လါအီးကထိဘၢၣ်(၂၈)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
လၢ၀့ၫ်တကူၣ်အပူၤ ပှၤလီၫ်အိၣ်ကမှံတဖၣ် ကဘၣ်ဟ့ၣ်တၫ်ဖးန့ၣ် ဟ့ၣ်တၫ်ဆီၣ်သနံးတဲပျံၤတဲဖုး၀ဲအိၣ်အဂ့ၫ် ပှၤလီၫ် အိၣ်ကမှံဖိတဖၣ်တဲ၀ဲလီၤ.
အိၣ်လၢတၫ်ဒုးကဲထီၣ်တၫ်လီၫ်တဖၣ်အပူၤဒီးပှၤလီၫ်အိၣ်ကမှံလၢဟဲအိၣ်ကဒုဖဲ၀့ၫ်တကူၣ်တဖၣ် သုးကီၣ်ကးအတၫ်ဃုထၢ တၫ်ကဟ့ၣ်ဆိတၫ်ဖးအဂီၫ် ကိးတဲဟ့ၣ်ပလီၫ်၀ဲက၀ီၤဒ့၀ဲၤဒၢးတဖၣ်အဂ့ၫ် တၫ်ဃုသ့ၣ်ညါန့ၫ်၀ဲလီၤ.
ပှၤလီၫ်အိၣ်ကမှံဖိတဖၣ် မ့ၫ်တဟ့ၣ်တၫ်ဖးဘၣ်န့ၣ် တပျဲအိၣ်၀ဲလၢ၀့ၫ်တကူၣ်လၢၤဘၣ်ဒီးကဆှၢက့ၤ၀ဲဆူ အတၫ်အိၣ် တၫ်ဆိးအလီၫ်အဂ့ၫ် သုးကီၣ်ကးအပၢပြးကရၢဖိတဖၣ် တဲပျံၤတဲဖုး၀ဲအဂ့ၫ် ပှၤလီၫ်အိၣ်ကမှံတနီၤတဲ၀ဲလီၤ.တကး ဘၣ်မ့ၫ်တဟ့ၣ်တၫ်ဖးဘၣ်န့ၣ် သးစၫ်ပိာ်ခွါတဖၣ် ကဆှၢ၀ဲဆူသုးကျါအဂ့ၫ်စ့ၫ်ကီးတဲပျံၤ၀ဲအဂ့ၫ် တၫ်သ့ၣ်ညါဘၣ်လီၤ.
‘’လၢညါန့ၣ် ကိးတဲ၀ဲလၢက၀ီၤဒ့၀ဲၤဒၢးလီၤ.အခဲအံၤဟဲတဲ၀ဲလၢဟံၣ်လီၤ.တၫ်ကဘၣ်ဟ့ၣ်တၫ်ဖးလီၤ.မ့ၫ်တဟ့ၣ်ဘၣ်န့ၣ် ကဆှၢက့ၤ၀ဲဒီးကမၢကဲသုးလီၤ.တကြၢးလၢတဲ၀ဲဘၣ်.ပှၤဟဲအိၣ်ကဒုလၢ၀့ၫ်တကူၣ်န့ၣ် ထံၣ်ဘၣ်တၫ်ကီတၫ်ခဲအါမး လီၤအဂ့ၫ်”ပှၤလီၫ်အိၣ်ကမှံဖိလၢအိၣ်ဟဲလၢရၢၫ်ခၢၣ်တဂၤတဲ၀ဲလီၤ.
တကးဘၣ် ပှၤလၢဟဲဃ့ၫ်အိၣ်ကဒုလၢ၀့ၫ်တကူၣ်တဖၣ် ကွၫ်ဆၢၣ်မဲာ်ဘၣ်တၫ်ကီတၫ်ခဲအါမးဒီးတၫ်နီၤဖးကလုာ် အဒူၣ်အဆၢစ့ၫ်ကီးအိၣ်၀ဲအဂ့ၫ် တၫ်သ့ၣ်ညါဘၣ်လီၤ.
“မ့မ့ၫ်ရၢၫ်ခၢၣ်န့ၣ် တအဲၣ်ဒီးဒိးလဲအိၣ်၀ဲဟံၣ်ဘၣ်.ဟ့ၣ်စ့ဒၣ်လဲၣ်တန့ၫ်ဘၣ်.ဃု ဘၣ်ဟံၣ်ကီ၀ဲလီၤ.အဲၣ်ဒိးဆီၣ်ဘံၣ်ဆီၣ် ဘၢတၫ်.တၫ်တဘၣ်လိာ်ဖိးဒ့အိၣ်အါမးအဂ့ၫ်”ပှၤလီၫ်အိၣ်ကမှံဖိတဂၤတဲ၀ဲလီၤ.
