လါအီးကထိဘၢၣ် ၂၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ရၤမတံကီၢ်ဆၣ်အပူၤ စးထီၣ်ဖဲအပူၤကွံၥ် လါစဲးပထ့ဘၢၣ်လီၢ်ခံကတၢၢ်အနွံန့ၣ် လ့က့ၣ်ကိၥ်ဟီၣ်က၀ီၤအပူၤတၢ်ဒုးတဖၣ်က့ၤကဲထီၣ်သးဖဲကိးမုၢ်နံၤ၀ံၤ ပှၤလီၢ်အိၣ်ကမှံဖိ ဟဲအိၣ်ထီၣ်၀ဲ ၃၅၀၀ဃၣ်ဃၣ်အဂ့ၢ် ပှၤလၢမၤစၢၤပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ပှၤစံၣ်သုး ပှၤလီၢ်အိၣ်ကမှံဖိအနီၣ်ဂံၢ်နီၣ်ဒွးအံၤ စးထီၣ်ဖဲအပူၤကွံၥ်လါစဲးပထ့ဘၢၣ် ၂၅သီတုၤလါအီးကထိဘၢၣ် ၂၀သီအနံၤအတီၢ်ပူၤဟဲအိၣ်ထီၣ်၀ဲ၃,၄၆၈ဂၤန့ၣ်လီၤ.KNUကညီဒီကလုၥ်စၢဖှိၣ်ကရၢ,ကီၢ်ရ့ၣ်ဒူပျၥ်ယၥ်ပၢဆှၢဟီၣ်က၀ီၤ, ကၠီၣ်တဲၣ်-ပယီၤကီၢ်ဆၢ ပှၤစံၣ်သုးပှၤလီၢ်အိၣ်ကမှံသုးကလၢၤ (Site)နီၣ်ဂံၢ် ၁ကရူၢ်, လ့က့ၣ်ကိၥ်,ထံမဲၢ်၀ါခံပၣ်ဃုၥ် သ၀ီ(၈)ဖျၢၣ်, ပှၤလီၢ်အိၣ်ကမှံဖိ နီၣ်ဂံၢ် ၃၅၀၀ဃၣ်ဃၣ်န့ၣ် ဘၣ်အိၣ်ကဒု၀ဲဒၣ်ဖဲ သူမွဲကျိၤကၢၢ်နံၤအကပၤန့ၣ်လီၤ.
ဖဲအပူၤကွံၥ်လါအီးကထိဘၢၣ် ၁၅သီအနံၤတုၤ၂၀သီအနံၤအတီၢ်ပူၤ လ့က့ၣ်ကိၥ်ပါခၠၣ်ကိ, View Point, စွဲၣ်တီၣ်ကိတၢ်လီၢ်တဖၣ်အံၤ သုးကီၣ်မံးရှၢၣ်အသုး က့ၤပၢဆှၢ၀ဲအဃိ အ့ၣ်ကၠ့မၠဲၣ်, မၠ့းတၣ်လ့မၠဲၣ်, မ့လဲးပၣ်, ဖလူဒီးယသ့းကူၢ်သ၀ီတဖၣ်အပူၤ လီၢ်က၀ီၤဖိအကထိတဖၣ်ဘၣ်ဃ့ၢ်ပူၤဖျဲးအသးအဂ့ၢ် ပှၤလၢမၤစၢၤပှၤလီၢ်အိၣ်ကမှံဖိတဂၤစံး၀ဲန့ၣ်လီၤ.
“ကတီၢ်ခဲအံၤအနီၣ်ဂံၢ်နီၣ်ဒွးစရီန့ၣ် အိၣ်ထီၣ်လံ ၃၅၀၀ဃၣ်ဃၣ်လံ. တၢ်ဒုးဆူၣ်ထီၣ်၀ဲအဃိ ပှၤလီၢ်အိၣ်ကမှံဖိကအါထီၣ်၀ဲဒံးအဂ့ၢ်” စံး၀ဲန့ၣ်လီၤ.
တကးဘၣ် လီၢ်က၀ီၤဖိလၢစံၣ်သုးတဖၣ် တၢ်ရဲၣ်ကျဲၤန့ၢ်တၢ်လီၢ်ဖဲ သူမွဲကျိကၢၢ်နံၤ၀ံၤ တၢ်အီၣ်တၢ်အီ, တၢ်အဒူၣ်, ဆူၣ်ချ့တၢ်ကဟုးကယၥ်တဖၣ်အဂီၢ် လိၣ်ဘၣ်၀ဲတၢ်မၤစၢၤတဖၣ်အါအါဂီၢ်ဂီၢ်န့ၣ်လီၤ.
ကတီၢ်ခဲအံၤ တၢ်ဒုးကဲထီၣ်သးအဆၢကတီၢ် သုးကီၣ်မံးရှၢၣ်အသုး မၤကလံၤကျါတၢ်ဒုးဒီး ခးကျိဖးဒိၣ်တဖၣ်အဃိ သးသမူတၢ်လီၤဘၣ်ယိၣ်ဒီး နီၢ်သးဂ့ၢ်၀ီတၢ်ဘၣ်ဒိဘၣ်ထံးတဖၣ်စ့ၢ်ကီးအိၣ်၀ဲအဂ့ၢ် ပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
သုးကီၣ်မံးရှၢၣ်အသုး ခးလီၤကျိဖးဒိၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ ပှၤလီၢ်အိၣ်ကမှံသုးကလၢၤအကပၤတဖၣ်, မၤကလံၤကျါတၢ်ဒုးတဖၣ်အိၣ်ထီၣ်၀ဲကိးမုၢ်နံၤဒီးခဲအံၤခဲအံၤအဃိ ဘၣ်အိၣ်၀ဲဒၣ်လၢ တၢ်ဘၣ်ယိၣ်ဘၣ်ဘှီတဖၣ်အဂ့ၢ် လ့က့ၣ်ကိၥ်ပှၤလီၢ်အိၣ်ကမှံတဂၤစံး၀ဲန့ၣ်လီၤ.
