လါနိၣ်၀့ဘၢၣ်(၃)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
တနီသရံၣ်ကီၫ်ဆၣ်, လ့မဲၣ်သ၀ီအကပိာ်ကပၤ သုးကီၣ်ကးအသုးဒီးတၫ်ပၢၫ်ဆၢသုးတဖၣ်တၫ်ဒုးဆူၣ်၀ဲအဃိ ဒူသ၀ီ(၄)ဖျၢၣ်အပူၤ ပှၤလီၫ်က၀ီၤဖိတဖၣ် ဘၣ်ဃ့ၫ်ပူၤဖျဲးအသးဒီး လိၣ်ဘၣ်ဂ့ၫ်ဂီၫ်အူတၫ်အီၣ်တၫ်အီဒီး တၫ်ကူတၫ်သိးတဖၣ် အဂ့ၫ် လီၫ်က၀ီၤဖိဒီးပှၤမၤစၢၤပှၤလီၫ်အိၣ်ကမှံဖိတဖၣ်တဲ၀ဲလီၤ.
စးထီၣ်ဖဲလါအီးကထိဘၢၣ်(၂၇)သီအနံၤ သုးကီၣ်ကးအသုးန့ၣ် ဟဲထီၣ်သုးကျိၤဆူ လ့မဲၣ်သ၀ီအကပိာ်ကပၤအဃိ တၫ်ဒုးကဲထီၣ်၀ဲဒီးတၫ်ပၢၫ်ဆၢသုးတဖၣ်ဒီးအကပိာ်ကပၤဒူသ၀ီ(၄)ဖျၢၣ်အပူၤ ပှၤလီၫ်က၀ီၤဖိခဲလၢာ် ဘၣ်ဃ့ၫ်ပူၤဖျဲး သးအဂ့ၫ် ပှၤမၤစၢၤပှၤလီၫ်အိၣ်ကမှံဖိတဂၤတဲ၀ဲလီၤ.
လ့မဲၣ်သ၀ီပာ်ဃုာ် ဖၣ်နံၣ်သ၀ီ,ဒူကၠိသ၀ီဒီးယ့ၣ်ခါခၠီသ၀ီအပူၤ ပှၤလီၫ်က၀ီၤဖိ ၅၀၀ဘျဲၣ် ဘၣ်ဃ့ၫ်ပူၤဖျဲးသးအဂ့ၫ် တဲ၀ဲလီၤ.
“တနီၤဒုပဒ့ၣ်ဟးဆှဲးအသးလၢဂ့ၫ်ဂီၫ်အူအပူၤလီၤ.တနီၤဒု ဟံးန့ၫ်တၫ်ဖိတၫ်လံၤချူးအဃိ အတၫ်ပီးတၫ်လီပာ်ဃုာ် ၀ဲလီၤ.လၢကတီၫ်အံၤဒု က့ၤဆူသ၀ီတန့ၫ်ဒံးဘၣ်အဃိ လိၣ်ဘၣ်တၫ်အီၣ်တၫ်အီအဂ့ၫ်”ပှၤမၤစၢၤပှၤလီၫ်အိၣ်ကမှံဖိ၀ဲန့ၣ် တဲ၀ဲလီၤ.
တၫ်မ့ၫ်ဘၣ်ဟးအိၣ်ကဒု ဒ်ယံာ်ထီၣ်န့ၣ် တၫ်သူၣ်ထီၣ်အတၫ်လိၣ်ဘၣ်ပာ်ဃုာ် တၫ်အီၣ်တၫ်အီတၫ်လိၣ်ဘၣ်တဖၣ် ကအါထီၣ်၀ဲအဂ့ၫ် ပှၤလီၫ်က၀ီၤဖိလၢအိၣ်ဖဲတကူၣ်ကၠ့သ၀ီတဂၤတဲ၀ဲလီၤ.
“ပှၤလီၫ်အိၣ်ကမှံလၢ ဟဲအိၣ်ကဒုယံာ်(၁)နွံစ့ၫ်ကီး အိၣ်၀ဲလီၤ.ကတီၫ်အံၤ သုးကီၣ်ကးတကပၤ မၤပှဲၤဂံၫ်ဘါဒီး ဟဲထီၣ်ကဒီးသုးကျိၤအဃိ တၫ်လိၣ်ဘၣ်တဖၣ်ကအါထီၣ်သ့အဂ့ၫ်”တဲ၀ဲလီၤ.
လါအီးကထိဘၢၣ်(၂၇)သီ တုၤ (၃၁)သီနံၤအပူၤ တၫ်ဒုးတဖၣ်န့ၣ်ဆူၣ်၀ဲ၀ံၤသုးကီၣ်ကးအသုးတကပၤ ခးလီၤ တၫ်လၢကလံၤကျါဒီးကျိဖးဒိၣ်တဖၣ်အဃိ လ့မဲၣ်သ၀ီဟံၣ်တဖျၢၣ်မ့ၣ်အူအီၣ်ကွံာ်၀ဲဒီး ပှၤကညီဖိတဂၤ ဘၣ်သံ၀ဲန့ၣ်လီၤ.
တကးဘၣ် အီးကထိဘၢၣ်(၂၈)သီအနံၤစ့ၫ်ကီး ပှၤလီၫ်က၀ီၤဖိတဂၤလၢဟဲက့ၤဆူလ့မဲၣ်သ၀ီ ဘၣ်သဂၢၫ်လိာ်သး ဒီးသုးကီၣ်ကးသုးကျိၤအဃိ တၫ်ခးသံကွံာ်အီၤအသိး ဒွဲၣ်အူထီၣ်ကွံာ်စ့ၫ်ကီး ဒူသ၀ီပူၤ ဟံၣ်(၃)ဖျၢၣ်ဒံးန့ၣ်လီၤ.
