လါအီးကထိဘၢၣ် ၂၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
အမဲရကၤ ကီၢ်ခိၣ် Donald Trumpဃုၥ်ဒီး ASEANပှၤပၢၤလီၢ်ဆ့ၣ်နီၤ Anwar Ibrahimတဖၣ်အံၤ ကဟဲထီၣ် အုၣ်န့အသးလၢ ကၠီၣ်တဲၣ်-ခၣ်ဘီဒံယါတၢ်မုၥ်တၢ်ခုၣ် တၢ်ဆဲးလီၤမံၤစဲပနီၣ်အမူးတၢ်ရဲၣ်တၢ်ကျဲၤ အမူးလၢ တၢ်ရဲၣ်ကျဲၤမၤအီၤဖဲ ကီၢ်မလ့ရှါလၢ လါအီးကထိဘၢၣ် ၂၅သီအနံၤန့ၣ်လီၤ.
တၢ်ကဘှါရှဲ ကၠီၣ်တဲၣ်-ခၣ်ဘီဒံယါ ကီၢ်ဆၢတၢ်ဘၣ်ဂံၥ်ဂူၥ်လၢကဲထီၣ်တ့ၢ်လံလၢဆံယၤဖှိၣ်အံၤအဂီၢ်ဒီး တၢ်ကမၤစှၤလီၤကွံၥ် အ၀ဲသ့ၣ်ကီၢ်ဆၢဒီတကျိၤတၢ်ဖ့ၣ်ဆၢအဂီၢ် Donald Trumpဂုၥ်ကျဲးစၢး၀ဲန့ၣ်လီၤ.
ကၠီၣ်တဲၣ်ထံဂုၤကီၢ်ဂၤကိတိၥ်၀ဲၤကျိၤ Sihasak Phuangketkeowတခီ ASEANပတီၢ်ထီတၢ်အိၣ်ဖှိၣ်လၢတၢ်ကရဲၣ်ကျဲၤမၤအီၤ ဖဲ လါအီးကထိဘၢၣ် ၂၅သီတုၤ ၂၈သီအနံၤအတီၢ်ပူၤ လၢကွၣ်လၣ်လၣ်ပူၣ်အံၤအပူၤ ကဆဲးလီၤမံၤစဲးပနီၣ် ကပၥ်ဂၢၢ်ပၥ်ကျၢၢ်၀ဲအဂ့ၢ် စံး၀ဲန့ၣ်လီၤ.
“တၢ်ကမၤ၀ဲ တပတီၢ်၀ံၤတပတီၢ်တၢ်ရဲၣ်တၢ်ကျဲၤအဖီလၥ်န့ၣ် တၢ်ကထုးကွံၥ်ကျိဖးဒိၣ်တဖၣ်, တၢ်ကမၤရှဲပျီကွံၥ် မ့ၣ်ပိၢ်ဒိးလီၤတဖၣ်ဒီး တၢ်ကပၥ်ဖှိၣ်ဒုးလီၤပှီၢ် ကီၢ်ဆၢခီဂၥ်ကွီၢ်မ့ၣ်တဖၣ်အဖီခိၣ် ခံကပၤလၢၥ် အၢၣ်လီၤ၀ဲ” အဂ့ၢ် Sihasak စံး၀ဲန့ၣ်လီၤ.
တၢ်လဲၤထီၣ်လဲၤထီၣ်အံၤန့ၣ် ဖဲလါအီးကထိဘၢၣ် ၂၁-၂၂သီအနံၤ တၢ်ပၥ်ပနီၣ် ဟီၣ်ခိၣ်ထံဆၢကီၢ်ဆၢဂ့ၢ်၀ီ ခၣ်ဘီဒံယါ-ကၠီၣ်တဲၣ်ပၥ်ဖှိၣ်ကီၣ်မံးရှၢၣ် (JBC) တၢ်အိၣ်ဖှိၣ်လီၤဆီလၢ တၢ်ရဲၣ်ကျဲၤမၤအီၤဖဲ Chanthaburiအပူၤအံၤ တၢ်ပိၥ်ထွဲထီၣ်အခံတဖၣ်လီၤ.