“ပနၢ်ဟူဘၣ် ဟဲတ့ၢ်လီၤမ့ၣ်ပိၢ်ဒီး တၢ်ခးလိၥ်သးအကလုၢ်တဖၣ်ကိးမုၢ်နံၤအဃိ နီၢ်သးတဘံၣ်ဘၢလၢၤဘၣ်. အပူၤကွံၥ်တသီန့ၣ် သုးကီၣ်မံးရှၢၣ်အသုးခးလီၤတၢ်အဃိ ဟဲလီၤတဲၥ်၀ဲဒၣ်ဖဲ အဘူးဒီးသုးကလၢၤအဃိ ဘၣ်ပျံၤဘၣ်ဖူးဘၣ်တၢ်ဒိၣ်မးလီၤ.”
တကးဘၣ် ပှၤလီၢ်အိၣ်ကမှံဖိတနီၤစ့ၢ်ကီး ဘၣ်ဟဲအိၣ်ကဒု၀ဲဒၣ်ဖဲ ရၤမတံ၀့ၢ်က၀ီၤဒ့တဖၣ်ဒီး အဘူးတံၢ်တဖၣ်အအိၣ်ဘၣ်ဆၣ် သ၀ီပၢပြး၀ဲၤဒၢးပှၤဘၣ်မူဘၣ်ဒါတဖၣ် ဟဲသမံသမိး၀ဲခဲအံၤခဲအံၤလီၤအဃိ တၢ်ဘၣ်ယိၣ်ဘၣ်ဘှီအိၣ်၀ဲအဂ့ၢ် ပှၤလီၢ်အိၣ်ကမှံဖိလၢ လဲၤဃ့ၢ်အိၣ်ကဒုလၢ၀့ၢ်ပူၤတဖၣ် စံး၀ဲန့ၣ်လီၤ.
ကတီၢ်ခဲအံၤ ခီဖျိသုးဂ့ၢ်၀ီတၢ်ဖ့ၣ်ဆၢအဃိ လ့က့ၣ်ကိၥ်ပှၤလီၢ်က၀ီၤဖိလၢဘၣ်ဃ့ၢ်ပူၤဖျဲးသးတဖၣ် တၢ်ကဆီၣ်ထွဲမၤစၢၤ၀ဲအဂီၢ် ဖဲအပူၤကွံၥ် လါအီးကထိဘၢၣ် ၁၅သီအနံၤန့ၣ် ပှၤလၢမၤစၢၤ၀ဲဒၣ်လၢ ဟီၣ်ခိၣ်မဲၥ်ဖံးခိၣ်လၢအမ့ၢ် လ့က့ၣ်ကိၥ်သးစၢ်ပှၥ်ဘျးစဲ(Lay Kay Kaw Youth Network)ကရၢ ဃ့ထီၣ်ဃၥ်၀ဲန့ၣ်လီၤ.
ဒ်န့ၣ်အသိး သုးကီၣ်မံးရှၢၣ်အသုးဒီး BGFသုးပၥ်ဖှိၣ်လၢဂံၢ်ဘါအိၣ်အကယၤဃၣ်ဃၣ်တဖၣ် ဟဲထီၣ်၀ဲသုးကျိၤ၀ံၤ ဟဲတ့ၢ်လီၤမ့ၣ်ပိၢ်လၢကလံၤကျါအဃိ ခဲအံၤတနွံအတီၢ်ပူၤ က၀ီၤဒ့(၅)အပူၤအိၣ် ယ့ၣ်ကၣ်ကိ, က၀ီၤဒ့ နီၣ်ဂံၢ် (၃)အိၣ် တၢ်ဆါဟံၣ်တၢ်လီၢ်ဒီး စွဲၣ်တီၣ်ကိတၢ်လီၢ်တဖၣ်အံၤ KNLA ဒီးPDF သုးပၥ်ဖှိၣ်တဖၣ် ဘၣ်ဂုၤက့ၤအခံဒီး ခံခီခံကပၤတၢ်ဘၣ်သဂၢၢ်ဒုးလိၥ်သးဆူၣ်ထီၣ်၀ဲန့ၣ်လီၤ.
လၢန့ၣ်အမဲၥ်ညါ လ့က့ၣ်ကိၥ်ဟီၣ်က၀ီၤ, ကြုၢ်တု, ကီးတရံး, နိၣ်တကီ, အ့ရှၢကျဲမုၢ်ဖးဒိၣ်အသီဒီး ဖၣ်ပူၣ်ဟီၣ်က၀ီၤတဖၣ်အပူၤ KNLA သိၣ်မှံသုးပၥ်ဖှိၣ်တဖၣ်ဒီး သုးကီၣ်မံးရှၢၣ်အသုး, BGF, DKBAဘိၣ်ဘံးကရၢ, PCကရၢ သုးပၥ်ဖှိၣ်တဖၣ်အဘၢၣ်စၢၤ တၢ်ဒုးတဖၣ်ဆူၣ်ထီၣ်၀ဲအဖၢမုၢ်ဒံးန့ၣ်လီၤ.
