လါနိၣ်၀့ဘၢၣ် ၃သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, လ့က့ၣ်ကိၥ်၀့ၢ်သီအကပၤ တၢ်ဒုးဆူၣ်၀ံၤ သုးကီၣ်မံးရှၢၣ် သုးတြိၤ(၂၂)အစုတီၤဖီလၥ် ခမရ(၂၀၉)သုးရ့ၣ်အံၤ ဘၣ်ဒိ၀ဲဒိၣ်ဒိၣ်မုၢ်မုၢ်အဃိဂုၤက့ၤအခံ၀ံၤ တၢ်မၤန့ၢ်စ့ၢ်ကီး ကျိချံပှၥ်သၣ်အါအါဂီၢ်ဂီၢ်လၢသုးရ့ၣ်အံၤအအိၣ်အဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
လ့က့ၣ်ကိၣ်ဟီၣ်က၀ီၤလၢ တၢ်ဒုးဆူၣ်ထီၣ်ဒံးအဖၢမုၢ်အံၤအကပၤ ဖဲအပူၤကွံၥ် လါအီးကထိဘၢၣ် ၃၁သီအနံၤန့ၣ် သုးတြိၤ (၂၂)အစုတီၤဖီလၥ် ခမရ(၂၀၉)သုးရ့ၣ်ဒီး တၢ်ပၢၢ်ဆၢသုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲဖဲ ယသ့းကူၤအကပၤန့ၣ်လီၤ.
ဖဲလၢတၢ်ဒုးအပူၤ ခမရ(၂၀၉)သုးရ့ၣ် ဘၣ်ဒိးနးဒီးဂုၤက့ၤအခံ၀ံၤ သုးကီၣ်မံးရှၢၣ်အပှၤသုးဖိ တၢ်သံအစိၣ်တဖၣ်ဒီး စုက၀ဲၤကျိချံပှၥ်သၣ်အါအါဂီၢ်ဂီၢ် အိၣ်တ့ၢ်၀ဲအဂ့ၢ် တၢ်ပၢၢ်ဆၢသိၣ်ဒူတဖၣ် စံး၀ဲန့ၣ်လီၤ.
“ တၢ်သံအစိၣ်တဖၣ်စ့ၢ်ကီးအိၣ်တ့ၢ်လီၤ. ကျိချံပှၥ်သၣ်တဖၣ်စ့ၢ်ကီးအိၣ်တ့ၢ်အဂ့ၢ်” သိၣ်ဒူတဂၤလၢ အပၣ်ဃုၥ်ဒုးတၢ်လၢ တၢ်ဒုးအံၤအပူၤ စံး၀ဲန့ၣ်လီၤ.
သုးတၢ်တိၥ်ကူၣ်ကျဲၤ (၃၂), ခ့ဘှ့သူသုးကျိၤ လါနိၣ်၀့ဘၢၣ် ၂သီအနံၤ, ဟါလီၤခီအဆၢကတီၢ် တၢ်ဘိးဘၣ်ရၤလီၤ တၢ်ဂီၤမူအပူၤစ့ၢ်ကီး တၢ်ထံၣ်ဘၣ်၀ဲ တၢ်မၤန့ၢ် ကျိချံပှၥ်သၣ်အါအါဂီၢ်ဂီၢ်န့ၣ်လီၤ.
