လါအီးကထိဘၢၣ် ၂၃သီ, ၂၀၂၅နံၣ်, အၣ်ထူခ့တၢ်ကစီၣ်
တရူးထံကီၢ်ဖိကီၢ်တီခိၣ်ရိၣ်မဲ အိၣ်လဲၣ်တၢ်လံၣ်လီကျိၥ်စ့ကဲ(ကၠါဖၠး)တၢ်မၤလီၢ်လၢ အိၣ်ဖဲကၠီၣ်တဲၣ်-ပယီၤကီၢ်ဆၢ ကညီကီၢ်စဲၣ်, ရၤမတံ၀့ၢ်ကလံၤထံး မဲၢ်ထီၣ်သလ့သ၀ီအကပၤ သူမွဲကျိကၢၢ်နံၤ KK Parkအပူၤအိၣ် တြဲၤတဖၣ်အံၤ တနံၤအံၤဂီၤအဆၢကတီၢ် တၢ်အိးထီၣ်၀ဲအဃိ ထံကီၢ်အါဘ့ၣ်အပူၤပှၤလၢဟဲမၤကၠါဖၠးတၢ်မၤတဖၣ် စံၣ်ဖျိးဟးဆှဲးအဃိ ၀့ၢ်ရၤမတံန့ၣ်အိၣ်ပှဲၤဒီးပှၤမၤကၠါဖၠးတဖၣ်အဂ့ၢ် ပှၤ၀့ၢ်ဖိတဖၣ်စံး၀ဲန့ၣ်လီၤ.
၀့ၢ်ရၤမတံအပူၤအိၣ် ဟိၣ်ထဲ, တၢ်အိၣ်ကသုၣ်အလီၢ်တဖၣ် ပှဲၤလီၤလးအဃိ ကၠီၣ်တဲၣ်-ပယီၤကီၢ်ဆၢ တိၤနီၣ်ဂံၢ် ၁အခိၣ်ထီး ယံၤ၂မံၤလၤဃၣ်ဃၣ် တုၤ တၢ်ဆါတၢ်ပှ့ၤကျးဖးဒိၣ်ဒီတကျိၤ အိၣ်ပှဲၤဒီးပှၤအါအါဂီၢ်ဂီၢ်အဂ့ၢ် ပှၤ၀့ၢ်ဖိတဖၣ်စံး၀ဲန့ၣ်လီၤ.
ပှၤလၢအိၣ်ဖဲ တိၤနီၣ်ဂံၢ်၁အကပၤတဂၤ စံး၀ဲလၢ” မနၤ ပှၤလၢဆ့ၣ်နီၤလီၤတဖၣ်န့ၣ် အိၣ်တုၤ စးထီၣ်လၢတိၤခိၣ်ထီးဒီးတုၤလၢ တၢ်ဆါတၢ်ပှ့ၤကျးဖးဒိၣ်ညါ. ပှၤတရူးဖိလၢအိၣ်ဒီး လံၥ်ခီကီၢ်တဖၣ်စ့ၢ်ကီး ခီ၀ဲဖဲတိၤဖီလၥ်လၢ တဂၤစုၥ်စုၥ် ဘး၆၀၀၀ ဒီတနၤကျၢၤလီၤ. တုၤတဂီၤအံၤဒၣ်လဲၥ် ပှၤအိၣ်၀ဲအါအါဂီၢ်ဂီၢ်လီၤ. ပှၤကညီန့ၣ် တစှၤလီၤနီတဘျီဘၣ်အဂ့ၢ်” စံး၀ဲန့ၣ်လီၤ.
ပှၤလၢအိၣ်ဒီးလံၥ်ခီကီၢ် ဒီးပှၤလၢကျိၥ်စ့အိၣ်တဖၣ်လၢအမ့ၢ် တရူးထံဖိကီၢ်ဖိတဖၣ်အါတက့ၢ်ပၣ်ဃုၥ် ပှၤကီၢ်ချၢဖိတဖၣ်န့ၣ် ခီ၀ဲဖဲ တိၤနီၣ်ဂံၢ် ၁အဖီလၥ်၀ံၤ မဟါအနံၤဟါလီၤခီန့ၣ် ပှၤအါအါဂီၢ်ဂီၢ်ရိၣ်ဖှိၣ်အသးဖဲ တိၤနီၣ်ဂံၢ် ၁အခိၣ်ထီးအဃိ သုးကီၣ်မံးရှၢၣ်အသုးဒီး BGFအပှၤတဖၣ် ဟဲ၀ဲဒီး သိလ့ၣ်၉ခိၣ်၀ံၤ ဟဲဖီၣ်၀ဲအဂ့ၢ် အ၀ဲတဲအါထီၣ်၀ဲန့ၣ်လီၤ.