ကီၢ်ဆၢတဲၣ် ၁၅တဲၣ်န့ၣ် တၢ်ကက့ၤဆီလီၤပၥ်လၢ အ၀ဲသ့ၣ်အလီၢ်ကျဲအဂီၢ်ဒီး တဲၣ်၃တဲၣ်လၢလီၤအုးလၢထံကျါတဖၣ် တၢ်ကက့ၤပၥ်လၢအလီၢ်တဖၣ်အံၤအဖီခိၣ် ခံကပၤမ့ၢ်အၢၣ်လီၤ၀ဲန့ၣ် တၢ်ကက့ၤဆီလီၤပၥ်လီၤလၢအလီၢ်အဂီၢ် အၢၣ်လီၤ၀ဲအဂ့ၢ် Prasas စံး၀ဲန့ၣ်လီၤ.
Sa Kaeoကီၢ်စဲၣ်အပူၤအိၣ် ကီၢ်ဆၢတဲၣ် နီၣ်ဂံၢ် ၄၂ဒီး ၄၇အဘၢၣ်စၢၤလၢ တၢ်ဘၣ်ဂံၥ်ဂူၥ်ကဲထီၣ်သးအလီၢ်တဖၣ် တၢ်ကက့ၤထိၣ်ဒွးအီၤအဂီၢ်ဒီး တၢ်ကပၥ်ဃၥ်၀ဲ တစိၢ်တလီၢ်တၢ်ပနီၣ်တဖၣ်အဂီၢ် ခံကပၤလၢၥ် အၢၣ်လီၤ၀ဲအဂ့ၢ် ကၠီၣ်တဲၣ်တၢ်ဒီသဒၢကိတိၥ် Gen. Natthaphon Nakphanichတဲကဒီး၀ဲ၀ံၤ တၢ်အံၤန့ၣ် ခၣ်ဘီဒံယါဒီးကၠီၣ်တဲၣ်ပှၤဘၣ်မူဘၣ်ဒါတဖၣ်အဘၢၣ်စၢၤ အဆိကတၢၢ်လီၤလၢဟီၣ်ခိၣ်မဲၥ်ဖံးခိၣ်ဒီး မၤသကိးတၢ်န့ၣ်လီၤ.
တၢ်ကထၢဖှိၣ်၀ဲ တစိၢ်တလီၢ်တၢ်ပနီၣ်တဖၣ်အဂီၢ်လီၤ၀ံၤ တမ့ၢ်လၢအဘၣ်ဒိဘၣ်ထံး၀ဲ ကၠီၣ်တဲၣ်န့ၢ်ပၢဟီၣ်က၀ီၤတဖၣ်အဂီၢ်ဘၣ်အဂ့ၢ် Gen. Natthaphon စံး၀ဲန့ၣ်လီၤ.
“တၢ်ဂၢၢ် ကီၢ်ဆၢဂၢၢ်တဖၣ်န့ၣ် တၢ်ကဆဲးမၤအီၤထဲဒၣ် တၢ်လီၢ်လၢတၢ်ပၥ်ပနီၣ်ဃၥ်၀ဲတၢ်လီၢ်အပူၤ” အဂ့ၢ် အ၀ဲစံး၀ဲ၀ံၤ တၢ်အၢၣ်လီၤအံၤန့ၣ် တချူးလၢ ASEANပတီၢ်ထီတၢ်အိၣ်ဖှိၣ်အပူၤ ကပၥ်ဖှိၣ်မၤသကိးတၢ်ဒီး ခံခီယၢ်ဘးတၢ်နၥ်န့လီၤသးကအိၣ်အါထီၣ်အဂီၢ် တၢ်မၤ၀ဲအဂ့ၢ် စံးအါထီၣ်၀ဲန့ၣ်လီၤ.