လါအီးကထိဘၢၣ် ၃၁သီအနံၤတၢ်ဒုးအပူၤ ခီဖျိသုးကီၣ်မံးရှၢၣ်အသုး ခး၀ဲအဃိ (DKBA)ပၢဆှၢဟီၣ်က၀ီၤ ဖလူသ၀ီလၢ တရူးထံဖိကီၢ်ဖိန့ၢ်ပၢ တၢ်ခးမ့ၣ်အူဖီတၢ်ပၥ်ကီၤအလီၢ် ၁၂၀မမကျိဖးဒိၣ်အချံဘၣ်အီၤ၀ံၤ မ့ၣ်အူအီၣ်ပိၥ်ဖးထီၣ်၀ဲအဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ စးထီၣ်လၢ လါစဲးပထ့ဘၢၣ် ၂၃သီအနံၤန့ၣ် ဒုးအိၣ်ထီၣ်၀ဲ သုးတြိၤ ၂၂ အစုတီၤဖီလၥ်သုးရ့ၣ်တဖၣ် ဒ်သုးရ့ၣ်၃ရ့ၣ် သုးတၢ်တိၥ်ကူၣ်ကျဲၤလၢ သုးတၢ်တိၥ်ကူၣ်ကျဲၤ ၃ခါ၀ံၤ ဟဲထီၣ်ဒုးတၢ်န့ၣ်လီၤ. သုးတၢ်တိၥ်ကူၣ်ကျဲၤ (၂၂၁), (၂၂၂)ဒီး (၂၂၃)တဖၣ်၀ံၤ သုးတၢ်တိၥ်ကူၣ်ကျဲၤတဖုန့ၣ် သုးအဂံၢ်အဘါအိၣ်၀ဲ ၄၀၀ဘျဲၣ်ဒီး ဟဲထီၣ်သုးကျိၤလၢ သုးဂံၢ်ဘါခဲလၢၥ်ပၥ်ဖှိၣ် ၁၂၀၀အဂ့ၢ် သုးကျိၤပၥ်ဖှိၣ်အခိၣ်လၢအမ့ၢ် သုးခိၣ်စီၤဒးဘီ စံး၀ဲန့ၣ်လီၤ.
သုးတြိၤ ၂၂အစုတီၤဖီလၥ် သုးတၢ်တိၥ်ကူၣ်ကျဲၤ ၃ဘ့ၣ် သုးဂံၢ်ဘါ ၁၂၀၀ဘျဲၣ်လၢ ဟဲထီၣ်သုးကျိၤဆူ ကညီကီၢ်စဲၣ်, လ့က့ၣ်ကိၥ်ဟီၣ်က၀ီၤအံၤ ဖဲတၢ်ဒုးကဲထီၣ်သးတလါအတီၢ်ပူၤ သုးရ့ၣ်ခိၣ်ခံတဂၤ ပၣ်ဃုၥ် ၁၅၀ဂၤဃၣ်ဃၣ် ဘၣ်သံ၀ဲ၀ံၤ ၂၀၀ဂၤဃၣ်ဃၣ် ဘၣ်ဒိ၀ဲအဂ့ၢ် သုးတၢ်တိၥ်ကူၣ်ကျဲ(၃၂) သုးကျိၤခိၣ် စီၤဒးဘီစံး၀ဲန့ၣ်လီၤ.
လ့က့ၣ်ကိၥ်တၢ်ဒုး လၢတလါအတီၢ်ပူၤ သုးကီၣ်မံးရှၢၣ်အသုးတပၤ အပှၤသုးဖိဟဲဟ့ၣ်လီၤအသးဃုၥ်ဒီးစုက၀ဲၤ ၄ဂၤ ၀ံၤ လၢဟီၣ်ခိၣ်မဲၥ်ဖံးခိၣ်တခီ တၢ်မၤန့ၢ်၀ဲစ့ၢ်ကီး ကျိ ၅ခိၣ်ဒီး သုးဖိတဂၤအဂ့ၢ် စံး၀ဲန့ၣ်လီၤ.
သုးကီၣ်မံးရှၢၣ်အသုးအံၤ ဖဲလၢလ့က့ၣ်ကိၥ်တၢ်ဒုးအပူၤ စူးကါ၀ဲ သုးဖိသီလၢထၢန့ၢ်ဆူၣ်ဃၥ်၀ဲလၢ ကမျၢၢ်တၢ်ဘၣ်ကဲသုးသဲစးတၢ်ဘျၢအဂ့ၢ် စံး၀ဲန့ၣ်လီၤ.