ထံကီၢ်အါဘ့ၣ်အိၣ် ပှၤကီၢ်ချၢဖိလၢဖံးမၤတၢ်လၢ ကၠါဖၠးတၢ်မၤလီၢ်အပူၤတဖၣ်အံၤ ဒ်သိး ကခီ၀ဲကီၢ်ကၠီၣ်တဲၣ်တပၤအဂီၢ် ဟဲအိၣ်ခိး၀ဲဒၣ်ဖဲ အ့ၣ်ကၠ့မၠဲၣ်, မဲၢ်ထီၣ်သလ့တုၤ ၀့ၢ်ရၤမတံ ကီၢ်ဆၢသူမွဲကျိၤကၢၢ်နံၤ တြဲၤတဖၣ်၀ံၤ စးထီၣ်လၢ မဟါအနံၤဟါလီၤခီအဆၢကတီၢ် ကၠီၣ်တဲၣ်တပၤစ့ၢ်ကီး ပျဲခီ၀ဲ ကီၢ်ကီၢ်ချၢဖိလၢအကယၤတဖၣ်၀ံၤ တူၢ်လိၥ်ဃၥ်၀ဲအဂ့ၢ် တၢ်သ့ၣ်ညါဘၣ်၀ဲန့ၣ်လီၤ.
ပှၤစံၣ်ဖျီးဟးဆှဲး၀ဲ အါအါဂီၢ်ဂီၢ်အကျါ ပှၤကီၢ်ချၢဖိတနီၤန့ၣ် အကျဲကမၣ်တုၤဒၣ်လဲၥ်လၢတၢ်လီၢ်အကစူးကတ့ၢ်အဃိ ဘၣ်ကိးမၤစၢၤဃၥ်၀ဲအဂ့ၢ်န့ၣ် PCကရၢဖိတဂၤလၢအိၣ်ဖဲ ၀့ၢ်ရၤမတံတၢ်ရ့ၣ်လိၥ်မုၥ်လိၥ်၀ဲၤဒၢး စံး၀ဲန့ၣ်လီၤ.
“ပှၤကီၢ်အ့ဒံယါဖိ ၈ဂၤလၢကျဲကမၣ်တဖၣ် တၢ်ကိးဃၥ်အီၤန့ၣ် အ၀ဲသ့ၣ်ဃုတၢ်အ့ၣ်လိၥ်အဃိ ဘၣ်ပၢၤဃၥ်၀ဲလၢ တၢ်၀ံၤသးစူၤအပူၤ ဒီတနၤလီၤ. အ၀ဲသ့ၣ်တၢ်ကတိၤစ့ၢ်ကီး ပတနၢ်ပၢၢ်, ပတၢ်ကတိၤစ့ၢ်ကီး အ၀ဲသ့ၣ်တနၢ်ပၢၢ်အဃိ ဘၣ်ပၢၤ၀ဲကီဒိၣ်မးလီၤ. ခဲအံၤဂီၤအကတီၢ်န့ၣ် အိၣ်ကတီၤအသးလၢ ကဆှၢအ၀ဲသ့ၣ်ဆူ BGFတၢ်ရ့လိၥ်မုၣ်လိၥ်၀ဲၤဒၢးအဂ့ၢ်” အ၀ဲစံး၀ဲန့ၣ်လီၤ.
ထံကီၢ်အါဘ့ၣ် ပှၤကီၢ်ချၢဖိအါအါဂီၢ်ဂီၢ် ဟဲတုၤအိၣ်ဖဲ၀့ၢ်ရၤမတံပူၤအဃိ ပှၤ၀့ၢ်ရၤမတံကမျၢၢ်ဖိတဖၣ် ဘၣ်တၢ်ဂုၥ်ဆူၣ်ဖျိဆူၣ်အီၤပၣ်ဃုၥ် တၢ်ဘံၣ်တၢ်ဘၢတၢ်လီၤဘၣ်ယိၣ်အိၣ်၀ဲအဂ့ၢ်ဒီး တၢ်မၤစၢၤကွၢ်ဃၥ်၀ဲ ပှၤမၤကၠါဖၠးတဖၣ်အဂီၢ်စ့ၢ်ကီးန့ၣ် တၢ်ဘျၢသဲးစးအဖီခိၣ် တၢ်ကီတၢ်ခဲအိၣ်၀ဲအဂ့ၢ် အလ့သ့းပှၤတ၀ၢတၢ်မၤစၢၤကရၢဖိ ပှၤဘၣ်မူဘၣ်ဒါတဂၤလၢအမ့ၢ် ကိၣ်စီၣ်အူစံး၀ဲန့ၣ်လီၤ.