တၫ်န့ၣ်အဃိ ပှၤလီၫ်အိၣ်ကမှံဖိတဖၣ်န့ၣ် ကွၫ်ဆၢၣ်မဲာ်ဘၣ် သုးကီၣ်ကးအပၢပြးကရၢဖိတဖၣ် အတၫ်မၢန့ၫ်ဆူၣ်အီၤ လၢကဘၣ်ဟ့ၣ်တၫ်ဖးဒီးထံၣ်ဘၣ်တၫ်ကီတၫ်ခဲအဂ့ၫ် ပှၤလီၫ်အိၣ်ကမှံဖိတဖၣ်တဲ၀ဲလီၤ.
ရၢၫ်ခၢၣ်ကီၣ်စဲၣ်ပူၤ ကီၫ်ဆၣ်(၁၇)ဘ့ၣ်အကျါ AAထီၣ်ဒုးပၢဆှၢဃာ်၀ဲ (၁၄)ကီၫ်ဆၣ်န့ၣ်လီၤ.ကၠီးဖၠူၣ်ဒီးစံးတွ့ၣ်ကီၫ်ဆၣ် တဖၣ်အပူၤစ့ၫ်ကီး တၫ်ဒုးကဲထီၣ်၀ဲလီၤ.သုးကီၣ်ကးတကပၤစ့ၫ်ကီး တၫ်လီၫ်လၢAAထီၣ်ဒုးန့ၫ်ဃာ်တဖၣ် တ့ၫ်လီၤမ့ၣ် ပိၫ်လၢကဘီယူၤ,ခး၀ဲလၢကျိဖးဒိၣ်တဖၣ်အလီၫ်လီၫ်အဃိ ကမျၢၫ်တၫ်သံတၫ်ပှၫ်အိၣ်ထီၣ်၀ဲတပယူာ်ဃီန့ၣ်လီၤ.
ဒ်န့ၣ်အသိး ပှၤလီၫ်အိၣ်ကမှံဖိတဖၣ်လၢဟဲဃ့ၫ်အိၣ်ကဒု ဖဲယိၤဒိၣ်ကီၫ်စဲၣ်,ပ့ၣ်လီကီၫ်ဆၣ်စ့ၫ်ကီး သုးကရူၫ်ဒီးဂၢၤကီၫ် သုးတဖၣ် တဲပျံၤတဲဖုးအီၤလၢ မ့ၫ်တဟ့ၣ်တၫ်ဖးဘၣ်န့ၣ် တၫ်ကဒီၣ်တဲာ်ကွံာ်တၫ်အီၣ်တၫ်အီတဖၣ်အဂ့ၫ် ပှၤလီၫ်က၀ီၤဖိ တနီၤတဲ၀ဲလီၤ.
လၢထံကီၫ်ဒီတဘ့ၣ်တၫ်ဒုးအဃိ ကမျၢၫ်(၃)ကကွဲၫ်ဘျဲၣ်ဃာ်ဃာ်န့ၣ် ဘၣ်ပာ်တ့ၫ်ဟံၣ်ဃီဃ့ၫ်ပူၤဖျဲးအသးအဂ့ၫ် ဘီမုၫ် စၢဖှိၣ်ကရၢ ထုးထီၣ်ဘိးဘၣ်ရၤလီၤဃာ်၀ဲလီၤ.ဟီၣ်ခိၣ်မဲာ်ဖံးခိၣ်တၫ်ကဲထီၣ်အသးနီၫ်နီၫ်န့ၣ် သုးတ့ၫ်လီၤမ့ၣ် ပိၫ်အဃိ, ဒွဲၣ်အူထီၣ်ဟံၣ်ဃီတဖၣ်အဃိ,ဟဲထီၣ်သုးကျိၤမၤဟးဂီၤတၫ်အဃိ,တၫ်ဒုးကဲထီၣ်အဃိ ကမျၢၣ်လၢဘၣ်ဃ့ၫ်ပူၤဖျဲးအ သးတဖၣ်အနီၫ်ဂံၫ်နီၫ်ဒွးန့ၣ် အါန့ၫ်ဒံး ဘီမုၫ်စၢဖှိၣ်ကရၢဘိးဘၣ်ရၤလီၤဃာ်၀ဲအဂ့ၫ် ပှၤလၢဆီၣ်ထွဲမၤစၢၤတၫ်ဒီးတၫ်ပၢၫ် ဆၢကရၢတဖၣ်တဲ၀ဲန့ၣ်လီၤ.
