အံၤ တၢ်ကဟံးန့ၢ်ဂ့ၢ်၀ီလၢ တးကီၢ်ရ့ၣ်, ကီၢ်ဆၢ ၀့ၢ်၅၀့ၢ်လၢအမ့ၢ် ထးစီၣ်ယါ, မဲၢ်ရမး, မဲဆီး, ဖိးဖရးဒီး အိဖၠၣ်ပၢၤကီၢ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ပယီၤသုးမုၢ်ဒိၣ်အံၤ ပၥ်ဖှိၣ်မၤသကိးတၢ်ဒီး ကညီသုးခိးကီၢ်ဆၢ(BGF)ဝံၤ မၤဟးဂီၤကွံၥ် တရူးမုၥ်ကျိၤ၀ဲၤကွၥ်တၢ်တိၥ်ကျဲၤလီၤဆီ KK Parkအိၣ်တၢ်သူၣ်ထီၣ်တဖၣ်၀ံၤ မဟါအနံၤစ့ၢ်ကီးန့ၣ် မၤပိၥ်ဖးမၤဟးဂီၤကွံၥ် တၢ်သူၣ်ထီၣ်တဖၣ်အိၣ်ထီၣ်တုၤ ၂၁ဘျီညါအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤ တၢ်မၤပိၥ်ဖးမၤဟးဂီၤကွံၥ်တၢ်တဖၣ်န့ၣ် တၢ်ဘၣ်ဒိတအိၣ်ထီၣ်လၢကၠီၣ်တဲၣ်တပၤဘၣ်အသိး ပှၤလၢဘၣ်ဒိဒီးသံတဖၣ်စ့ၢ်ကီး တအိၣ်ထီၣ်၀ဲနီတဂၤဘၣ်န့ၣ်လီၤ.
ကီၢ်ကၠီၣ်တဲၣ်တပၤစ့ၢ်ကီး မၤပှဲၤဃၥ်၀ဲသုးအဂံၢ်အဘါ ဖဲကီၢ်ဆၢဒီတကျိၤ၀ံၤ တၢ်ဘံၣ်တၢ်ဘၢအဂီၢ် အိၣ်ခိးကွၢ်၀ဲလၢ ဘူးဘူးတံၢ်တံၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
