လါအီးကထိဘၢၣ်(၂၃)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကၠီၣ်တဲၣ်-ပယီၤကီၫ်ဆၢ အိၣ်လဲတၫ်လီအီၣ်ကျိာ်စ့ကဲ(ကၠါဖၠး)တဖၣ် သူ၀ဲ Starlink အ့ၣ်ထၢၣ်နဲး ၂,၅၀၀ဖျၢၣ်ဘျဲၣ် တၫ်ဒီၣ်တဲာ်ကွံာ်တၫ်ဆဲးကျိးလံအဂ့ၫ် Starlinkခီပနံာ်ပှၤပၢၤလီၫ်ဆ့ၣ်နီၤ(၂) တဲလီၤ၀ဲဖဲမဟါအနံၤန့ၣ်လီၤ.
လီၤဆီဒၣ်တၫ် ကီၫ်ပယီၤကီၫ်ဆၢဒီတကျိၤအပူၤ ကၠါဖၠးတဖၣ်ဆီလီၤအသးဒီးလံၣ်အီၣ်လီအီၣ်တၫ်န့ၣ် ၂၀၂၁နံၣ်အလီၫ်ခံ အၢထီၣ်၀ဲလီၤ.စးထီၣ်ဖဲလါဖ့ၤဘြူၤအါရံၤန့ၣ် ကၠီၣ်တဲၣ်,ပယီၤဒီးတရူးပာ်ဖှိၣ်လိာ်သး၀ံၤ ဟ့ၣ်တၫ်ဆီၣ်သနံးဆူၣ်ဆူၣ် ကိၤကိၤအပူၤ ပှၤမၤတၫ်ဖိ ၇,၀၀၀ဘျဲၣ် လၢကၠါဖၠးတၫ်မၤလီၫ်တဖၣ် တၫ်က့ၤဆှၢ၀ဲဆူအတၫ်အိၣ်တၫ်ဆိးလီၫ်ဒီး ကၠီၣ် တဲၣ်စ့ၫ်ကီး ဒီၣ်တဲာ်ကွံာ်တၫ်ဟ့ၣ်ခီအ့ၣ်ထၢၣ်နဲးဆူကီၫ်ဆၢတဖၣ်န့ၣ်လီၤ.
ဘၣ်ဆၣ်နာ်သက့,လၢတလါအံၤအပူၤ AFPအတၫ်ဃုထံၣ်သမံသမိးအဖီခိၣ် လၢရၤမတံ KK Parkအပူၤ တၫ်တ့ထီၣ်ဘှီထီၣ်တၫ်သူၣ်ထီၣ်ဒီးတၫ်သူ Starlinkအ့ၣ်ထၢၣ်နဲး၀ံၤ မၤကၠါဖၠးတၫ်ဖံးတၫ်မၤတဖၣ်ဒံးလီၤအဂ့ၫ် ပာ်ဖျါ၀ဲတၫ်ကစီၣ်န့ၣ်လီၤ.
ကီၫ်ကၠီၣ်တဲၣ်န့ၣ် ဒီၣ်တဲာ်ကွံာ်၀ဲ တၫ်ခီကီၫ်ဆၢဟ့ၣ်အ့ၣ်ထၢၣ်နဲးတဖၣ်၀ံၤအလီၫ်ခံ လၢစ့ၣ်တၣ်အါတက့ၫ်အပူၤန့ၣ် ထီထီၣ်ဃာ်၀ဲ Starlinkအ့ၣ်ထၢၣ်နဲးစဲးတဖၣ်လၢတၫ်သူၣ်ထီၣ်တဖၣ်အဖီခိၣ်အိၣ်၀ဲန့ၣ် တၫ်ထံၣ်ဘၣ်အဂ့ၫ် တဲ၀ဲလီၤ.
SpaceXအ Starlinkပှၤပၢၤလီၫ်ဆ့ၣ်နီၤ(၂) Lauren Dreyerတခီ ခီပနံာ်တကပၤ တၫ်အိၣ်သးဒ်သိးအံၤအကတီၫ် လၢကီၫ်ပယီၤ,ကၠါဖၠးတၫ်လီၫ် အကပိာ်ကပၤ Starlink ၂,၅၀၀ဘျဲၣ် ကးတံာ်ကွံာ်၀ဲအဂ့ၫ် တဲ၀ဲလီၤ.
ကီၫ်ပယီၤပူၤ KK Parkကၠါဖၠးတၫ်မၤလီၫ်လၢအမံၤဟူထီၣ်အၢအၢသီသီအံၤ နုာ်လီၤဖီၣ်၀ဲ၀ံၤ မၤန့ၫ်၀ဲ Starlinkစဲး (၃၀)ဖျၢၣ်အဂ့ၫ် ဖဲတနွံအံၤအပူၤ သုးကီၣ်ကးတကပၤဘိးဘၣ်ရၤလီၤ၀ဲလီၤ.
